IGIHE

Imbamutima za Teta Diana nyuma yo gusura ‘Akarwa k’abakobwa’ mu Kivu aho abatewe inda zitateguwe barohwaga

0 23-02-2021 - saa 08:25, Nsengiyumva Emmy

Ibyishimo ni byose kuri Teta Diana wabashije gusura ‘Akarwa k’abakobwa’ mu kiyaga cya Kivu aho mu myaka yo hambere abakobwa baterwaga inda zitateguwe barohwaga.

Nyuma yo gusura ‘Akarwa k’Abakobwa’, uyu muhanzikazi yavuze ko yishimiye kugera aha hantu habaye amateka no kumenya ibyahakorerwaga, we afata nko guhonyora uburenganzira bw’ikiremwamuntu by’umwihariko abana b’abakobwa.

Mu kiganiro na IGIHE, Teta Diana wari uvuye gusura ‘Akarwa k’abakobwa’ yagize ati “Nshimishijwe n’uko u Rwanda nkuriyemo kandi nanjye nifuza kuzarereramo abana banjye, ruharanira uburenganzira bwuzuye ku bana b’abakobwa. Abahungu n’abakobwa bagahabwa amahirwe angana.”

Uyu muhanzikazi ukorera umuziki ku mugabane w’u Burayi, amaze iminsi mu Rwanda aho usibye gusura umuryango we no kuruhuka kimwe n’ibindi bikorwa bye bwite ahugiyemo, yabonye umwanya wo gutembera uduce dutandukanye nyaburanga.

Amateka y’Akarwa k’Abakobwa mu Kiyaga cya Kivu

Mu Rwanda rwo hambere, umukobwa watwaraga inda itateguwe yacibwaga mu muryango, akajugunywa mu birwa by’ikiyaga cya Kivu cyangwa ahandi kugira ngo hakurweho amahano n’igisebo yabaga ateje mu muryango we.

Uwo mukobwa ujugunywe ku Karwa k’Abakobwa yabaga yibagiranye burundu, bityo abamuzi n’abamukundaga ntibongere kumuca iryera kuko atigeraga agaruka.

Kuva hambere, havuzwe byinshi ku bakobwa batwaraga inda zitateguwe bakajya kujugunywa iyo zitanywera.

Ababyeyi babo cyangwa abavandimwe, nta wongeraga kugira icyo abavugaho kuko batigeraga bagaruka kubatesha umutwe. Bivugwa ko iyo abo bakobwa bajugunywaga, baribwaga n’impyisi.

Gutwarira inda mu rugo mu muryango Nyarwanda hambere byari ikizira rwose, ndetse byari umuvumo, kuko byatumaga barumuna b’uwo byabayeho batarongorwa, kubera igisebo yabaga yambitse umuryango we.

Amateka asobanura ko abakobwa batinyaga cyane gutwara inda batarashaka kuko iyo byamenyekanaga ko batwite, byatumaga bahabwa akato, ibyari urukundo bigahinduka urwango ruvanzemo amarira.

Batekerezaga ko kujya kujugunywa cyangwa kurohwa mu Kivu ari inzira y’umusaraba n’agahinda gakurikirwa n’urupfu, bagatinya kugira imishyikirano n’abasore, aka wa mugani ngo “imbeba yakurikiranye akaryoshye mu nsi y’ibuye ihakura inda y’akabati”.

Mu mayira atandukanye yerekeza ku Kivu, wasangaga abagabo b’inkorokoro bitwikiriye ijoro bagiye guta abakobwa batwaye inda badafite abagabo.

Bitewe n’aho baturutse, benshi bakoraga ingendo ndende, bamwe bakamara iminsi n’iminsi kugira ngo bazagere ku ‘AKarwa k’Abakobwa’ mu Kivu.

Kuva nko mu Bwanacyambwe werekeza mu Kinyaga byari urugendo rutisukirwa ariko abajya kujugunya umukobwa barugendaga nta yandi mahitamo kugira ngo bikureho ikimwaro.

Byavugwaga ko nyuma yo kujugunywa, abo bakobwa bahindukaga umuhigo w’amenyo y’impyisi, bakaba bagiye buheriheri nk’amahembe ya nkungu.

Nubwo byateraga inkumi gutinya abasore ndetse bamwe bakabazinukwa, inda zitateguwe zitwaga iz’indaro icyo gihe ntizigeze zicika.

Kuroherwa ku Karwa k’Abakobwa byabaga ari nk’ikimenyetso cy’ibihano bigenerwa abantu bitwara nabi mu muryango nyarwanda, aho umubyeyi wonkeje yemera ko umwana we ajya gutabwa mu Kivu, akaruca akarumira.

Igitangaje ni uko kuva kera, nta wigeze avuga ko yaba yarigeze abona aho abajugunywe baririwe n’izo mpyisi. Ubwo byagendaga bite?

Abashi babaye ba mucutse umumpe…

Mu Kiyaga cya Kivu, hari uturwa twinshi abakobwa baroherwagaho, ariko ahazwi cyane ni ku ‘Karwa k’Abakobwa’ mu Karere ka Nyamasheke, Intara y’Uburengerazuba, akaba ari na ho izina ‘Nyamasheke’ nyir’izina rikomoka.

Hari n’akandi karwa gaherereye mu Karere ka Karongi hafi y’Akarwa k’Amahoro, aho bajugunyaga abo bakobwa bamaze gukora urugendo rurerure mu bwato, kugira ngo bazaribwe n’inyamaswa z’inkazi n’inzoka zifite ubumara bwica.

Abakobwa batabwaga aho hantu ntibaribwaga n’impyisi nk’uko bamwe babyibwira.

Habaga hari abantu biganjemo abashi bakomoka ku Kirwa cya Idjwi cyangwa i Bushi n’i Bunyabungo (ubu ni mu gihugu cya Repubulika Iharanira Demokarasi ya Congo) bahoraga barekereje ngo barebe ko hari umukobwa wajugunywa hafi aho mu kirwa ngo baze bamwitwarire.

Kuva na kera, Abashi bari bazi ko u Rwanda rugira abakobwa bafite uburanga, ibyo gutabwa kuko batwite inda z’indaro byari byiza kuri abo Bashi, kuko byatumaga batunga Abanyarwandakazi b’uburanga kandi batakoye.

Ni yo mpamvu usanga hari Abanyarwanda bafitanye amasano n’abaturage bo hakurya y’amazi (Kivu), kubera urwo ruhererekane runyuze mu nda zatewe abakobwa b’Abanyarwanda zikabyarirwa iyo i Bushi n’i Bunyabungo.

Ndetse usanga n’ururimi rw’Amahavu rukoreshwayo rufitanye isano n’Ikinyarwanda,ku buryo iyo baruvuga ugira ngo ni Ikinyarwanda kigoretse.

Ubundi mu myumvire y’Abanyarwanda b’icyo gihe, gutabwa ku Karwa k’Abakobwa byari ugutanga igihano cy’intangarugero ku bakobwa batwara inda zitateguwe, bikaba n’umwitangirizwa ku bana bakiri bato kugira ngo batazazitwara.

Teta Diana yasuye ‘Akarwa k’abakobwa’ mu Kivu aho abatewe inda zitwaga iz'indaro barohwaga
Teta Diana yishimiye ko ubu 'Akarwa k'abakobwa' kabaye amateka kimwe n'ibyahakorerwaga
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza