IGIHE

Akari ku mutima wa Nishimwe Naomie nyuma y’umwaka yegukanye ikamba rya Miss Rwanda

0 23-02-2021 - saa 11:17, Uwiduhaye Theos

Ku wa 23 Gashyantare 2020, Nishimwe Naomie n’umuryango we babyiniraga ku rukoma nyuma yaho ari umunsi wabaye utazibagirana mu mateka ye kuko ariwo yegukanyeho ikamba rya Miss Rwanda uwo mwaka.

Uyu mukobwa yari asanzwe azwi cyane ku mbuga nkoranyambaga mu itsinda ry’abakobwa bo mu muryango we, bihaye akazina ka Mackenzies, ariko ntabwo aribyo byari kumuhesha ikamba kuko yari ahanganye n’abandi bakobwa 19 nabo batari boroshye na gato.

Gusa mu rugendo rwose rwa Miss Rwanda mu 2020, iyo abantu bakoraga intonde ku mbuga nkoranyambaga cyangwa se mu biganiro hagati yabo, ntabwo yaburaga mu batanga icyizere ko bashobora kwegukana ikamba.

Ni nako byagenze! Ku wa 23 Gashyantare mu masaha y’igicuku ubwo benshi bari bategereje kumenya umukobwa wegukanye ikamba rya Miss Rwanda, atangazwa ko ari we wahize abandi. Yasazwe n’amararira y’ibyishimo urugendo rwe rutangira ubwo.

Ntabwo uyu mwaka ariko wabaye umwaka woroshye kuri we cyane ko nyuma y’iminsi mike yambitswe iri kamba icyorezo cya Coronavirus cyahise cyugariza Isi yose ndetse u Rwanda kimwe n’ibindi bihugu byinshi rujya muri gahunda ya Guma mu rugo.

N’ubwo ariko bimeze gutyo, yakoze iyo bwabaga mu bushobozi yabashije kugira muri ibyo bihe bitoroshye, agerageza gushyira mu ngiro umushinga ndetse ateganya kuwukomeza mu gihe ibihe byaba bigenze neza mu minsi iri imbere.

Ubu, akanyamuneza ni kose! Uyu mukobwa yishimira ko igihe cy’umwaka amaranye ikamba rya Miss Rwanda hari byinshi yagiye yunguka mu buryo butandukanye. Yanditse ku rukuta rwe rwa Instagram agaragaza ko uyu munsi uvuze byinshi kuri we.

Ati “Umwaka wose mfite ikamba, buri gihe nizereraga mu gihe cya nyacyo cy’Imana. Nshimiye buri umwe wari mu bagize uruhare muri uru rugendo. Ndi umunyamahirwe kugira buri umwe mu buzima bwanjye. Ntabwo ari ibintu nari narigeze ngira mu nzozi zanjye ko nzaba intwari ngahangana n’ibirushya byose nahuye nabyo nkakora ikintu nk’iki. Rero ndashimira ku bw’amayira naharuriwe ndetse n’inzibutso ngiye gusigarana.”

Uyu mukobwa ubu butumwa yabukurikije ubundi yanditse agaragaza ko yishimira aho yavuye, ati “Ntewe ishema n’uko hari hari aho navuye kure, uko narwanye cyane n’ukuntu nakuze cyane nkahinduka undi muntu ukomeye, w’umunyembaraga kandi w’intwari, ndetse nkaba naramaranye ikamba umwaka wose.”

Aya magambo yayakurikije indirimbo yitwa ‘Fight Song’ ya Rachel Platten. Iyi ndirimbo igaragaza ko akantu gato abantu basuzugura gashobora gukora ibitandukanye n’ibyo abantu bagatekerezaho.

Hari nk’aho umuhanzi wayiririmbye agira ati “Nk’ubwato buto ku Nyanja, bwohereza imiraba myinshi. Nk’ukuntu ijambo rimwe rishobora gukingura umutima, nshobora kugira umwambi umwe ariko nkateza uguturika.”

Nishimwe Naomie yinjiye mu irushanwa ahagarariye Umujyi wa Kigali, Igisonga cye cya Kabiri cyabaye Umutesi Denise wari ufite nimero 43 naho Igisonga cya mbere ni Umwiza Phionah wari ufite nimero 47.

Nishimwe Naomie yegukanye ikamba rya Nyampinga w’u Rwanda w’umwaka wa 2020, asimbura Nimwiza Meghan wari ufite iryo yambitswe muri Gashyantare 2019.

Nishimwe w’imyaka 21 yatowe mu birori byabereye mu Intare Conference Arena i Rusororo ku mugoroba wo ku wa 22 ushyira mu rukerera rwo ku wa 23 Gashyantare 2020. Nishimwe yabaye Nyampinga wa munani utowe mu mateka y’u Rwanda.

Nishimwe Naomie ari kumwe n'ibisonga bye
Nishimwe Naomie asoje umwaka aro Nyampinga w'u Rwanda
Byari ibyishimo kuri uyu mukobwa wari ukiri muto ubwo yegukanaga ikamba
Yahise ahabwa imodoka nk'igihembo gikuru
Nyampinga w'u Rwanda, Nishimwe Naomie, yafashe ifoto y'urwibutso ari kumwe na ba Nyampinga bo mu bihugu bitandukanye bitabiriye ibirori yambikiwemo ikamba
Wari umunsi w'amarira avanze n'ibyishimo kuri Miss Naomie
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza