IGIHE

Vision FC yatangiye imikino ya karamparaka y’Icyiciro cya Kabiri itsinda AS Muhanga (Amafoto)

0 22-05-2024 - saa 20:25, Eric Tony Ukurikiyimfura

Ibitego byo mu gice cya mbere byafashije Vision FC gutsinda AS Muhanga 2-1 mu mukino w’Umunsi wa Mbere w’iya kamarampaka yo gushaka amakipe azakina Icyiciro cya Mbere mu mwaka w’imikino utaha.

AS Muhanga yabonye itike yo gukina iki cyiciro gisoza Shampiyona y’Icyiciro cya Kabiri nyuma y’uko ishinje Espoir FC gukinisha umukinnyi udafite ibyangombwa, ndetse byarangiye iyi kipe y’i Rusizi yambuwe itike yari yakoreye ’ariko mu manyanga’.

Uyu mukino wabereye ku Mumena, wari witabiriwe n’abafana benshi barimo bamwe mu bayobozi b’amakipe y’Icyiciro cya Mbere.

Vision FC yatangiye neza, yafunguye amazamu ku gitego cyatsinzwe na Mbanzineza Radjabu ku munota wa 23, ku mupira yatsinze aserebetse nyuma yo guhindurwa na Harerimana Jean Claude.

Bidatinze, iyi kipe yari mu rugo yatsinze igitego cya kabiri nyuma y’iminota itanu, cyinjijwe na Nizeyimana Omar.

AS Muhanga yabaye nk’ikangutse, yagabanyije ikinyuranyo ku munota wa 31, ni nyuma yo kubona igitego cyatsinzwe na Nizeyimana Abdou.

Amakipe yombi yasatiranye mu minota yakurikiyeho, ariko umukino urangira ntayongeye kureba mu izamu.

Undi mukino wabaye kuri uyu wa Gatatu i Shyorongi, warangiye Intare FC inganyije na Rutsiro FC ubusa ku busa.

Umunsi wa Kabiri w’imikino ibanza uteganyijwe ku wa Gatandatu, tariki ya 25 Gicurasi, ubwo Vision FC izaba yakiriye Intare FC mu gihe AS Muhanga izakira Rutsiro FC.

Abakinnyi ba Vision FC babanje mu kibuga
Abakinnyi babanje mu kibuga ku ruhande rwa AS Muhanga
Perezida wa Vision FC, Birungi John Bosco, yari ashyigikiye ikipe ye
Muvunyi Felix 'Fils' utoza Vision FC
Umutoza wa AS Muhanga, Mbarushimana Abdou
Vision FC yatangiye neza imbere y'abafana bayo
Nizeyimana Omar yishimira igitego cya kabiri cya Gorilla FC
Ishimwe Kevin ahanganiye umupira na Abumuremyi wa AS Muhanga
Ishimwe Kevin yasimbuye mu gice cya kabiri, ariko na we ahita asimburwa nyuma y'iminota mike
Munyemana Alexandre yahinduye byinshi ku ruhande rwa AS Muhanga nyuma yo gusimbura Ineza Janvier mu gice cya mbere

Amafoto: Sendegeya Jules

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza