IGIHE

Zizou Alpacino yahurije The Ben, Mike Kayihura na Yvan Buravan mu ndirimbo "Ihogoza"

0 20-07-2021 - saa 19:14, Nsengiyumva Emmy

Yifashishije inkumi zirimo n’izahataniye ikamba rya Miss Rwanda mu myaka itandukanye, Zizou Alpacino umaze kubaka izina mu guhuriza abahanzi mu ndirimbo imwe bikaryohera abakunda umuziki, yasohoye indirimbo nshya "Ihogoza" yaririmbwemo na Mike Kayihura, Yvan Buravan na The Ben.

Ni indirimbo yasohotse iri kumwe n’amashusho y’abantu batandukanye bayibyina. Muri aba Zizou yiyambaje harimo abasanzwe bafite amazina mu ruganda rw’imyidagaduro mu Rwanda.

Muri aba bakobwa bagaragara mu ndirimbo "Ihogoza" ya Zizou Alpacino harimo Uwimana Ariane wamenyekanye cyane mu irushanwa rya Miss Rwanda 2016 ubwo yegukanaga ikamba rya Nyampinga wabaniye neza bagenzi be; Umutoniwase Denyse wabaye Igisonga cya kabiri cya Miss Rwanda 2020 na Ikirezi Alliance Brune wabaye Nyampinga wakunzwe cyane muri Miss Rwanda 2020.

Mu kiganiro na IGIHE, Zizou Alpacino yavuze ko iyi ndirimbo ari imwe mu zigize album ye ya mbere yise "5/5 Experience".

Yagize ati “Nahisemo gukomeza gusangiza abakunzi b’umuziki indirimbo ziyigize, nibaza ko ubu nsigaje nk’esheshatu! Ndabizi ko ari album abantu bazakunda, kandi nkomeje kubibona no mu buryo bakundamo indirimbo ziyigize ngenda nsohora.”

Avuga kuri iyi ndirimbo "Ihogoza", Zizou yongeyeho ko yifuje guhuza aba bahanzi kuko ari bamwe mu bafite ubuhanga bwihariye mu muziki by’umwihariko bakaba bamwe mu bo akunda uburyo baririmba.

Ati “Njye burya mbere y’uko abantu baryoherwa umuziki wanjye, ndabanza nkawuryoherwa, rero nahoraga nibaza uwahuriza aba bahanzi mu ndirimbo imwe icyo byatanga kandi ndatekereza abantu bayikunze.”

Uyu mwaka wa 2021 Zizou yitegura gusohoramo album ye ya mbere, ni uwa cumi kuva atangiye gusohora indirimbo, ahereye ku yo yise "Bagupfusha ubusa" yasohotse mu 2011.

Zizou Alpacino yahurije The Ben, Mike Kayihura na Yvan Buravan mu ndirimbo "Ihogoza"
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza