IGIHE

Awilo Longomba yageze i Kigali (Amafoto & Video)

4 23-10-2019 - saa 10:52, Uwiduhaye Theos

Awilo Longomba ufite umuziki wamamaye cyane muri Repubulika Iharanira Demokarasi ya Congo (RDC) no muri Afurika muri rusange yageze mu Rwanda aho yatumiwe mu gitaramo gikomeye.

Awilo Longomba yageze i Kigali mu rukerera rwo kuri uyu wa Gatatu, aherekejwe n’ikipe y’abantu bazamufasha ku rubyiniro mu gitaramo ategerejwemo kuri uyu wa Gatanu.

Uyu muhanzi yamamaye mu ndirimbo zirimo ‘‘Coupé’’, ‘‘Gâté le coin’’, “Cache Cache”, “Karolina”, “Rosarina”, “Banana”, “Bibala bala”, “Trop parler c’est maladie” cyangwa se “Fifi”, “Esopi Yo” yahuriyemo na Tiwa Savage, “Enemy Solo” yakoranye na P Square n’izindi nyinshi.

Awilo yabaye umucuranzi uvuza ingoma mu matsinda atandukanye nka Viva la Musica, Stukas, Nouvelle Generation na Loketo.

Mu 1995 yahise ava mu byo kuvuza ingoma atangira kuririmba ndetse ahita ashyira hanze album ye ya mbere yise ‘Moto Pamba’ ku bufasha bw’abarimo Shimita, Ballou Canta, Dindo Yogo, Dally Kimoko, Sam Mangwana, Syran Mbenza na Rigo Star.

Mu 1998 yahise akora iyo yise ‘Coupé Bibamba’ yatumye amenyekana mu buryo bukomeye mu bihugu bitandukanye muri Afurika, i Burayi na Amerika.

Iyi yakurikiwe n’iyo yise ‘Kafou Kafou’ yagiye hanze mu 2001 ndetse na ‘Mondongo’ yakoze mu 2004.

Mu 2008, Awilo Longomba yashyize hanze album ye nshya yise ‘Super Man’ nayo yakunzwe mu buryo bukomeye. Uyu muhanzi yanakunzwe mu bihugu nka Leta Zunze Ubumwe za Amerika ndetse na Canada ubwo yari ari mu bitaramo bihazenguruka afatanyije na Nabtry International Cultural Dancers.

Ibi bitaramo byari bigamije kumenyekanisha iyi album ‘Super Man’ byasize yirahirwa mu 2008 na 2009, yaje no kwegukana igihembo muri International Reggae and World Music nyuma y’itora ryakozwe mu bihugu 120, ihabwa igihembo cya ‘Best Soukous Entertainer Award 2009’.

Awilo yanakoranye indirimbo n’abahanzi batandukanye bagezweho ubu barimo itsinda rya P Square, Tiwa Savage, Olamide na Yemi Alade bituma abo mu gisekuru cy’ubu nabo bamwiyumvamo.

Uyu muhanzi ubu aba mu Mujyi wa Londres mu Bwongereza aho abana n’umufasha we Paradis Kacharelle, banafitanye umwana bise Lovy Believe Church Awilo Longomba.

Awilo Longomba avuka mu muryango utari agafu k’imvugwa rimwe mu muziki cyane ko se Victor Longomba ari we washinze itsinda ry’abanyamuziki ryitwa T.P OK Jazz ryamamaye cyane, na mukuru we witwa Lovy Longomba ni umwe mu bari bakomeye mu muziki mu itsinda yabanagamo n’umuvandimwe we Christian Longomba ryitwaga Longombas ryakoreraga umuziki muri Kenya.

Ategerejwe mu gitaramo cya Kigali Jazz Junction kizaba ku wa 25 Ukwakira 2019, aho yatowe n’abakurikira abategura iki gitaramo ku rubuga rwa Twitter bamuhisemo bakarenza ingohe abandi bari bavuzwe barimo Suzanna Owíyo wo muri Kenya na Mýa wo muri Leta Zunze Ubumwe za Amerika.

Azahuriramo n’abandi bahanzi bo mu Rwanda nka Mani Martin ndetse na Ange Rita Kagaju uri mu bahanzi bari kuzamuka neza mu muziki, unafite ubuhanga buhambaye mu gucuranga.

Kwinjira muri iki gitaramo ni 10 000 Frw mu myanya isanzwe, 20 000 Frw muri VIP , 25 000 frw muri VVIP ndetse na 200 000 ku meza y’abantu umunani.

Awilo Longomba mu modoka yamutwaye kuri hotel agomba kuba acumbitsemo
Ubwo yakirwaga ku kibuga cy'indege i Kanombe
Uyu muhanzi ategerejwe mu gitaramo kizaba kuri uyu wa Gatanu
Uyu muhanzi yamamaye mu ndirimbo zirimo ‘‘Coupé’’, ‘‘Gâté le coin’’, “Cache Cache”, “Karolina” n'izindi

Video: Simeon Muhumuza

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Barafinda 2019-10-24 06:08:54

Igitaramo Kizabera Camp Kigali

2
kalisa 2019-10-24 03:58:27

birababaje kuba igitaramo kiba kibura iminsi ibiri ngo kibe ariko ugasanga nta hantu hazwi kizabera,abantu baba batumiye uyu muhanzi ntibazi gushaka amafranga rwose,turamenya tuzajya kumurebera hehe?

3
kiki 2019-10-23 09:12:41

Mumbabarire mumbwire KIGALI JUNCTION ni inyubako ni ahantu?niba ari inyubako se iherereye hehe?nimunsobanurire pe

4
guya 2019-10-23 06:13:29

un vraie Zairwa

Kwamamaza