IGIHE

Ibitaravuzwe kuri Asinah: Rutahizamu wa ruhago, umubyinnyi rurangiranwa n’umukinnyi wa filime wongeye kubyubura

0 20-11-2020 - saa 20:58, Nsengiyumva Emmy

Mukasine Asinah wamenyekanye mu muziki nka Asinah Erra ni umuhanzikazi wamamaye kuva mu 2015, uyu benshi ntibazi neza amateka ye n’imyidagaduro kuko hari abamubonera mu gicucu cy’urukundo rw’imyaka hafi umunani yamaranye na Riderman.

Usibye kumenyekana mu muziki, Asinah kuri ubu yinjiye muri filime ndetse byatunguye benshi kuko atamenyerewe muri urwo ruhando.

Mu kiganiro na IGIHE, Asinah yahishuye bimwe mu byo benshi batari bamuziho birimo kuba yarabaye umukinnyi wa ruhago, umubyinnyi w’umwuga ndetse n’umukinnyi wa filime.

Yabaye rutahizamu ukomeye mbere yuko areka umupira wari umaze kumurarura

Ubwo yigaga mu mashuri yisumbuye, Asinah yari umubyinnyi mwiza, ariko ukundwa mu kigo kubera gukina umupira w’amaguru.

Uyu mukobwa wize muri Fawe Girls School, ubwo yari mu wa gatanu w’amashuri yisumbuye yari yarihebeye ruhago ku buryo yari itangiye kumubuza gukurikira neza amasomo.

Ati ”Nari umukinnyi wa Football, kenshi wasangaga nagiye Kagugu gukina umupira kuko njye banyemereraga kujya hanze gukora siporo.”

Uyu muhanzikazi yakinaga nka rutahizamu utajya utahira aho mu mikino ikigo cyabo cyakinnye.

Asinah wari warihebeye ruhago, yabonye ishobora kumubuza gutsinda neza ikizami cya Leta ahitamo guhindura ikigo ndetse no gukina arabihagarika.

Ati ”Byabaye ngombwa ko numvikana na data, ansabira ishuri njya kwiga kuri APRED-Ndera kuko nabonaga umupira ushobora kumbuza kwiga.”

Akigera kuri iki kigo gishya yari agiye kwigaho, Asinah yashyize ku ruhande iby’umupira akurikirana amasomo ayashyizeho umutima.

Gushyira ku ruhande umupira byatumye aha umwanya indi mpano yari afite yo kubyina.

Asinah yabaye umubyinnyi rurangiranwa

Asinah wari umubyinnyi mwiza kuva muri FAWE ageze no muri APRED-Ndera yakomerejeho.

Abifashijwemo n’umuvandimwe w’umukobwa bari inshuti, Asinah yisanze mu itsinda ryamenyekanye cyane ‘Hotside’.

Iri tsinda ryabyinnyemo abantu banyuranye b’amazina akomeye mu Rwanda barimo Rafiki Coga Style, Kamichi n’abandi.

Uyu mukobwa yahuzaga kubyina no kwiga, ubwo yari ku ishuri muri APRED abahanzi bajyaga kuhakorera ibitaramo bakundaga kumwiyambaza mu gushimisha abanyeshuri.

Uku niko byagenze ubwo Ishimwe Dieudonné uzwi nka Prince Kid, yajyaga muri iki kigo gutaramirayo akahabona umukobwa uzi gukaraga umubyimba.

Ibi byatumye amurangira Riderman nk’umukobwa wari gutoza ababyinnyi bagombaga gufasha uyu muraperi mu gitaramo yateguraga.

Uyu mukobwa ageze aho bitorezaga, yasanze ababyinnyi Riderman yari afite bari ku rwego rwo hasi abirukana bose, azana abanyeshuri yari yarasize muri FAWE Girls School.

Uko imikoranire ya Asinah na Riderman yashibutsemo urukundo rukomeye

Guhura kwa Asinah na Riderman no gukorana byabaye imbarutso y’urukundo rwabaye ikimenyabose mu bakurikiranira hafi imyidagaduro mu Rwanda.

Iyo uganiriye neza na Asinah, akubwira ko Prince Kid ariwe wihishe inyuma y’urukundo rwaje kumara imyaka umunani uyu mukobwa yakundanyemo na Riderman.

Nubwo ariko atari ibintu aba yifuza kwinjiramo cyane, Asinah avuga ko Riderman atariwe muhanzi bari bakundanye bwa mbere kuko yari yarabanje kubyumva kimwe na Nazil wo mu itsinda rya Family Squad.

Asinah yavuze ko igihe yakundanaga na Riderman yari yaramaze gutandukana na Nazil kuko we bakundanye yiga mu mwaka wa Kane w’amashuri yisumbuye nubwo atari ibintu byamaze igihe kinini.

Avuga ku rukundo rwe na Nazil, Asinah yagize ati ”Byari ubwana, uribuka ko nakubwiye ko nari nkiga mu wa Kane w’amashuri yisumbuye. Si ibintu navuga ko byamaze igihe rwose.”

Kugaragara muri filime si iby’ubu, sinema yayinjiyemo mu 2013

Mu minsi ishize Asinah wari umaze kubaka izina mu muziki yaratunguranye yinjira no muri sinema.

Kuri ubu uyu mukobwa agaragara mu gace ka 26 muri filime y’uruhererekane “Umuturanyi” ya Clapton Kibonge.

Nubwo benshi batekereje ko iyi ari yo filime ya mbere akinnyemo, Asinah yavuze ko yinjiye muri sinema mu mwaka wa 2013.

Iki gihe yakinnye muri filime zitandukanye zirimo iyitwa "Umuringa" yakinanyemo n’umuraperi NPC, n’abandi banyuranye, ariko inyinshi ntabwo zigeze zisohoka.

Kwinjira muri iyi filime Umuturanyi, Asinah avuga ko ari ukubyutsa impano ye yari yararyamishije.

Ati ”Hari igihe nigeze kubaza Clapton nti kuki umpfusha ubusa ntuzi ko ndi umukinnyi wa filime? Twakomeje kujya tubiganiraho kugeza ejo bundi dukoze iriya.”

Nubwo amasezerano y’imikoranire ataranozwa neza, Asinah avuga ko azagaragara igihe kinini muri iyi filime.

Asinah avuga ko nubwo yinjiye muri filime bitazamubuza gukora n’umuziki ndetse nyuma y’igihe atagaragara, kuri ubu ari gutegura ibikorwa byinshi birimo gusohora indirimbo nyinshi.

Ikiganiro na Asinah

Asinah winjiye muri filime avuga ko atari mushya muri Sinema Nyarwanda
Uyu mukobwa ngo akiga mu mashuri yisumbuye yari umukinnyi mwiza wa ruhago
Asinah yabaye umubyinnyi rurangiranwa wananyuze mu itsinda rya Hotside
Usibye gukina filime Asinah avuga ko agiye no gusubukura ibikorwa bya muzika
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza