IGIHE

Bamwe mu Banyarwanda bamaze kubaka ibigwi ku Isi mu mikino n’imyidagaduro

6 11-07-2019 - saa 14:42, Muvunyi Arsène

Ababaye ibihangange mu muziki abenshi ni abakomoka mu bihugu byo muri Amerika, abo twumva banditse amateka muri ruhago abenshi bakomoka ku mugabane w’u Burayi na Amerika y’Epfo, kandi bateye ishema ab’iwabo.

Muri Afurika naho barahari n’ubwo atari benshi cyane. Muri Sénégal hakomoka icyamamare muri muzika Akon n’umukinnyi uzi kureba mu nshundura Sadio Mane, naho Samuel Eto’o Fils yazamuye ibendera rya Cameroon n’abandi benshi.

Nubwo u Rwanda rutaratera imbere cyane mu bice by’imyidagaduro, hari abana barwo bamaze kwerekana impano ndetse zibagira ibyamamare bihanzwe amaso n’Isi yose.

-  Stromae

Stroame ubusanzwe yitwa Paul van Haver yavutse mu 1985, avukira mu Bubiligi ku mugore witwa Miranda Marie Van Haver n’Umunyarwanda Rutare Jean Pierre, wishwe muri Jenoside yakorewe Abatutsi mu 1994.

Ni umuhanzi ukomeye, indirimbo ze zikundwa bikomeye mu bihugu byinshi cyane cyane ibivugwamo ururimi rw’Igifaransa dore ko ari nacyo akunze gukoresha.

Mu 2009 nibwo yatangiye kumenyekana cyane ubwo yasohoraga indirimbo yise ‘Alors on Dance’ iri kuri alubumu ye yise ‘Cheese’.

Mu 2013 yakoze alubumu ya kabiri yise Racine Carrée aho yabashije kugurisha kopi miliyoni ebyiri mu Bufaransa honyine.

Iyi album iriho indirimbo nka “Papaoutai” yakoreye se witabye Imana akiri muto, Formidable n’izindi.

Stroame ukomoka ku Munyarwanda yigeze gutaramira i Kigali

Yakoze ibitaramo bitandukanye ku Isi, harimo n’icyo yakoreye mu Rwanda mu Ukwakira 2015, ndetse anashimangira ko ari Umunyarwanda. Icyo gihe yazanye nyina ndetse basura aho umuryango wa se wari utuye.

Stromae afite umuvandimwe witwa Cyusa Ibrahim na we ukora umuziki gakondo.

-  Sonia Rolland

Sonia Rolland Uwitonze ni Umufaransakazi wabyawe n’umugabo w’Umufaransa witwaga Jacques Rolland n’Umunyarwandakazi Landrada Rolland.

Yavukiye mu Rwanda mu 1981 aza kuhava nyuma y’imyaka 10 ubwo ababyeyi be bari bahunze.

Mu 2000 yegukanye ikamba rya Nyampinga w’u Bufaransa, aba Umunyafurika wa mbere uciye ako gahigo. Yanahagarariye u Bufaransa mu marushanwa ya Miss Universe. Kuri ubu ni umwe mu bagore bakomeye mu mwuga wo gutunganya filime ku mugabane w’u Burayi.

Akunda kuza mu Rwanda cyane, mu bikorwa binyuranye harimo ibyo gukora filime no gukurikirana ibikorwa by’umuryango ufasha abana batishoboye witwa Maisha Africa.

Sonia Rolland yabaye Nyampinga w'u Bufaransa mu 2000

-  Somi

Ubusanzwe yitwa Laura Kabasomi Kakoma afite imyaka 37. Aba muri Amerika ariko avuka ku Munyarwanda n’Umunya-Ugandakazi.

Uyu mukobwa ni icyamamare mu njyana ya Jazz akaba ari nawe Munyarwanda wa mbere wasinye amasezerano muri kompanyi ifasha abahanzi ya Sony.

Mu mwaka ushize yegukanye igihembo gikomeye mu cyiciro cy’abakoze album zifite umwihariko mu njyana ya Jazz muri NAACP Image Awards.

Aheruka mu Rwanda muri Gashyantare 2018 aho yakoreye igitaramo muri Marriott Hotel, cyanitabiriwe na Madamu Jeannette Kagame.

Somi afite ubuhanga mu muziki wa Jazz

-  Sherrie Silver

Uyu ni umukobwa wavukiye mu Karere ka Huye mu 1994, se apfa habura ukwezi kumwe ngo avuke. Mu 1999 we na nyina bimukiye mu Bwongereza ari naho baba kuri ubu.

Ku myaka ye 25 Sherrie Silver ni umwe babyinnyi bahanzwe amaso ku Isi nzima. Ni we wayoboye imbyino ziri mu mashusho y’indirimbo ya Childsh Gambino yitwa “This is America”, byatumye ihabwa igihembo cya MTV Video Music Awards 2018.

Yifashishijwe kandi muri filime yitwa “Guava Island” ya Rihanna na Childish Gambino, ni we wayoboye imbyino ziri mu mashusho ya One Republic yitwa “Rescue Me”, Joanna ya Afro B na French Montana n’izindi nyinshi.

Izina ry’uyu mukobwa ryagaragaye ku rutonde rw’Abanyafurika bakiri bato 100 bavuga rikijyana mu 2018.

Mu ntangiriro z’uyu mwaka yasinye amasezerano yo kwamamaza inkweto za siporo zikorwa n’uruganda rwa Nike. Yagizwe kandi Ambasaderi w’Ikigega Mpuzamahanga cy’Iterambere ry’Ubuhinzi (IFAD).

Sherrie Silver ni we Munyarwandakazi wabashije kwegukana igihembo cya MTV Video Music Award

-  Ncuti Gatwa

Uyu musore w’imyaka 26 avuka ku babyeyi b’Abanyarwanda ariko yakuriye muri Ecosse. Ni umuhanga mu gukina filime wabyigiye mu Ishuri The Royal Conservatoire ryo muri icyo gihugu, aho yabonye impamyabumenyi mu by’ubuhanzi mu gukina filime mu 2013.

Muri uyu mwaka nibwo yamamaye cyane ku Isi bitewe na filime yagaragayemo yitwa Sex Education ica kuri Netflix.

Iyi filime yatumye Ncuti Gatwa ashyirwa mu bahataniye ibihembo bya MTV Movie & TV Awards 2019 ariko ntiyabasha gutsinda.

Ikinyamakuru cya Elle giherutse kumushyira ku rutonde rw’urubyiruko 50 ruri kuzana impinduka ku Isi.

Ncuti Gatwa amaze kwamamara kubera gukina filime

-  Corneille Nyungura

Corneille Nyungura ni umwanditsi akaba n’umuririmbyi uba muri Canada. Ni igihangange mu njyana ya R&B cyane cyane mu bihugu byiganjemo abavuga Igifaransa.

Yavutse ku babyeyi b’Abanyarwanda aribo Nyungura Emile na Nyirafaranga Ephrasie bitabye Imana mu 1994. Icyo gihe Corneille yahise ajya kuba mu Budage nyuma akomereza muri Canada aho aba n’abandi bavandimwe be.

Yamenyekanye cyane mu ndirimbo nka “Parce Que On Vient de Loin”, “Avec Classe”, “Seul Au Monde”, “Les Sommets De Nos Vies” n’izindi nyinshi.

Akomoka ku musozi wa Nyanza ubu ni mu Karere ka Huye ahitwa Gitwa mu Kagari ka Rukira aho se yari yarubatse mbere y’uko yimukira mu Mujyi wa Kigali.

Corneille Nyungura ni umuhanzi uzwi na benshi ku Isi

-  Tuma Basa

Ubusanzwe yitwa Tumaine Basaninyenzi ariko azwi cyane nka Tuma Basa. Ni umwe mu bantu bagize uruhare mu iterambere ry’abahanzi bakomeye muri Amerika.

Afite ubunaribonye mu bijyanye no gucuruza umuziki aho yakoreye ibigo bikomeye birimo Spotify, kuri ubu akaba ari umwe mu bayobozi bakuru b’urubuga rwa YouTube aho ashinzwe Ishami rya Urban Music.

Yatangiye kwinjira mu byerekeye ubucukumbuzi no guteza imbere Hip Hop ubwo yakoraga muri BET, mu gice cya muzika, kuva agisoza amashuri yisumbuye.

Nyuma yo kuva kuri BET yakoreye MTV mu mashami atandukanye aho yayoboraga abapanga imiziki icurangwa.

Tuma Basa yafashije inshuti ye Sean “Puff Daddy” Combs gutangiza Televiziyo ya REVOLT, icyo gihe yahise agirwa Visi Perezida mu Ishami rya Music Programming.

Tuma Basa akorana n'abahanzi bakomeye ku Isi

-  Frank Ntilikina

Frank Bryan Ntilikina ni umusore ukina Basket Ball, kuri ubu akina muri Shampiyona y’Umukino wa Basket Ball muri Amerika (NBA) mu Ikipe ya New York Knicks yagiyemo mu 2017 avuye mu ikipe ya SIG Strasbourg yo mu Bufaransa.

Uyu musore ukomoka ku babyeyi bose b’Abanyarwanda, yavukiye mu Bubiligi mu 1998, akaba afite ubwenegihugu bw’u Bufaransa. Ni we Munyarwanda wa mbere wanditse amateka yo gukina muri NBA.

Frank Ntilikina yabaye uwa mbere ukomoka mu Rwanda ukinnye muri NBA

-  This America igaragaramo Sherrie Silver

-  Ncuti Gatwa muri filime ya Sex Education

-  Stromae ubwo yataramiraga mu Rwanda ku nshuro ya mbere

Somi aherutse gukora igitaramo cyitabirwa n'uwahoze ayobora Liberia
Stromae n'umuvandimwe we Cyusa Ibrahim uba mu Rwanda
Tuma Basa n'ababyeyi be b'Abanyarwanda
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Christian 2019-07-12 14:37:31

muzashake uwitwa Marie Ndutiye ninja mwirebere we ateye ubwoba abyinira aba star muzi bakomeye akabigosha no kubyina.

2
Gi 2019-07-12 04:07:04

Hari nabandi benshi hari ukina mu makinamico akomeye yo mu bufaransa yitwa GaëlKamilindi , ndumva ubu ari no mu Rwanda muzashakishe amateka ye muza mumenya byimazeyo

3
babel nim 2019-07-12 00:21:34

na Lokua kanza nyina ni umunyarwandakazi kandi ni icyamamare ku isi

4
lunanga 2019-07-11 18:23:29

hari umwana witwa trezzo mahoro ukina film muro holywood numuhanga cyane arikuzamuka neza mumaserie meza akunzwe mwamushaka nawe

5
Majyambere 2019-07-11 16:55:29

Ntago abo ba metis ari abanyarwanda,umunyarwanda ni ufite se na nyina b abanyarwanda,ubunyarwanda ni amaraso bisobanura bene Kanyarwanda ntago rero umunyarwanda n umuzungu babyara umunyarwanda ubwo wowe urumva iyo mibare yawe idapfuye?ueo gatwa we kuraho yataye umuco iyo filim yakinnye ni ubutinganyi uwo si umuco wacu iryo ni ico ry abazungu.

6
Brad 2019-07-11 10:39:40

Luaka kanzo

Kwamamaza