IGIHE

The Ben yerekeje muri Tanzania, bikekwa ko yasanzeyo umukunzi we

0 26-11-2020 - saa 13:08, IGIHE

Umuhanzi Mugisha Benjamin wamenyekanye nka The Ben, yerekeje muri Tanzania mu gihe hari amakuru avuga ko yasanzeyo umukobwa bakundana, Uwicyeza Pamela, umaze iminsi muri icyo gihugu.

Abinyujije ku rukuta rwe rwa Instagram, The Ben yishimiye ukuntu abaturage bo muri Tanzania bamwakiranye urugwiro, bakamwereka urukundo.

Uyu muhanzi yerekeje muri Tanzania mu gihe Uwicyeza Pamela bivugwa ko bakundana, yari amaze iminsi muri icyo gihugu.

Yaba urugendo rwa Uwicyeza cyangwa urwa The Ben, bose babigize ibanga, icyakora hari amakuru avuga ko bagiye kurira ubuzima muri iki gihugu cyo mu burasirazuba bw’u Rwanda.

Uwicyeza ukunze kugaragaza amarangamutima ye kuri The Ben, aherutse gushyira hanze ifoto bari kumwe, arangije ayiherekesha amagambo agira ati "Mine", bisobanuye "Uwanjye."

Ku wa 9 Mutarama 2020 ku isabukuru y’amavuko ya The Ben, uyu mukobwa yashyize ifoto y’uyu muhanzi kuri Instagram, arangije agira ati "Uri umunyamutima mwiza, ugira urukundo, uri uwo kwizerwa ndetse umutima wawe ni munini kukurusha. Imana ihe umugisha undi mwaka wawe."

Mu kiganiro IGIHE yagiranye na Uwicyeza ku wa 17 Ugushyingo, yabajijwe icyihishe inyuma y’umubano we na The Ben, aryumaho.

Ati "Ni ubuzima bwite bw’umuntu, ndumva nta kirenze nabivugaho. Ni ibisanzwe, nta mpamvu yo kubitindaho. Iyo umuntu adashaka kuvuga ikintu ntabwo aba agishaka kandi nta n’ikintu byabamarira. Ni ugutegereza igihe nikigera, ibyo mugomba kumenya muzabimenya."

Uwicyeza Pamella w’imyaka 21, yasoje amashuri yisumbuye mu bijyanye n’Amateka, Ubukungu n’Ubumenyi bw’Isi (HEG) kuri APADE ku Kicukiro. Ateganya gutangira kwiga kaminuza mu mwaka utaha.

The Ben we yavukiye i Kampala ku wa 9 Mutarama 1988. Ni umwe mu bahanzi bafite izina rikomeye mu muziki w’u Rwanda no mu karere muri rusange.

Uwicyeza amaze iminsi muri Tanzania
Hari amakuru avuga ko uyu mukobwa agiye guhurira na The Ben muri Tanzania
Uwicyeza akunze kwita The Ben uwe
Uwicyeza aherutse kugaragaza ko akunda inseko ya The Ben mu buryo bukomeye
Iby'umubano w'aba bombi bikunze guteza urujijo mu babakurikira
The Ben nawe ajya anyuzamo agashyira amafoto y'uyu mukobwa ku mbuga nkoranyambaga
Iyo Uwicyeza ari kuvuga kuri The Ben ararambukirwa
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza