IGIHE

Abanyarwanda 18 berekeje muri Côte d’Ivoire mu irushanwa rya Siporo yo kugenda n’amaguru

2 13-08-2019 - saa 11:04, Eric Tony Ukurikiyimfura

Mu ijoro ryakeye, ahagana saa 01:45, abanyarwanda 18 barimo abo muri Kigali Walking Club na Fidèle Marche Club bahagurutse i Kigali berekeza muri Côte d’Ivoire mu irushanwa mpuzamahanga rya Siporo yo kugenda n’amaguru.

Ni ku nshuro ya kane Ishyirahamwe ry’uyu mukino muri Côte d’Ivoire (FIRAPE) ritegura iri rushanwa ku rwego rw’igihugu mu gihe rizaba ari irya mbere mpuzamahanga.

Kigali Walking Club ni yo yatumiwe muri iri rushanwa rizamara iminsi itanu, aho ritangira kuri uyu wa Kabiri tariki ya 13 kugeza ku Cyumweru tariki ya 17 Kanama 2018.

Nyamuniga Jean uyobora iyi Club ndetse akaba ari na we wagiye uyoboye iri tsinda ry’abanyarwanda, yabwiye IGIHE ko mu byatumye batumirwa muri iri rushanwa harimo no kugira ngo hashyirweho Ishyirahamwe ry’iyi Siporo mu Rwanda, rizaba ribaye irya gatatu muri Afurika.

Ati” Imwe mu ntego nyamukuru y’iri rushanwa ni ugushyiraho Impuzamashyirahamwe y’iyi siporo muri Afurika. Côte d’Ivoire na Sénégal ni byo bihugu byagiraga federasiyo z’iyi siporo ariko n’u Rwanda tuzaba aba gatatu noneho hashyirweho iyo Confederation [impuzamashyirahamwe] ya Afurika.”

Nyamuniga yakomeje avuga ko kuri ubu Kigali Walking Club yamaze kwiyandikisha mu kigo cy’Igihugu gishinzwe imiyoborere (RGB), aho nibava muri Côte d’Ivoire bazakomeza gukurikirana inzira ibafasha gushyiraho Ishyirahamwe rya Sipro yo kugenda n’amaguru (Federation de Randonnée Pédestre).

Kigali Walking Club yahisemo kujyana na Fidèle Marche Club kuko basanzwe bahurira muri iyi siporo ikorwa mu mpera z’icyumweru ndetse yasabye n’abandi basanzwe bakora siporo yo kugenda n’amaguru kuza kwifatanya na bo mu guteza imbere uyu mukino.

Mu marushanwa yo kugenda n’amaguru azakorwa muri Côte d’Ivoire, abitabiriye bazashyirwa mu byiciro (haba mu bagabo no mu bagore) hagendewe ku myaka.

Abakora iyi siporo yo kugenda n’amaguru bishimiye ko gahunda ya Car Free Day yakanguriye abanyarwanda benshi kubiyungaho.

Kujya muri Côte d’Ivoire bizeye ko bizabafasha kubona ubunarirabonye mu gutegura amarushanwa y’iyi siporo, aho u Rwanda, u Burundi na Cameroun biri mu bihugu bizamurika umuco wabyo.

Uretse u Rwanda, ibindi bihugu 19 byatumiwe muri iri rushanwa ni: U Burundi, Ghana, RDC, Congo, Sénégal, Gabon, Cameroun, Niger, Commores, Togo, Bénin, Burkina Faso, Mali, Tanzanie, Kenya, Malawi, Maroc, Tunisie na Afurika y’Epfo.

Abanyarwanda bakora siporo yo kugenda n'amaguru berekeje muri Côte d’Ivoire mu ijoro ryakeye
Abagize Kigali Walking Club na Fidèle Marche Club ni bo bitabiriye iri rushanwa mpuzamahanga rigiye kuba ku nshuro ya mbere
Nyamuniga Jean uyobora Kigali Walking Club, akaba ari na we wagiye ayoboye itsinda ry'abanyarwanda bagiye muri Côte d’Ivoire
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Miheto 2019-08-13 06:06:58

Imikino iragwira! Kuki bapfushije ubusa tickets z’indege iyo bajyayo n’amaguru nyine?

2
Kalisa 2019-08-13 05:36:17

Kugenda na maguru harya ubundi bagenza iki

Kwamamaza