IGIHE

Abanyamideli 10 batoranyijwe mu bazitabira Rwanda Modesty Fashion Show (Amafoto)

1 23-10-2019 - saa 20:24, Uwiduhaye Theos

Abanyamideli 10 batoranyijwe mu bazitabira ibirori bya Rwanda Modesty Fashion Show bizaba mu mpera z’uyu mwaka.

Aba banyamideli 10 batoranyijwe nyuma y’uko mu minsi ishize bari banyuze imbere y’akanama nkemurampaka k’abategura iki gikorwa biyerekana muri ‘Casting’.

Ni mu gushaka abazitabira ibi birori biteganyijwe mu mpera z’uyu mwaka aho abanyamideli batandukanye batoranyijwe baziyerekana muri ibi birori bifite intego yo kugaragaza ‘Ubwiza bw’uwikwije’.

Muri 40 bari hagati y’imyaka 15 na 60 bifuza kuzagaragara muri ibi birori, hari habanje gutoranywa bane ba mbere bahise bahabwa amahirwe na Scheba Hotel yabereyemo igikorwa cyo kubatoranya. Kuri ubu hemejwe abandi batandatu bose hamwe baba icumi.

Umuyobozi mukuru wa Berwa Platinum Ltd itegura ibi birori, Ngabitsinze Abdul Wahab, ati “Abari bagize amanota yo hejuru kurusha abandi byari biteganyijwe ko bagomba guhabwa ibihembo na Scheba Hotel birimo kuhafatira ifunguro rya saa sita no kuhakorera imyitozo ngororamubiri no kuhogera mu gihe cy’icyumweru ndetse ni nako byahise bigenda.”

Abanyamideli 10 batoranyijwe ni Kagame Francis, Uwase Aisha, Benineza Claudien, Umutesi Melissa, Biteko Léon, Masabo Anaise, Nkubito Larson, Binego fatuma, Uwimana Joseph na Niragire Divine.

Aba banyamideli baziyongera ku bandi 10 basanzwe bakorana na Berwa Platinum isanzwe itegura ibi birori bimaze gushinga imizi mu bakunda abambara bikwije.

Igikorwa nyir’izina kizaba ku wa 7 Ukuboza 2019, muri Scheba Hotel mu Kiyovu. Kwinjira bizaba ari 3 000 Frw ku bazagura amatike mbere. Ubundi azaba ari 5 000 Frw ahasanzwe, 10 000 Frw mu myanya y’icyubahiro ndetse na 100 000 Frw ku meza y’abantu umunani.

Abanyamideli bazahabwa amahugurwa, ku wa 5 Ukuboza 2019 habeho ikiganiro gifunguye kuri buri wese ku bijyanye n’uruhare rw’abamurika imideli ku muco Nyarwanda, hazaba hatumiwe inzego za leta zifite umuco mu nshingano.

Rwanda Modesty Fashion ifite intego yo kwigisha Abanyarwanda uburyo bwo kwambara neza buboneye, guteza imbere uruganda rw’imideli mu Rwanda no guteza imbere gahunda ya ‘Made in Rwanda’.

Akanama Nkemurampaka ko gutoranya abanyamideli 10 bahawe amahirwe, kari kari kagizwe na Harerimana Gamaliel wakoranye na Sosiyete ya MTN mu kwamamaza ibikorwa byayo ndetse na Tumukunde Josephine watozaga intambuko abakobwa bari bahataniye ikamba rya Miss Rwanda 2019.

Iki gikorwa cyo kwerekana imideli y’abikwije cyitabirwa n’abasengera mu madini atandukanye mu Rwanda barimo Abayisilamu n’abandi bafata kwikwiza nk’indangagaciro ikomeye kandi ituma umuntu ahorana igitinyiro.

Igitaramo cya mbere cya Rwanda Modesty Fashion Show cyabaye mu 2016 kuri Petit Stade Amahoro i Remera, icya kabiri kiba mu 2017 muri Kigali Serena hotel, icya gatatu ari nacyo giheruka kibera muri Onomo Hotel.

Nkubito Larson umwe mu bazagaragara muri Rwanda Modesty Fashion Show 2019
Umutesi Melissa ari mu banyamideli 14 bazigaragaza muri Rwanda Modesty 2019
Umuyobozi mukuru wa Berwa Platinum Ltd itegura ibi birori, Ngabitsinze Abdul Wahab
Uwase Aisha witabiriye Miss Rwanda na Miss Supranational 2019 ari mu banyamideli babashije kubona amahirwe
Uwimana Joseph nawe muri uyu mwaka ni umwe mu banyamideli bazigaragaza muri Rwanda Modesty 2019
Abanyamideli bane babashije guhiga abandi bagahita babona amahirwe yo gukomeza
Benineza Claudien nawe ari mu banyamideli baziyerekana muri Rwanda Modesty Fashion Show
Binego Fatuma yabonye amahirwe yo kuzerekana imideli muri Rwanda Modesty 2019
Biteko Léon umwe mu banyamideli babashije kubona amahirwe yo gukomeza muri Rwanda Modesty 2019
Masabo Anaise nawe ari mu banyamideli bazigaragaza muri Rwanda Modesty Fashion Show 2019
Niragire Divine nawe yabashije kuba umwe mu banyamideli bazigaragaza muri Rwanda Modesty uyu mwaka
Ibi birori bizabamo ibikorwa bitandukanye birimo ibiganiro, amahugurwa ku banyamideli ndetse n'igikorwa nyir'izina
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Umulisa benitha 2019-10-24 11:29:43

Fashion show

Kwamamaza