IGIHE

Abakinnyi barenga 100 bitezwe muri Cogebanque Tennis Open

0 30-11-2021 - saa 08:51, Eric Tony Ukurikiyimfura

Irushanwa rya Cogebanque Tennis Open rizagaragaramo abakinnyi barenga 100 baturutse mu makipe yose ya Tennis mu Rwanda, ayo muri Repubulika Iharanira Demokarasi ya Congo n’u Burundi.

Iri rushanwa riri kuba ku nshuro yaryo ya gatanu, ryatangijwe ku Cyumweru, tariki ya 28 Ugushyingo 2021, rizasozwa ku wa 5 Ukuboza 2021,

Cogebanque Tennis Open izaba mu minsi umunani, izakinirwa ku bibuga bitandatu biherereye muri Cercle Sportif de Kigali mu Rugunga.

Umuyobozi w’iri rushanwa, Kabeza Eric, usanzwe ari Umunyamabanga ushinzwe Tennis muri CSK, yavuze ko uyu mwaka rizakinwa n’ibyiciro bitanu bitandukanye birimo icy’abakina ari umwe, icya babiri mu bagabo n’abagore n’abafite ubumuga bakina bicaye mu tugare.

Yagize ati “Rizahuriramo amakipe yose y’i Kigali arimo CSK, Nyarutarama, Remera, APR, Kanombe, Musanze, Butare na Cimerwa. Hazaba harimo ababigize umwuga bazajya bakina mu gitondo n’abatarabigize umwuga bazajya bakina ku mugoroba. Harimo abafite ubumuga, abagore n’abagabo haba mu bakina ari umwe cyangwa ari babiri.”

Yakomeje agira ati “Harimo ibihembo bitandukanye, tuzatangira guhemba duhereye ku bageze muri ¼. Ababigize umwuga ni bo bazatsindira amafaranga mu gihe abatarabigize umwuga bazahabwa ibikombe.”

Uretse abakinnyi b’Abanyarwanda, hazitabira kandi n’abo mu Ikipe y’i Goma yo muri Repubulika Iharanira Demokarasi ya Congo n’abandi bo muri Entente Sportive de Bujumbura yo mu Burundi.

Umuyobozi ushinzwe Ubucuruzi muri Cogebanque, Kayonga Joël, yavuze ko bategura iri rushanwa mu rwego rwo gushyigikira no guteza imbere umukino wa Tennis mu gihe kandi bifuza kwegera abakiliya babo babizeza gukomeza kuba serivisi nziza.

Yagize ati “Twishimiye kuba iri rushanwa ryongeye kuba nyuma y’imyaka ibiri ritaba kubera ibihe bya COVID-19. Twishimira gufatanya na CSK gushyigikira amakipe arimo abakinnyi babigize umwuga n’abandi basanzwe bakinira hano.”

Yasobanuye ko intego bihaye nka banki ari ugukomeza guteza umukino wa Tennis imbere na siporo muri rusange no kurushaho gutanga serivisi zinogeye abakiriya.

Yakomeje ati “Nka Cogebanque, twishimiye gukomeza guteza imbere umukino wa Tennis ndetse na siporo muri rusange kandi twizeza abakiliya bacu ko tuzakomeza kubaba hafi no kubaha serivisi zibanogeye, zihendutse kandi ziboneka ku buryo bworoshye kuri bose.

Iyamuremye Antoine ushinzwe Iyamamazabikorwa muri Cogebanque yavuze ko gutegura iri rushanwa ari umwanya mwiza wo gushishikariza abakinnyi ba Tennis n’abafana gukoresha serivizi nziza z’iyi banki.

Ati “Dushishikariza abakinnyi n’abafana gukoresha serivizi za Cogebanque zirimo gufunguza konti zo kwizigama, inguzanyo ya Mortgage ishobora kugufasha kubona inzu na Gisubizo Loan Express ishobora kugufasha kubona inguzanyo igera ku nshuro 15 z’umushahara wawe kimwe n’izindi umuntu yifuza. Ukeneye izo serivisi agana ishami rya Cogebanque cyangwa umu-agent wayo cyangwa akaba yahamagara umurongo wa Cogebanque utishyurwa 5050.”

Umwe mu mikino yakinwe hafungurwa irushanwa warangiye Niyigena Étienne atsinze Havugimana Olivier 6-4, 6-3.

Cogebanque Tennis Open yatangiye yitabirwa n’Abanyarwanda gusa, ariko uko irushanwa rigenda rikura ryitabirwa n’ibindi bihugu byiganjemo iby’ibituranyi by’u Rwanda.

Mu 2019, Umurundi Abdoul Shakuru ni we wegukanye irushanwa rya Cogebanque Tennis Open mu cyiciro cy’abagabo babigize umwuga.

Mu mwaka ushize, iri rushanwa ntiryabaye kubera icyorezo cya COVID-19.

Kuva Cogebanque yakwemererwa gukorera mu Rwanda mu 1999 imaze kuhagira amashami 28 ayifasha kugeza serivisi ku bayigana. Ifite ATM 36, aba-agents barenga 650 bafasha abayigana gufunguza konti, kubitsa no kubikuza. Banatanga izindi serivisi zirimo izifashisha ikoranabuhanga binyuze muri Internet Banking, Mobile Banking (ukoresheje telefoni kuri *505# na Mobile App ya “Coge mBank”), Ikarita ya Smart cash ndetse n’amakarita ya MasterCard (Debit, Credit na Prepaid) yifashishwa mu kwishyura no kubikuza ahantu harenga miliyoni 36 ku Isi yose.

Abayobozi batangije Cogebanque Tennis Open 2021 na bo batera agapira mu kibuga
Havugimana Olivier yakinnye na Niyigena Etienne mu mukino w'ababigize umwuga wo gufungura irushanwa
Umuyobozi ushinzwe Ubucuruzi muri Cogebanque, Kayonga Joël, afungura irushanwa ku Cyumweru
Umuyobozi ushinzwe Ubucuruzi muri Cogebanque, Kayonga Joël, yavuze ko iri rushanwa rigamije gushyigikira Tennis
Cogebanque Tennis Open 2021 izitabirwa n'abakinnyi basaga 100 izajya ibera ku bibuga bitandatu biri muri Cercle Sportif de Kigali
Niyigena Etienne atera agapira ubwo yatsindaga Havugimana ku Cyumweru
Havugimana Olivier yitegura gutera agapira mu mukino wafunguye irushanwa ry'uyu mwaka
Hakinnye kandi n'abatarabigize umwuga
Iyamuremye Antoine ushinzwe Iyamamazabikorwa muri Cogebanque
Kabeza Eric ni we muyobozi w'iri rushanwa riri kuba ku nshuro ya gatanu
Abayobozi batandukanye bitabiriye itangizwa rya Cogebanque Tennis Open 2021 bifotoza

Amafoto: Muzima Eric

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza