IGIHE

R. Kelly agiye kuburanishwa ku byaha birimo ubucuruzi bw’abantu bugamije kubakoresha imibonano mpuzabitsina

0 21-11-2020 - saa 05:41, Uwiduhaye Theos

Umuririmbyi R.Kelly arasumbirijwe ndetse akomeje kuregwa no kugezwa imbere y’inkiko zitandukanye muri Amerika akurikiranyweho ibyaha byiganjemo ibyo gukoresha abangavu imibonano mpuzabitsina.

Ibi byaha birimo ubucuruzi bw’abantu bugamije kubakoresha imibonano mpuzabitsina. Biteganyijwe ko azisobanura kuri ibi byaha mu Rukiko rwo mu Mujyi wa Brooklyn muri Mata umwaka utaha.

Abazaba bagize itsinda ry’abacamanza bazatoranywa muri Werurwe 2021, urubanza rutangire ku wa 7 Mata 2021 rumare iminsi 10.

Ann Donnelly, umucamanza w’aho uyu mugabo azaburanira, yatangaje ko umutekano w’aho R.Kelly azaburanira uzakazwa imbere n’inyuma mu gihe urubanza ruzamara. Abagize itsinda ry’abacamanza bazaherekezwa n’abasirikare ndetse batandukanywe mu kwirinda ko hari ubwo bafata umwanzuro kubera igitutu.

Abashinjacyaha bo basabye ko hashyirwaho izindi ngamba, kuko uyu muhanzi afite amateka maremare yo gushyira igitutu ku bamushinja ndetse agamije gucika ubutabera.

Yatanze urugero rw’uko mu 2008 ubwo yajyaga mu rubanza i Chicago, ashinjwa gukoresha ibikorwa by’urukozasoni umwana muto. Yemeza ko uru rubanza rwarangiye agizwe umwere ariko mu buryo bw’uburiganya.

Yongeyeho ko ikindi ashingiraho ari uko batatu bakoranaga na R.Kelly baherutse gufungwa bazira gushaka guha ruswa abashinja uyu muhanzi wamamaye muri RnB.

R.Kelly afungiwe muri gereza yo muri Leta ya Illinois mu Mujyi wa Chicago, ndetse imwe mu mfungwa bafunganywe iherutse kumukubita.

R Kelly agiye kongera kugezwa imbere y'urukiko
Uyu mugabo aherutse gusagarirwa muri gereza n'uwo bafunganywe
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza