IGIHE

Tunisia yegukanye Shampiyona Nyafurika ya Volleyball yaberaga mu Rwanda

0 14-09-2021 - saa 23:15, Eric Tony Ukurikiyimfura

Ikipe y’Igihugu ya Tunisia yisubije Igikombe cya Afurika cya Volleyball mu bagabo nyuma yo gutsinda Cameroun amaseti 3-1 (16-25, 25-21, 25-21, 25-16) ku mukino wa nyuma wabereye muri Kigali Arena kuri uyu wa Kabiri.

Ibihugu byombi byaherukaga guhurira ku mukino wa nyuma mu 2019, aho na bwo Tunisia yari mu rugo, yegukanye iri rushanwa.

Kuri uyu wa Kabiri, Cameroun yagize icyizere cyo kwihimura ku barabu ubwo yatsindaga iseti ya mbere mu buryo bworoshye ku manota 25-16, ariko itungurwa no gutsindwa ebyiri zakurikiyeho kuri 21.

Tunisia yiganjemo abakinnyi bakomeye kandi bahuza umukino, yagaragaje ubuhanga bwihariye mu iseti ya nyuma yarangiye itsinze kuri 25-16, byayihesheje kwisubiza igikombe ndetse ikaba igejeje 11, ikurikiwe na Misiri imaze kucyegukana inshuro umunani.

Ibi bihugu byombi byakinnye umukino wa nyuma ni byo bizahagararira Afurika mu Gikombe cy’Isi cya Volleyball mu bagabo, kizabera mu Burusiya mu mwaka utaha.

Mu guhatanira umwanya wa gatatu, Misiri yatsinze Maroc amaseti 3-1 (23-25, 28-26, 25-21, 25-18).

U Rwanda rwasoreje ku mwanya wa gatandatu rutsinzwe na Uganda amaseti 3-1 (25-21, 23-25, 20-25, 13-25) mu gihe Nigeria yabaye iya karindwi itsinze Repubulika Iharanira Demokarasi ya Congo amaseti 3-0 (25-10, 25-20, 25-22).

Kenya, Mali, u Burundi, Niger, Burkina Faso, Sudani y’Epfo, Ethiopia na Tanzania byasoreje mu myanya umunani ya nyuma.

Abakinnyi bitwaye neza mu irushanwa:

Abakinnyi bitwaye neza mu irushanwa:

Umukinnyi wakoze serivisi nziza kurusha abandi (Best Server): Arthur Kody (Cameroun)

Umukinnyi wazibiye abo bahanganye kurusha abandi (Best Blocker): Christian Voukeng Mbativou (Cameroun)

Umukinnyi wahize abandi mu gukinisha abakora amanota (Best Setter): Khalid Ben Slimane (Tunisia)

Umukinnyi wagerageje gutsinda cyane (Best Attacker): Wassim Ben Tara (Tunisia)

Libero mwiza: Mohamed Reda (Misiri)

Umukinnyi warushije abandi guhagarika imipira y’abo bahanganye (Best Receiver): Zouheir Elgraoui (Maroc)

Umukinnyi mwiza w’irushanwa (MVP): Mohamed El Hachdadi (Maroc)

Nyuma y’abagabo, harakomeza irushanwa ry’abagore

Mu gihe irushanwa ry’abagabo ryamaze gusozwa, iry’abagore rizakomeza ku wa Gatatu no ku wa Kane hakinwa imikino yo mu matsinda.

Sénégal izahura na Maroc mu Itsinda A guhera saa Munani mu gihe mu Itsinda B hazaba imikino ibiri irimo uzahuza Cameroun n’u Burundi saa Sita naho Tunisia ikine na Kenya guhera saa Kumi.

Ikipe y’u Rwanda y’abagore yamaze kubona itike ya ½, izongera gukina ku wa Kane ihura na Sénégal mu mukino usoza iyo mu Itsinda A.

Cameroun na Tunisia byari byongeye guhurira ku mukino wa nyuma
Tunisia yasubiriye Cameroun, yongera kwegukana Igikombe cya Afurika mu bagabo
Abakinnyi ba Tunisia bishimira intsinzi
Tunisia yegukanye Igikombe cya Afurika cya Volleyball ku nshuro ya 11
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza