Abahanzi batandukanye bakomeye mu Rwanda na Gregory Bortey Newman wamamaye nka King Promise wo muri Ghana, bazataramira abazakurikira imikino y’irushanwa rikomeye rya Basketball Africa League (BAL).

Iri rushanwa rya BAL rigarutse mu Rwanda ku nshuro ya gatanu. Rizatangira ku wa 17-25 Gicurasi 2025.

Ni mu mikino izabera muri BK Arena, ndetse abahanzi bakomeye bazasusurutsa abafana mu buryo budasanzwe. Muri bahanzi bazasusurutsa abazitabira harimo King Promise wo muri Ghana uzwi mu ndirimbo nka Terminator n’izindi.

Hari kandi Ariel Wayz, Kivumbi King ndetse na Kid from Kigali uri mu baraperi bari kuzamuka neza mu Rwanda.

Irushanwa rya BAL 2025 ririmo amakipe 12 yaturutse mu bihugu 12, agabanyije mu matsinda atatu. U Rwanda ruhagarariwe na APR Basketball Club.

Iyi mikino yatangijwe ku bufatanye bwa NBA na FIBA mu 2019. BAL ni shampiyona igamije guteza imbere basketball ku Mugabane wa Afurika, kongerera abanyempano amahirwe yo kwigaragaza no kugera ku rwego mpuzamahanga.

Ariel Wayz azaririmba muri iyi mikino

King Promise wo muri Ghana ategerejwe mu Rwanda

Kivumbi ni umwe mu bahanzi bazaririmba mu mikino ya BAL