IGIHE

Umurage Live Band yatsinze Mico Band muri “Battle of the Bands” ya Kigali Marriott Hotel

0 18-10-2019 - saa 11:03, Uwiduhaye Theos

Umurage Live Band yiyongereye amahirwe yo kwegukana irushanwa ryateguwe na Kigali Marriott Hotel, rihuza amatsinda y’abahanga mu gucuranga no kuririmba mu Rwanda ryiswe “Battle of the Bands”.

Ku wa 16 Ukwakira, abakunda umuziki ufite uburyohe kandi unogeye amatwi bari bambariye kumva uwari wateguye n’amatsinda abiri y’abahanga mu gucuranga nka Mico Band ndetse na Umurage Live Band mu muri ‘Battle of bands” itegurwa na Kigali Marriott Hotel.

Wari umugoroba w’uburyohe ku bakunzi b’umuziki ucuranze mu buryo bw’umwimerere basohokeye mu Iriba Bar and Terrace muri Kigali Marriott Hotel.

Ni urugendo rurerure ku matsinda rwatangiye muri Kanama 2019 bikaba biteganyijwe ko uyu mwaka uzasiga hamenyekanye itsinda rihiga ayandi mu buhanga mu gucuranga no kuririmba.

Muri iri rushanwa riri kugana ku musozo aho rigeze muri ½, itsinda rya Umurage Live Band ryahigitse Mico Band rikatisha itike yo kuzahatana n’andi matsinda abiri hashakwamo rimwe rihiga ayandi.

Muri aya matsinda hazaba harimo Salus Music Band yashibutse kuri Orchestre Salus Populi ya Kaminuza y’u Rwanda (UR), Umurage Live Band ndetse n’irindi rimwe ritaramenyekana.

Umuyobozi wa Umurage Live Band, Ngabo Evode [Evy], yabwiye IGIHE ko iri rushanwa ryabahaye amahirwe yo kwigaragaza no kwigira ku bandi batari basanzwe babazi.

Ati “Turi band ishaka gutera imbere. Inyungu twiteze kuvana mu irushanwa ni ukumenyekana mu bantu batatuzi no kwigira ku bandi tuzahuriramo. Twaje dushaka igihembo kandi tugitwaye byaduha imbaraga zo gukomeza gukora no gutegura indi mishinga igamije kuzamura izina ryacu.’’

Irushanwa ryitabiriwe n’amatsinda 10, riba buri cyumweru kugeza mu Ugushyingo 2019 ubwo hazamenyekana iryegukanye igihembo.

Battle of the Bands iri kuba ku nshuro ya kabiri; yatangijwe mu 2018, bwa mbere yegukanwa na Neptunez Band.

Band izegukana irushanwa rya 2019 izahabwa amasezerano y’umwaka yo kuririmbira muri Kigali Marriott Hotel no mu birori byo gutangira umwaka mushya n’amahirwe yo gukorera indirimbo muri studio ikoreramo Danny Beats.

Itsinda rya Mico Band ntabwo ryahiriwe mu irushanwa
Mico Band ubwo bigaragazaga mu muziki w'umwimerere
Ngabo Evy, umwe mu bagize Umurage Band
Umucuranzi wa Mico Band akirigita piano
Umurage Band basusurukije abitabiriye
Umurage Live Band nibo batsindiye kujya ku irushanwa rya nyuma
Umurage Live Band yahanyuranye umucyo
Umwe mu baririmbyi b'Imena ba Mico Band aririmba
Umwe mu baririmbyi bo muri Umurage Live Band yigaragaza mu kuririmba
Umwe mu baririmbyi ba Mico Band agaragaza ubuhanga bwe mu kuririmba
Imfura Frank [Mihigo Wamugabo] (imbere) uyobora Imfura Creative Ltd ifasha mu kuzamura impano z'abahanzi na we yati yizihiwe ubwo yarebaga uko amatsinda ahatana. Inzu ye ni yo ibarizwamo Umurage Live Band
Byari ibyishimo ku baje kureba ihatana rya Mico Band na Umurage Live Band
Mico Band yasusurukije abaje kureba uko ihatana na Umurage Band

Amafoto: Himbaza Pacifique

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza