Miss Uwase Raissa Vanessa wabaye Igisonga cya Mbere cya Miss Rwanda mu 2015 yasezeranye imbere y’amategeko na Ngenzi Dylan biyemeje kurushinga, umuhango wabereye mu Murenge wa Kimihurura kuri uyu wa 12 Kamena 2025.

Miss Uwase Vanessa asezeranye na Ngenzi Dylan nyuma y’uko ku wa 7 Kamena 2025 bakoze umuhango wo gusaba no gukwa, aho bakoranyije imiryango igaha umugisha urukundo rwabo.

Byitezwe ko ku wa 14 Kamena 2025, bazasezerana imbere y’Imana, banakire abatumiwe mu bukwe bwabo.

Miss Vanessa wari umaze igihe akundana na Dylan Ngenzi, ku wa 27 Nzeri 2024 yambitswe impeta y’urukundo, uyu musore amusaba ko bakomezanya urugendo rw’ubuzima, undi amwemerera atazuyaje.

Muri Werurwe, Miss Vanessa yafatiwe irembo. Bamenyanye mu 2018, babanza no gukundana icyakora baza kubivamo.

Mu 2023 nibwo amakuru yakomeje kuvugwa ko bongeye gusubirana ndetse urukundo rugeze aharyoshye.

Miss Vanessa ni umwe mu basezeraniye mu Murenge wa Kimihurura

Miss Vanessa n'umugabo we Dylan Ngenzi mbere yo gusezerana imbere y'amategeko

Dylan Ngenzi yarahiriye kuzabana akaramata na Miss Vanessa

Miss Vanessa nawe yarahiriye kuzabana na Dylan Ngenzi bakazatandukanywa n'urupfu

Dylan Ngenzi ashyira igikumwe ku ndahiro ye

Miss Vanessa nawe yashyize igikumwe ku ndahiro ye

Miss Vanessa na Ngenzi Dylan nyuma yo gushyira ibikumwe ku ndahiro zabo bagaragazaga akanyamuneza

Byari ibyishimo kuri Miss Vanessa na Ngenzi Dylan basezeranye imbere y'amategeko

Amafoto: Habyarimana Raoul