IGIHE

Sisqó n’itsinda rya Dru Hill yatangiriyemo umuziki bategerejwe i Kigali

0 25-01-2023 - saa 12:01, Nsengiyumva Emmy

Umuhanzi rurangiranwa mu muziki w’Isi Mark Althavan Andrews wamamaye nka Sisqó, ategerejwe i Kigali mu gitaramo byitezwe ko azahuriramo n’itsinda rya Dru Hill yatangiriyemo umuziki mu 1992.

Amakuru IGIHE yabonye ni uko ibiganiro bitumira Sisqó n’itsinda rya Dru Hill i Kigali bigeze kure.

Aya makuru ahamya ko mu minsi iri imbere hazatangazwa amakuru menshi ku bizaba byavuye muri ibi biganiro.

Umuyobozi wa sosiyete iri gutegura iki gitaramo tutifuje kuvuga muri iyi nkuru, yaduhishuriye ko amaze igihe mu biganiro n’aba bahanzi ku buryo igisigaye ari uko bashyira umukono ku masezerano ubundi akabona gushyira hanze amakuru yose y’iki gitaramo.

Sisqó uzaba ataramiye bwa mbere mu Rwanda, ni umuhanzi w’imyaka 44 winjiye mu muziki kuva mu 1992 ari mu itsinda rya Dru Hill.

Uyu muhanzi yamenyekanye mu ndirimbo nka Thong song, Incomplete, Got to get it, Addicted, Dance for me, Without you yakoranye n’itsinda rya Dru Hill bazanataramana i Kigali kimwe n’izindi nyinshi.

Itsinda rya Dru Hill uyu muhanzi yatangiriyemo umuziki rizwi mu ndirimbo nka Wild Wild West bakoranye na Will Smith bafatanyije na Kool Moe Dee, All Alone, You Are Everything, These Are the Times, In My Bed, Beauty, Tell Me, Never Make a Promise, How Deep Is Your Love, We’re Not Making Love No More n’izindi nyinshi.

Iri tsinda ryaje kuba ikimenyabose ryatangijwe n’urubyiruko rwari rutuye mu Mujyi wa Baltimore kugeza ubu ukaba ufatwa nk’utuwe cyane muri Leta ya Maryland, ribarizwamo abahanzi nka Nokio, Jazz, Scola, Sisqó,Tao,Smoke na Black ndetse n’uwitwa Wood utakiribarizwamo.

Nyuma y’uko uwitwa Wood wari mu bari bagize iri tsinda asezeye mu 1999 akajya kwikorana umuziki, abari barigize bafashe icyemezo cyemerera buri umwe kuba yakwikorana umuziki ku giti cye bitabaye ngombwa ko ava mu itsinda.

Nguko uko Sisqó yatangiye urugendo rwo kwikorana umuziki ahera kuri album yise Unleash the Dragon iyi ikaba yarasohotse mu 1999.

Nubwo byabanje gutera umwuka mubi mu itsinda ariko, baje kubyumvikanaho ndetse bemera icyemezo uyu muhanzi yari yafashe inshuro nyinshi bakaba baragiye bakorana ibitaramo ari umuhanzi ku giti cye ndetse anari kumwe n’iri tsinda.

Sisqó n’itsinda rya Dru Hill yatangiriyemo umuziki bategerejwe i Kigali
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza