IGIHE

Uko Social Mula yakiriye gutsindwa muri Prix Decouvertes (Video)

0 8-11-2019 - saa 15:07, Nsengiyumva Emmy

Kuri uyu wa Kane tariki 7 Ugushyingo 2019 ubwo hatangazwaga uwatsinze amarushanwa ya Prix Decouvertes2019, Céline Banza niwe wahigitse abandi icyenda bo muri Afurika barimo na Social Mula wo mu Rwanda wari wageze mu cyiciro cya nyuma cy’irushanwa.

Ubwo hatangazwaga uwatsinze, IGIHE twari twagendereye Social Mula wakurikiranye uyu muhango wacaga Live kuri Facebook ya Prix Decouvertes ubona yifitiye icyizere, ariko agera aho akizigama cyane kuko yari yaramaze kwakira ko ari ibintu byashoboka cyangwa ntibishoboke.

Bakimara gutangaza uwatsinze, Social Mula yabwiye IGIHE ko yakiriye neza ibivuye mu irushanwa, yongeraho ko n’uwatsinze yari abikwiye.

Aha yagize ati” Mbyakiriye neza nkuko n’ubundi nari niteguye kubyakira biramutse bibaye, ugitwaye yari abikwiriye na we. Nari niteguye gutsinda cyangwa kuba nakwakira kuba ntatsinda.”

Social Mula ahamya ko buri muhanzi mu icumi bahatanaga yari afite amahirwe gusa Céline Banza ni we wagize amahirwe yo kwegukana igikombe.

Nyuma yo gutsindwa Social Mula avuga ko ubu agiye gushyira imbaraga mu muziki we, by’umwihariko igitaramo ari gutegura cyo kumurika Album ye ya mbere yise “Ma vie” azakora tariki 23 Ugushyingo 2019.

Uyu muhanzi yijeje abakunzi b’umuziki kuzabona igitaramo cyiza bitewe nuko ari ibintu yafatiye umwanya akabitegura yitonze.

Social Mula yongeyeho ko kuba atatwaye igikombe bitamuciye intege, ati” Ntabwo ncitse intege, nibyo iyo ntwara igikombe hari amahirwe nari kuba mbonye atabonetse. Ariko ntabwo bihagaritse umuziki wanjye kuko amahirwe ahari ni menshi.”

Iki gikombe cyacitse Social Mula mu gihe iyo agitwara byari kuba ari ibirori mu bindi cyane ko yiteguraga kwizihiza isabukuru ye y’amavuko kuri uyu wa Gatanu tariki 8 Ugushyingo 2019.

Reba ikiganiro twagiranye na Social Mula ubwo yari amaze gutsindwa muri Prix Decouvertes

Reba indirimbo ’Warakoze’ imwe mu zikunzwe muri iki gihe za Social Mula

Social Mula amaso agiye kuyahanga igitaramo cyo kumurika Album ye ya mbere "Ma vie"
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza