IGIHE

Agakecurini! Ibuka tumwe mu dushya twaranze irushanwa rya PGGSS riherutse guhagarara

2 21-05-2019 - saa 10:44, Uwiduhaye Theos

Niba warakunze irushanwa rya Primus Guma Guma Super Star ryabereye mu Rwanda mu myaka umunani ishize, nta kabuza hari byinshi uryibukiraho birimo ibyiza ndetse n’ibindi bishobora kugutembagaza.

Iri rushanwa ryabaye guhera mu 2011 riza gushyirwaho akadomo mu mwaka ushize ubwo ryegukanwaga na Bruce Melodie.

Ni irushanwa rikomeye ryahuzaga abahanzi bari ku ruhembe rw’umuziki muri buri njyana, buri cyiciro kigatoranywa hakurikijwe amajwi y’abanyamakuru b’imyidagaduro n’aba-Djs.

Niryo rushanwa rukumbi ryabaye mu Rwanda ryatangaga amafaranga afatika ku bahanzi kandi rigaha benshi akazi.

Mu myaka ryabaye ryasize benshi mu bahanzi bagize amahirwe yo kuritwara baraguze imodoka abandi barubatse inzu, ndetse ryanatumye urwego rwa benshi mu bijyanye no gucuranga live rugero hejuru.

IGIHE yakusanyije tumwe mu dushya twabaye mu irushanwa benshi bazajya baryiburakiraho

-  Tom Close yatwaye igihembo amabuye avuza ubuhuha

Ku nshuro ya mbere Primus Guma Guma Super Star yabaye mu 2011. Yitabiriwe n’abahanzi 10; King James, Riderman, Tom Close, Rafiki, Mani Martin, Faysal (Kode), Urban boyz, Dream Boyz, Dr Claude na Jay Polly.

Muri icyo gihe aba bahanzi bose bari ibihangange dore ko bose bari bakunzwe mu buryo bujya kungana kandi bagaragazaga ubuhanga icyo gihe.

Icyo gihe igikombe cyahawe Tom Close ariko abafana benshi ntibabyishimira kuko bifuzaga ko cyaba icya Jay Polly maze bamuhundagazaho urufaya rw’amabuye.

Iki ni kimwe mu rwibutso rukomeye rutazibazibagirana mu bakunzi b’umuziki mu Rwanda kuko ari kimwe mu byavuzweho ndetse akenshi iyo abantu bavuze kuri iri rushanwa ni kimwe mu bintu bihita biza mu mitwe ya benshi.

Tom Close yegukanye Primus Guma Guma Super Star ya mbere intosho ziravuga

-  Imyitwarire idahwitse ya bamwe mu bahanzi

Ku nshuro ya mbere kandi hatangwa igihembo muri iri rushanwa hari bamwe mu bahanzi bagaragaje imyitwarire mibi yo kurinenga no kurivuga nabi bitashimishije abaritegura. Ku ikubitiro Rafiki yahawe ishimwe agisezererwa arisubiza Bralirwa.

Uyu muhanzi n’umutima mwiza ubwo basozaga gutanga ibihembo nawe yahise afata ijambo, afata ishimwe yari yahawe avuga ko nawe hari akantu yageneye abategura iri rushanwa ahita aribasubiza.

Dr Claude na we mu gitaramo Sean Kingston yahuriyemo n’abahanzi bose ku munsi wo gusoza irushanwa, yavuze amagambo agaragaza ko irushanwa ari ribi cyane , aho yakoresheje imvugo ‘Guma Guma ni Feke’.

Byaje kumuviramo ingaruka zikomeye cyane dore ko yabanje kwimwa amafaranga yagombaga guhabwa bwa nyuma gusa biza kurangira ubuyobozi bwa Bralirwa buyamuhaye.

Icyo gihe Dr Claude yari ababajwe n’uko abahanzi nyarwanda baririmbye mu buryo bwa Live, Sean Kingston we aririmba akoresheje CD.

Si Dr Claude na Rafiki gusa bagiye bagaragaza imyitwarire mibi muri iri rushanwa bakirisezererwamo dore ko ku nshuro ya kabiri n’iya gatatu Bull Dogg na we yagaragaje uburakari akavuga ko gutsinda muri iri rushanwa hakoreshwa uburyo yise ‘Kata’ ikaza no kuba imvugo ikoreshwa cyane mu muziki nyarwanda muri iki gihe.

-  Lion Imanzi yise Young Grace ‘Agakecuru’ biteza impaka

Ubwo habaga iri rushanwa ku nshuro yaryo ya kabiri, Lion Imanzi wayoboraga gahunda zaryo ubwo umuhanzikazi Young Grace yari amaze kuririmba muri iri rushanwa, yamubajije ku bihuha bivuga ko yaba akuze ariko akaba yigaragaza nk’umwana abikubira mu nteruro imwe ya ‘Agakecurini’.

Young Grace yavugaga ko ari amagambo yo kumusebya, Lion Imanzi yanamubajije niba atorwa n’umuryango we gusa, cyangwa atorwa n’abantu b’aho akomoka mu Majyaruguru gusa (Rubavu na Musanze) ibintu byaje gukurura impaka mu buryo bukomeye.

Lion yagaragaje ko yaje kumenya ko benshi bakomerekejwe n’ibyo yabajije Young Grace ndetse ngo bamwe bamufata uko atari, aza gusaba imbabazi ndetse anahita asezera mu byo kuyobora ibitaramo bya Primus Guma Guma Super Star.

Igitutu Lion Imanzi yashyizweho kubera Young Grace cyatumye yegura ku kuyobora ibitaramo bya PGGSS

-  Uko Riderman yigeze kurwara bikekwa ko yarozwe

Ubwo habaga irushanwa rya Primus Guma Guma Super Star ku nshuro ya gatatu, Riderman yigeze kurwara bikekwa ko yarozwe biturutse ku mbaraga nke yagaragaje mu bitaramo by’iri rushanwa bibiri yitabiriye.

Icyo gihe yari ari kuza ku isonga mu bahanzi bagiye bitwara neza mu gushimisha abafana, imwe mu mpamvu zatumaga bamwe bavuga iby’uko ashobora kuba yararozwe.

Bikimara gusakara uyu muhanzi yabyamaganiye kure avuga ko nawe amaze iminsi yumva abantu babivuga ariko yemeza ko asenga ku buryo ibintu bitamubaho.

Iyi nkuru yagize ubukana bitewe n’izindi zari zimaze iminsi zivuza ubuhuha mu muziki zijyanye n’amarozi, mu Rwanda havugwa ko mu muziki habamo amarozi yifashishwa n’abahanzi kugira ngo bamamare.

Muri uwo mwaka uyu muhanzi arwara bikavugwa ko yarozwe ni nabwo yegukanye iri rushanwa ryabaga ku nshuro ya gatatu.

-  Knowless yaciye agahigo!

Butera Knowless niwe muhanzikazi rukumbi mu bitabiriye iri rushanwa ufite ibigwi ryo kuba ariwe waryegukanye.

Abandi b’igitsinagore bitabiriye iri rushanwa twavugamo Young Grace, Queen Cha, Allioni Buzindu na Oda Paccy ariko bose nta n’umwe wigeze agira amahirwe yo kwegukana iki gihembo.

Mu 2015 Knowless yubatse amateka muri iri rushanwa aba umuhanzikazi wa mbere uzamuye ibendera mu b’igitsinagore, yegukana iki gihembo ahigitse TNP, Rafiki, Oda Paccy, Senderi Hit, Sentore Jules, Active, Bull Dogg , Dream Boyz na Bruce Melodie wamuguye mu ntege.

Butera Knowless niwe mukobwa wenyine wabashije kwegukana irushanwa rya Primus Guma Guma Super Star mu myaka umunani ryamaze

-  Higeze kubaho irengayobora

Muri PGGSS III Riderman ubwo Riderman yabaga uwa mbere agahembwa miliyoni 24, icyo gihe muri iri rushanwa habayeho ibintu bitari bisanzwe dore hitabiriye abahanzi 11 mu cyimbo cyo kuba 10.

Icyo gihe hitabiriye abahanzi 11 barimo Dream Boyz, Bull Dogg, Riderman, Christopher, Urban Boyz, Kamichi, Senderi International Hit, Danny Nanone, Fireman, Knowless na Mico The Best.

Uyu mwaka wagize umwihariko bitewe n’uko hari abahanzi babiri banganyije amanota bigatuma bagonganira ku mwanya umwe.

Iki nacyo ni kimwe mu bintu bitazibagirana mu byaranze irushanwa rya Primus Guma Guma Super Star mu gihe cy’imyaka umunani ryamaze ribera mu Rwanda.

-  Young Grace na Rayon Sports

Mu irushanwa riheruka rya Primus Guma Guma Super Star, Young Grace yagarutsweho nyuma y’amafoto yashyize ku rukuta rwe rwa Instagram yambaye imyenda ya Rayon Sports iriho ikinyobwa cya Skol mu cyimbo cyo kwamamaza Primus bari banafitanye amasezerano.

Young Grace yireguye ko aya mafoto yayashyize hanze mu rwego rwo kwerekana ko ashyigikiye ikipe ya Rayon Sports yari yagiye gukina muri Tanzania ariko akanavuga ko ngo atari we wabikoze ahubwo ari umuntu umufasha gukoresha imbuga nkoranyambaga ze.

Aya mafoto Young Grace yaje kuyasiba maze ashyiraho andi y’ikipe ya Rayon Sports ariko ataragaragaza ibirango bya Skol, nyuma Blarirwa iza kumufatira ibihano byo gukatwa umushahara we w’ukwezi ungana na miliyoni imwe y’amafaranga y’u Rwanda.

Nyuma uyu muhanzikazi yaje kubabarirwa nyuma yo kwegera abategura irushanwa rya Primus Guma Guma Super Star akabasaba imbabazi.

Young Grace yifotoje yambaye umwenda ugaragaza ikinyobwa gihabanye na Primus bikurura impaka

-  Senderi umunyadushya utazibagirana mu bakunzi b’iri rushanwa

Ni umuhanzi w’indirimbo unifitemo impano yo kubijyanisha n’udushya dutuma ahora mu mitwe ya benshi. Mu irushanwa rya Primus Guma Guma Super Star yafatwaga nk’umwami w’udushya ndetse kuva ryabaho nta wakoze nk’ibye.

Uyu muhanzi wamenyekanye cyane mu ndirimbo ‘Nta Cash’ na ‘Jalousie’, mu mpera z’umwaka wa 2011 nibwo yatangiye kujya mu itangazamakuru akavuga amagambo benshi bagatungurwa kugeza ubwo yatangiye kujya mu bitaramo no kugaragara mu ruhame afite imyitwarire idasanzwe benshi bakamwibazaho.

Umwaka wa 2012 ugitangira, Nzaramba Eric yahise ahindura amazina ye y’ubuhanzi ahita yiyita Senderi International Hit, ayandika ku myenda ye no ku modoka ye bwite.

Uwo mwaka warangiye uyu muhanzi amaze kwigarurira imbaga y’abafana ari nabyo byamuharuriye inzira yo kwinjira mu irushanwa rya Primus Guma Guma Super Star ku nshuro ya mbere mu ntangiriro za 2013.

Yitabiriye PGGSS mu 2013, mu 2014 nabwo agarukamo akora udushya dutangaje ari nabyo byamubereye iturufu yo gusubizwa mu irushanwa mu 2015.

Mu myaka yamaze mu irushanwa, yakoze ibintu bitangaje birimo ibitazasibangana mu mitwe ya benshi bikanaba ipfundo ryo kumukumbura by’iteka. Yazaga ku isonga mu batumaga irushanwa rirushaho gushyuha.

Mu bintu bidasanzwe bikomeye kurusha ibindi Senderi yakoze mu myaka itatu ishize, harimo: Kujya mu bitaramo yambaye nk’abakinnyi ba ruhago kuva ku nkweto kugeza ku mutwe, kujya kuri stage bamutwaye mu kidomoro gikonjesha inzoga, kudodesha imyenda mu mahema ya Primus , kwambara nk’umunyeshuri wasoje amasomo ya Kaminuza, kuzana ibitebo by’ibijumba ku rubyiniro n’ibindi bitandukanye.

Sendera ari mu bahanzi bashyushyaga iri rushanwa

By’umwihariko muri 2014 yakoze agashya aho yaje yambaye nk’abanyonzi. Byari bisanzwe! ahubwo kuri we yagaragaje umwihariko kubera uburyo ubugabo bwe bwari bubyimbye mu ikabutura, ni nacyo cyatumye avugwa bihambaye.

Yaje gukumirwa burundu muri iri rushanwa biturutse ku ngingo yaje mu 2017 yakumiraga abafite imyaka irenze 35 nawe aza kwisanga muri icyo cyiciro avamo atyo.

Nyuma yaho yagiye ataka inzara avuga iyi ngingo yakurwa mu irushanwa rya Primus Guma Guma Super Star ariko biba iby’ubusa ririnda rihagarara atarasubiramo.

Nko muri Mutarama umwaka ushize yaranditse ati “Bavandimwe Bralirwa , EAP namwe banyamakuru mwese muri rusange, ni muntabare nzagaragare muri PGGSS uyu mwaka kuko nkumbuye abafana banjye kandi narabikoreye mu 2017 muvaneho ingingo ikumira umuhanzi kubera imyaka.”

Yungamo ati “Abanyarwanda bakumbuye kubona itandukaniro ryanjye n’abandi bahanzi mu irushanwa rimwe rukumbi rikomeye ribera mu Rwanda. Ndabasabye mwokabaho mwe inzara imeze nabi hanze aha kandi ntunzwe n’umuziki gusa.”

Iki kibazo cy’imyaka Senderi yari agihuriyeho n’abahanzi bamwe barimo na Danny Vumbi nawe wahise akurwa mu bagomba kongera kwitabira iri rushanwa kuva iyi ngingo yajyaho.

Udushya twa Senderi twatembagazaga benshi

-  Khalifan mu isanduku

Ubwo iri rushanwa ryasozwaga mu 2018, Khalifan yaratunguranye aza ari mu isanduku ari kumwe n’inuma y’umweru bitungura benshi ndetse ku mbuga nkoranyambaga aba umwe mu bagarutsweho cyane.

Uyu muhanzi ubusanzwe witwa Nizeyimana Odo, yaje bamutwaye mu isanduku yera asohokana n’inuma y’umweru yari yajyanye, araririmba hanyuma mu kuva imbere y’abafana nabwo arongera yihindura nk’uwapfuye baramuterura bamusubiza mu isanduku.

Mu gusobanura icyatumye yitwara atya, yavuze ko yakoze ibi kubera ko hari abifuje ko yapfa bakarenzaho itaka, ariko avuga ko ari mu mugambi w’Imana ndetse abamusurira ibi bakozwe n’isoni.

Khalifan ari mu banyadushya batazibagirana muri PGGSS

-  Yatangiye Bruce Melodie aherekeza abahanzi ku rubyiniro, aba ariwe uba uwa nyuma wayegukanye

Iri rushanwa ritangira mu 2011, Bruce Melodie ntabwo yari mu bahanzi bakomeye mu Rwanda ndetse nyuma yaho mu bindi bitaramo byaryo byakurikiye yari umwe mu bafasha abahanzi mu buryo bw’imiririmbire.

Kuva mu 2014, uyu muhanzi wari mu bahanzi bafite igikundiro yatangiye kwigarurira imitima ya benshi ndetse aza mu bahanzi bagomba kwitabira iri rushanwa, icyo gihe aba uwa gatatu.

Mu 2015 uyu muhanzi yaguye Butera Knowless mu ntege wegukanye igihembo.

Mu 2017 nabwo aza ku mwanya wa Gatatu, nyuma ya Christopher wabaye uwa kabiri na Dream Boyz yabaye iya mbere. Mu 2018 yegukana iki gihembo.

Uyu muhanzi ari mu bubakiye amateka muri irir rushanwa kuko yatangiye afasha abandi mu kuririmba (Backup singer) bikarangira ayegukanye.

Bruce Melodie yari afite akanyamuneza ubwo yegukanaga miliyoni 20 za Primus Guma Guma
N'ababaga bahatanye na Senderi batembagazwaga n'udushya twe
Riderman yegukanye PGGSS ya gatatu nyuma y'inkuru zacicikanye ubwo yabaga havugwa ko yarozwe
Sendera ari mu bahanzi bashyushyaga iri rushanwa
Lion Imanzi yayoboye ibitaramo bitandukanye bya Primus Guma Guma Super Star igitangira amaze kwegura aza gukomeza muri iri rushanwa nk'umukemurampaka
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
ruganintwali serge 2019-05-22 07:25:25

waba ushaka MC mu bitaramo byawe,mu nama ,cyangwa amakwe ni bindi?waba ushaka ugukinira muri film mwiza?ku bindi bisobanuro hamagara 0780357944

2
Patrick Tuyizere 2019-05-21 14:46:28

Byaribyiza Ariko Denderi Arabahiga Kudushya Arikose Atunzwe Numuziki Koko? Nukwisebya Tu

Kwamamaza