IGIHE

Ben Nganji yakoze indirimbo yakomoye ku wakoze impanuka umugenzi akihutira kumufotora aho kumutabara

2 7-11-2019 - saa 19:45, Uwiduhaye Theos

Bisangwa Nganji Benjamin, umuhanzi w’injyana ya Reggae, wamamaye nka Ben Nganji yakoze indirimbo yakomoye ku myitwarire y’abantu b’iki gihe ahanini yahinduwe no gukoresha imbuga nkoranyambaga.

Iyi ndirimbo Ben yayise ‘Bagore Beza’ iri mu njyana y’ikinimba. Mu buryo bw’amajwi yakozwe na Jimmy Pro.

Mu gitero cyayo cya mbere aragira ati “Inkeshamasura y’imbuga nkoranyambaga yabaye umuhuza n’umuranga w’abasore, umukobwa wakunze nyirasenge ubu ni Google. Abantu bose ubu babaye abanyamakuru ugwa mu kaga aho kugutabara bagafotora.”

Mu nyikirizo yayo ho asaba abagore gufata iry’iburyo kuko abantu batannye, ati “Bagore beza (yemwe bagore beza b’u Rwanda), bagore beza (mufate iry’iburyo mudutabare), ntumire inteko y’abasizi, baba bakecuru n’abasaza […]”

Ben Nganji yabwiye IGIHE ko ajya gukora iyi ndirimbo byaturutse ku mugenzi n’umumotari yabonye bakoze impanuka, uwari utwaye moto ikamuryamira umugenzi aho kumutabara agatangira kwifatira amafoto.

Yakomeje ati “Nabonye umugenzi wari utwawe n’umumotari, moto irabagusha, iryamira umumotari, wa mugenzi aho kuyimweguraho aramufotora . Iki kintu nicyo cya mbere cyanteye gutekereza iyi ndirimbo kuko byarambabaje bituma mutuka. Wa wundi wari uri hasi tuyimweguraho, nababajwe n’uko uwo mugenzi yari yambaye ikote mu mubiri mu mutwe yambaye ubujiji.”

Akomeza avuga ko bibabaje kubona umuntu yifata ifoto yakomeretse kugira ngo abone ibyo ashyira kuri WhatsApp.

Ben Nganji avuga ko iyi ndirimbo ari impuruza itabariza urubyiruko rumaze kuva mu murongo nyawo ujyanye n’indangagaciro z’umuco Nyarwanda.

Ati “Ni indirimbo y’impuruza itabariza urubyiruko rumaze gutana. Instagram yo ntiwareba abantu bashyiraho ibipfuye amaso. Mbabazwa n’ukuntu abantu bamamara kuko bamamaza ibidushora mu manga . Nararebye nsanga izi mbuga zimaze kugira abantu benshi imbata , nta watinya kuvuga ko hari ababaye ibyohe.”

Uyu mugabo yamamaye mu ndirimbo zitandukanye zirimo “Mbonye umusaza”, “Nsazanye inzara”, “Rehema”, “Habe n’akabizu” n’izindi.

Uretse kuririmba, Ben Nganji yamamaye no mu nkirigito. Iyi ni inganzo y’umwihariko yahimbye, ni izinga rizingiyemo igitwenge gituruka mu ruhererekane rw’amagambo, ahindagurikira mu nteko z’amazina. Inkirigito itera gutwenga, ikubiyemo inyigisho haba izo mu Rwanda no mu bindi bice by’Isi, haba mu gihe cyashize n’ikizaza.

Ben Nganji yakoze indirimbo yakomoye ku mumotari wakoze impanuka umugenzi akihutira kumufotora aho kumutabara
Ben Nganji yamamaye mu nganzo ye yise Inkirigito
Ben Nganji na Natty Dread bafitanye umushinga w'indirimbo bateganya gusohora
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Assumpta 2019-11-08 22:47:48

Nganji, Imana ikomeze gushyigikira inganzo yawe, turakwifuriza gutera imbere, uri umuhanga ndabizi uzabigeraho

2
Masengesho 2019-11-08 09:32:26

Indirimbo zanyu zirubaka Imana ibagende imbere

Kwamamaza