IGIHE

Gen Muhoozi yinjiye mu kibazo cya Sheebah ushinja umuntu ukomeye muri Uganda kumuhohotera

0 13-05-2022 - saa 12:57, Uwiduhaye Theos

Lt Gen Muhoozi Kainerugaba yinjiye mu kibazo cy’umuhanzikazi Sheebah Karungi ushinja umwe mu bantu bakomeye muri Uganda kumukorera ihohoterwa rishingiye ku gitsina.

Uyu muhanzikazi ni we wabanje kujya ku mbuga nkoranyambaga avuga ko hari umuntu ukomeye wamusanze mu modoka asinziriye akamuhohotera.

Sheebah mu butumwa yashyize kuri Twitter buherekejwe n’amashusho yanditse agira ati “Sinitaye ku byo utekereza iyo uri kumbona ku rubyiniro cyangwa mu mashusho runaka yanjye y’indirimbo bitewe n’uko mba nambaye.”

“Byaba byiza wubashye umubiri wanjye. Ni uwanjye, nawukoresha icyo nshaka ariko wowe ntabwo ubyemerewe. Ushobora kureba ariko ntabwo kunkoraho ubyemerewe.”

Uwo muntu ngo yakorakoye Sheebah kugeza aho yifashishije abarinzi be akamukora mu gitsina ku gahato.

Iyi nkuru ikijya hanze, hari abatunze agatoki umunyamakuru Andrew Mwenda, bavuga ko ariwe wakoreye ibi Sheebah ku wa 23 Mata 2022, ubwo Lt Gen Muhoozi Kainerugaba usanzwe ari Umugaba w’Ingabo za Uganda zirwanira ku butaka, yizihizaga isabukuru y’imyaka 48.

Muhoozi yanditse kuri Twitter agaragaza ko mu itohoza yakoze yasanze Mwenda arengana.

Ati “Nasomye ibitekerezo byanyu byose kuri Sheebah. Mu by’ukuri nabajije byimazeyo umuvandimwe Andrew Mwenda ambwira ko atarahura na rimwe n’uyu mukobwa. Rero aya makuru ni ibihuha bindi bije.”

Mwenda mu butumwa burebure yashyize nawe kuri Twitter, yanditse agaragaza ko yavuganye na Muhoozi akamusezeranya kuvugisha Sheebah, ndetse uyu mukobwa agahabwa uburinzi bwose bushoboka kugira ngo ashire ubwoba avuge uwo muntu wamuhohoteye.

Yakomeje avuga ko uyu muririmbyi nta gihunga afite ku buryo yakorana na polisi uyu mugizi wa nabi agatabwa muri yombi.

Ati “Kugeza ubu navuganye n’Umuyobozi w’Ishami rya Polisi rishinzwe Ubugenzacyaha, CID yemeye gufungura ikirego kugira ngo hamenyekane uwahohoteye Sheebah Karungi. Polisi igiye kumuhamagara imusabe kuvuga uwo muntu.”

Ku rundi ruhande ariko umunyamakuru Daniel Lutaaya wa NBS TV yagaragaje amafoto ya Sheebah, avuga ko aheruka no kuririmba mu isabukuru ya Gilbert Bukenya, wabaye Visi Perezida wa Uganda bityo ari aho abantu bakwiriye gukeka ko bishoboka ko ariho icyaha cyabereye.

Kugeza ubu abantu baracyari mu rujijo kuko umuntu wa nyawe wahohoteye Sheebah ataramenyekana.

Sheebah yavuze ko abantu badakwiriye kuririra ku myambarire ye ngo bamuhohotere
Gen Muhoozi yinjiye mu kibazo cya Sheebah ushinja umuntu ukomeye mu gihugu kumuhohotera
Andrew Mwenda yahakanye guhohotera Sheebah Karungi
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza