IGIHE

U Rwanda rwatsinzwe na Tanzania mu gushaka itike y’Igikombe cy’Isi cya Cricket

0 14-09-2021 - saa 00:10, Eric Tony Ukurikiyimfura

Ikipe y’Igihugu y’u Rwanda y’Abagore yatsinzwe umukino wa gatatu wo gushaka itike y’Igikombe cy’Isi cya Cricket yahuyemo n’iya Tanzania ku kinyuranyo cy’amanota 43 nyuma y’uko abakinnyi bayo bose bakuwemo.

U Rwanda ni kimwe mu bihugu byitabiriye irushanwa ryo gushaka itike y’Igikombe cy’Isi cya Cricket riri kubera muri Botswana ndetse rwatsinze imikino ibiri ibanza rwahuyemo na Mozambique na Eswatini.

Mu mukino wa gatatu rwakinnye kuri uyu wa Mbere, Tanzania ni yo yatsinze tombola, ihitamo kubanza gukubita udupira (batting) mu gihe u Rwanda rwabanje kujugunya udupira (bowling) rubuza Abanya-Tanzania gukora amanota.

Igice cya mbere cyarangiye ishyizeho amanota 104 muri Overs 20 zingana n’udupira 120 mu gihe abakinnyi umunani bayo ari bo basowe n’ab’u Rwanda.

Igice cya kabiri cyatangiye u Rwanda ari rwo rugiye gukubita udupira ndetse rwasabwaga gukuraho ikinyuranyo Ikipe y’Igihugu ya Tanzania yari imaze gushyiraho kingana n’amanota 104 rukongeraho inota rimwe. Bisobanuye ko Abanyarwandakazi basabwaga amanota 105.

Ikipe y’Igihugu yahuye n’akazi katoroshye kuko muri Overs 16 n’udupira dutanu (udupira 101), abakinnyi ba Tanzania bari bamaze gukuramo abakinnyi bose b’u Rwanda uko ari 10 (All out). U Rwanda rwari rumaze gutsinda amanota 61, rwatsindiwe ku kinyuranyo cy’amanota 43.

Ikipe y’Igihugu izasubira mu kibuga ku wa Kabiri, tariki ya 14 Nzeri 2021, aho izahura n’iya Botswana yakiriye iri rushanwa ndetse ikaba iri mu bihugu bihabwa amahirwe yo kwitwara neza. Izasoreza kuri Zimbabwe ku wa 16 Nzeri 2021.

Ni ku nshuro ya kabiri u Rwanda rwitabiriye imikino yo gushaka itike y’Igikombe cy’Isi cya Cricket mu Bagore, izarangira ku wa 20 Nzeri 2021. Botswana, Malawi na Cameroun biri gukina iri rushanwa bwa mbere.

U Rwanda rwatsinzwe na Tanzania mu mukino wa gatatu wo gushaka itike y’Igikombe cy’Isi cya Cricket
Mu irushanwa riri kubera muri Botswana, u Rwanda rumaze gutsinda imikino ibiri, rutsindwa umwe
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza