IGIHE

Gisimenti: Hari gutangwa udukingirizo n’udukoresho two kwipima SIDA ku buntu

0 22-06-2022 - saa 14:38, Nsengiyumva Emmy

Muri ibihe u Rwanda ruri kwakira abashyitsi bitabiriye CHOGM kimwe mu byashyizwemo imbaraga ni ugutegura aho bazajya bataramira mu gihe inama zirangiye.

Aha mbere hatekerejweho ndetse hari kubera ibitaramo buri munsi ni muri Car Free zone y’i Remera ahazwi nko ku Gisimenti ndetse no mu Biryogo i Nyamirambo.

Abamaze iminsi bitabira ibitaramo bya Kigali People’s Festival by’umwihariko ibiri kubera ku Gisimenti, bakunze kubona utuzu dutangirwamo udukingirizo n’ibikoresho byo kwipima SIDA.

Muri utu tuzu twa AHF Rwanda, haba hari umukozi w’iki kigo uba wakira ababagana akabaganiriza kuri gahunda zo kwirinda SIDA, akabasobanurira uko ibikoresho agiye kubaha bikoreshwa.

Aha abagana iki kigo basobanurirwa uko bakoresha udukingirizo ndetse n’udukoresho twifashishwa mu kwipima SIDA mbere yo gukora imibonano mpuzabitsina, kugira ngo mu gihe kwifata byaba bigoranye babe baryamana ariko buri wese azi uko mugenzi we ahagaze.

Mu kiganiro n’umukozi w’iki kigo twasanze muri aka kazu batangiramo ibi bikoresho, yahishuye ko ikintu kibashimisha ari uko urubyiruko rwatangiye gutinyuka kwiga ibijyanye n’ubuzima bw’imyororokere.

Ati “Kimwe mu bintu twe turi kwishimira ni umubare munini w’urubyiruko rutugana rurimo urwifuza kwiga ibijyanye n’ubuzima bw’imyororokere ndetse ukabona ko batagitewe isoni no guhabwa ibikoresho byo kurinda ubuzima bwabo.”

Uyu mukozi yavuze ko bahisemo gutera ihema ku Gisimenti kuko babonaga ko hagiye gukoranira urubyiruko ruzaba rwitabiriye ibitaramo biri kuhabera.

Ntabwo uyu mukozi yifuje kutubwira umubare w’abamaze kubagana mu minsi ibiri bamaze bari gukorera mu bitaramo ndetse n’ibikoresho bamaze gutanga, yavuze ko bashobora kuzatanga imibare nyayo ubwo ibi bitaramo bizaba birangira.

Icyakora ku rundi ruhande yavuze ko bari kwishimira umubare munini w’abakomeje kubagana.

AHF Rwanda yateye amatako ku Gisimenti ahari kubera ibitaramo bya Kigali People's Festival
Ku kazu ka AHF Rwanda hari gutangirwa udukingirizo tw'ubuntu
Udukoresho twifashishwa mu kwipima SIDA natwo turi gutangwa ku buntu
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza