IGIHE

Khalfan yahishuye uko inzoga zamuvugishije Icyongereza cyatumye agirwa iciro ry’imigani

0 26-11-2020 - saa 18:18, Nsengiyumva Emmy

Ku mbuga nkoranyambaga, Khalfan akomeje guhabwa inkwenene n’abakunzi b’umuziki kubera Icyongereza yavuze ubwo yari mu kiganiro n’umunyamakuru.

Uyu muraperi uri mu bazwiho kuvugisha ukuri no kutaripfana, nyuma yo gushaka kuvuga ko imbere he hari mu biganza by’Imana, yajya kubishyira mu cyongereza akabivuga nabi, yasabye imbabazi abakunzi be, ahamya ko yahemukiwe n’inzoga yari yabanje gusomaho.

Abinyujije ku mbuga nkoranyambaga, uyu muhanzi yiseguye ku bakunzi be ati ”Nsabye imbabazi mu ruhame, kurasa imbogo bene aka kageni, ndahiye imbere y’abazungu n’abirabura ko bitazasubira.”

Aya magambo yayakurikije utumenyetso tw’ikirahure kirimo inzoga n’utundi duseka, avuga ko inzoga arizo zamutengushye. Ati “Manyinya ukomeje kuntenguha pe, ubuse subscribe nari kuyibasha yo?”

Mu kiganiro kigufi, Khalfan yabwiye IGIHE ko yagiye gukora iki kiganiro cyaciye kuri shene ya YouTube ya Yambi, afitemo agasamusamu, bituma no kuvuga neza ibyo azi bimugora.

Ati ”Nari mfite agasamusamu, byatumye kuvuga bimbana ikibazo gikomeye, ririya jambo ryarangoye rwose sinakubeshya, ariko si uko ntarizi, ni ka manyinya kantengushye.”

Uyu muraperi yavuze ko yahise afata icyemezo cyo kuzigabanya ku buryo zitazongera kumugusha mu mutego nk’uwo yaguyemo.

Ati “Mu Kinyarwanda bavuga ko ibuye ryagaragaye riba ritacyishe isuka, njye wenda byambayeho ariko icyiza ndacyafite amahirwe yo kubikosora. Ndabwiza ukuri abafana banjye ko bitazongera kumbaho ukundi.”

Khalfan uzwi cyane mu njyana ya Hip Hop nko mu ndirimbo yise Zimbarire, Power yakoranye na Bruce Melodie n’izindi nyinshi; mu minsi ishize yasohoye indirimbo yise “Ninde” ari nayo aheruka.

Usibye iby’umuziki ariko Khalfan yatangiye kugaragara muri filime “Umuturanyi” ya Clapton Kibonke, ibintu yemeza ko nabyo abifitemo impano yihariye.

Icyongereza cyatumye Khalfan agirwa iciro ry’imigani

Ikiganiro Khalfan yavugiyemo icyongereza cyamugize iciro ry’imigani

Indirimbo Ninde Khalfan aheruka gusohora

Nyuma yo kubona ko ka Manyinya kamukojeje isoni, Khalfan yiyemeje kukagabanya
Khalfan wasabye imbabazi abafana yahishuye ko ka manyinya ariko kamuhemuje
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza