Ibyamamare bimaze kubaka izina muri sinema nyarwanda byaserutse ku itapi itukura, ubwo hasozwaga iserukiramuco rya Mashariki Film Festival[MAAF] ryabaga ku nshuro ya cumi.

Ni iserukiramuco ryasojwe nyuma y’icyumweru ryari rimaze riba. MC Lion Imanzi ni we wayoboye ibi birori byari byahuje n’umuhango wo kwizihiza imyaka icumi Mashariki Film Festival imaze, ndetse no gutanga ibihembo ku bahize abandi muri sinema yaba mu Rwanda no hanze yaho.

Umuyobozi wa Mashariki Film Festival, Trésor Senga, ubwo yasozaga iri serukiramuco yashimiye abantu bose baryitabiriye. Yavuze ko mu myaka icumi byari urugendo rukomeye.

Ati “Mwakoze kubana natwe twizihiza imyaka 10 tumaze. Ni ukwishimira imyaka 10 tumaze. Iri serukiramuco ryatangiye ari inzozi ndetse ari n’icyerekezo cy’abakora sinema nyafurika. Twishimira intambwe ikomeye tumaze kugenda dutera.”

Yakomeje avuga ko batangira kubona abaterankunga byari bigoye ndetse hari henshi bakomangaga bikanga, ariko bikaba bisigaye bitagoye cyane nka mbere.

Yaboneyeho kwifatanya n’abari bitabiriye kwishimira imyaka 10 ya Mashariki film Festival, bakatana umutsima wo kuyishimira no kwiha intego mu yindi imyaka igiye kuza.

Bamwe mu banyuze ku itapi itukura barimo Dr. Nsabii, Papa Sava, Irafasha Sandrine Reponse wamenyekanye nka Swalla waserutse yambaye bya Kinyarwanda, Mugisha Emmanuel wamenyekanye nka Clapton Kibonge waserutse yambaye bote, afite inkoni yambaye nk’Abakonyine; Bamenya n’abandi batandukanye.

Iri serukiramuco ryari rimaze icyumweru riba, aho ryatangiye ku wa 3 Ugushyingo rigasozwa kuri uyu wa Gatandatu tariki 9 Ugushyingo. Muri iki gihe habereyemo ibikorwa bitandukanye.

Muri ibyo habayeho kwerekana filime ahazwi nko kwa Mayaka ndetse no mu Marangi. Aha herekanwe filime zitandukanye yaba mbarankuru, filime z’uruhererekane, ingufi n’indende z’abantu baturutse mu bihugu bitandukanye ndetse n’izo mu Rwanda.

Habayeho kandi igikorwa cyo kwigisha abashakaga kunguka ubumenyi muri sinema mu buryo butandukanye, yaba kwandika filime, kuzikina, kuzitunganya n’ibindi.

Mu gihe iserukiramuco ryasaga nk’irigana ku musozo, habayeho igikorwa cya Masharket. Uyu akaba ari umushinga ugamije guha amahirwe abakora filime, bahuzwa n’abashoramari muri sinema.

Ubwo ryasozwaga hatanzwe ibihembo ku bantu batandukanye muri sinema. George Kamanayo yahawe igihembo cya ‘Iziwacu Film Pioneer’ nk’umwe mu nkomarume zahirimbaniye sinema muri Afurika.

Ni mu gihe kandi filime mbarankuru nziza yabaye ‘Didy’, umukinnyi wa filime mwiza aba Benimana Ramadhan wamamaye nka Bamenya.

Uw’igitsinagore wahize abandi mu gukina filime neza yabaye Kayitesi Kayonga Yvonne (Tessy) wamamaye muri filime zitandukanye, ariko ubu akaba agezweho mu yitwa ‘Kaliza wa Kalisa’. Igihembo cy’umukinnyi wa filime w’umugore w’ibihe byose cyizwi nka ‘Life Time Achievement Award’ cyahawe Uwamohoro Antoinette wamenyekanye nka Intare y’Ingore.

Igihembo cy’umukinnyi wa filime w’umugabo w’ibihe byose cyahawe Willy Ndahiro. Umukinnyi wa filime zica kuri internet uhiga abandi yabaye Niyonshuti Yannick uzwi nka Killaman, mu gihe uw’umukobwa yabaye Vanessa Irakoze Alliane wamenyekanye nka Maya.

Uyobora ifatwa ry’amashusho ya filime zica kuri internet uhiga abandi yabaye Gratien Niyitegeka uzwi nka Papa Sava, mu gihe uyobora ifatwa ry’amashusho ya filime zica kuri televiziyo yabaye Niyoyita Roger ugira uruhare muri filime nyinshi zica kuri Zacu TV nka ‘Shuwa Dilu’ irimo Dr. Nsabii, Bamenya na Papa Sava.

Clapton Kibonge na we ni umwe mu begukanye ibihembo muri iri serukiramuco yagenewe n’abaritegura. Filime nziza inyura kuri internet yabaye ‘The Forest’ ya Soloba, mu gihe inyura kuri televiziyo nziza yabaye ‘Kaliza wa Kalisa’.

Umukinnyi ukizamuka mwiza w’umugabo yabaye Yannick Nshimirimana uzwi nka Rwema, mu gihe umukobwa ukizamuka uhiga abandi yabaye Bernice Ineza.

KGW Solution Group Ltd nibo bakiriye abitabiriye ibi birori bya Mashariki Film Festival.

Abahawe amasomo muri sinema muri iki cyumweru iserukiramuco rimaze bashimiwe

Abakinnyi batandukanye bazwi muri sinema nyarwanda bafatanye ifoto

Umukinnyi wa filime mwiza yabaye Benimana Ramadhan wamamaye nka Bamenya

Ahatangiwe ibihembo hari huzuye

Bamenya asuhuza abakunzi be

Buri Kantu na Buri Nguni baserutse bambaye imyenda isa

Bamenya n'abakinnyi bakinana bari babukereye

Daniel Gaga na Ruburika Nicole baserukanye

Dogiteri Nsabii yaserukanye na Swalla

Umukinnyi wa filime w’umugabo w’ibihe byose yabaye Willy Ndahiro

Dusabimana Israel uzwi nka Dusabe Busine Israel yaserukanye n'umukobwa we

Gaga Daniel uzwi nka Ngenzi muri sinema ubwo yageraga ahabereye ibi birori

Soloba ubwo yashyirizwaga igihembo cye

Vanessa Irakoze Alliane wamenyekanye nka Maya muri filime y’uruhererekane yabiciye kuri Youtube yabaye umukobwa uhiga abandi muri filime zica kuri murandasi

Ibihembo byatanzwe ni uku byari bimeze

Igihozo Nshuti Mireille uri mu bakinnyi ba filime bagezweho mu Rwanda ntabwo yatanzwe muri ibi birori

Igihozo Nshuti Mireille[uri ibumoso] na Irafasha Sandrine Reponse wamenyekanye nka Swalla bafatanye ifoto

Ineza Kelia Bernice wamamaye muri filime ya Bamenya ni umwe mu bari bitabiriye. Uyu mukobwa yanahawe igihembo cy'umukinnyi wa filime w'umugore uri kuzamuka neza

Ineza Kelia Bernice[uri ibumoso] yaserukanye na Shaffy Rukundo uzwi muri sinema nyarwanda

Irafasha Sandrine Reponse afatana ifoto na Uwamahoro Antoinette

Ingabire Appolinaire wamamaye muri sinema nyarwanda mu myaka yashize aho yakoze filime zakunzwe mu Rwanda zirimo ‘Intare y’Ingore’, ‘Giramata’, ‘Amarira y’Urukundo_ n'izindi ni uku yaserutse

Irafasha Sandrine Reponse wamenyekanye nka Swalla yaserutse mu isura ya Ndabaga

Kanimba yaserukanye na Soleil bakinana muri 'Bamenya'

Killaman ni uku yaserutse

Kibonge yaserutse yambaye nk'abashumba

Killaman n'ikipe bakorana bafatanye ifoto

Killaman uri ibumoso na Dogiteri Nsabii uri iburyo basanzwe bakorana bya hafi bafatanye ifoto

Micky[uri ibumoso] uzwi muri filime zitandukanye yaserukanye na Bunduki utunganya filime

Misago Nelly Wilson watangije ZACU TV[uri ibusmo] na Ishimwe Clement wa Kina Music bari bahuje urugwiro

Niyoyita Roger wamenyekanye mu kuyobora filime zakunzwe mu Rwanda ni uku yaserutse

Papa Idy ni uku yaserutse

Papa Idy wamamaye mu 'Umuturanyi' ubwo yafataga ifoto

Papa Sava atambuka ku itapi itukura

Rufonsina wamamaye muri filime 'Umuturanyi' ni uku yaserutse

Soloba ni uku yatambutse ku itapi y'umutuku

Sonia Kajibanga wamenyekanye mu mashusho y'indirimbo nka 'Zoli' ya Nel Ngabo[ibumoso], Swalla na Intare y'Ingore bafatanye ifoto

Tukowote ni uku yaserutse

Uhereye ibumoso Bamenya, Papa Sava na Dogiteri Nsabii bafanye ifoto

Umukinnyi wa filime zica kuri internet uhiga abandi yabaye Niyonshuti Yannick uzwi nka Killaman

Umuyobozi wa Mashariki Film Festival, Trésor Senga, ubwo yasozaga iri serukiramuco yashimiye abantu bose baryitabiriye, avuga ko mu myaka 10 byari urugendo rukomeye

Umuyobozi wa Mashariki Film Festival, Trésor Senga, yari yaserukanye n'umugore we

Uwamahoro Antoinette[uri iburyo] ni uku yaserutse

Uwamohoro Antoinette wamenyekanye nka Intare y’Ingore ni uku yaserutse yambaye. Aha yabanje gufata ifoto mbere yo gutambuka ku itapi itukura

Uwihoreye Jean Bosco wamenyekanye nka Ndimbati yaserukanye na Igihozo Nshuti Mireille

Uwineza Ruburika Nicole ubwo yafataga ifoto y'urwibutso

Uwineza Ruburika Nicole wamamaye nka Mama Beny muri City Maid afatana ifoto na Swalla

Uyobora ifatwa ry’amashusho ya filime zica kuri internet uhiga abandi yabaye Gratien Niyitegeka uzwi nka Papa Sava

Vanessa Irakoze Alliane wamenyekanye nka Maya[uri iburyo] na Shemaryimanzi Dylan bari baserukanye

Willy Ndahiro ni uku yaserutse

Yannick Nshimirimana wamenyekanye muri sinema nka Rwema ni uku yaserutse