IGIHE

Tunisie yananiwe kwikura imbere ya Australie, icyizere cyo kurenga itsinda kirayoyoka

0 26-11-2022 - saa 15:20, Iradukunda Olivier

Australie yatsinze Tunisie igitego 1-0 mu mukino wa kabiri mu itsinda rya Kane. Aya makipe yombi yakinaga umukino wa kabiri kuri Al Janoub Stadium, imbere y’abafana 41,823.

Nyuma yo gutsindwa, Tunisie yahise itakaza icyizere cyo gukomeza kuko ifite inota rimwe.

Amakipe yombi yatangiye umukino umutoza Graham Arnold wa Australie yahisemo gukoresha uburyo bwa ba myugariro bane, abakinnyi bo hagati batatu ndetse na ba rutahizamu batatu.

Jalel Kadri wa Tunisie we ahitamo gukinisha ba myugariro batatu, imbere yabo bane hagati, bunganirwa na babiri imbere yabo, ndetse na rutahizamu umwe.

Mu minota ya mbere y’uyu mukino by’umwihariko 10 ibanza, Australie yari yamaze kwinjira mu mukino mbere, ndetse inakinira umupira mu kibuga cya Tunisie. Iyi minota nta kintu yayibyajemo.

Ibi byatumye uko iminota igenda yigira imbere ariko Tunisie ikurira mu mukino, ikoresha imipira yihuta ndetse itangira no kugerageza amahirwe. Mohamed Drager yabonye n’uburyo ariko ntiyabasha gushyira umupira mu izamu.

Ibi byakanguye Australie yasaga n’aho imaze kwirara, ihindura imikinire ikoresha imipira ica mu mpande. Aha niho umupira wazamukanywe na Craig Goodwin awuzamura mu rubuga rw’amahina, Mitchell Duke awushyira mu izumu akoresheje umutwe ku munota wa 23.

Kuva icyo gihe imipira yose ya Australie yanyujijwe mu ruhande rw’iburyo rwa Craig Goodwin wagoye cyane Dylan Bronn, mu minota 40 yari amaze kohereza imipira 10 yose igana mu rubuga rw’amahira rwa Tunisie.

Tunisie nayo yashakaga uko yishyura yahisemo gukoresha imipira miremire igana mu kibuga cya Australie, ariko bigoranye kubona aho yamenera kuko myugariro Harry Souttar na Kye Rowles bari bahagaze neza.

Nubwo bari bahagaze neza ariko rutahizamu wa Tunisie Issam Jebali utarababaniye no mu mukino ubanza, yakomeje guhusha uburyo bwari bwabazwe. Igikomeye yakoze ni umupira yahereje Youssef Msakni ariko nawe umupira awutera hanze.

Igice cya mbere cyarangiye Australie iyoboye n’igitego 1-0. Uku ni nako icya kabiri cyatangiye ariko Tunisie isatira cyane. Mu minota 10 yacyo yaremye uburyo butatu bwashoboraga kuvamo igitego cyo kwishyura, ariko ntibyakunda.

Uku gusatira no gukoresha imbaraga nyinshi byatumye Australie ibona ko ishobora kwishyurwa isoza ibyo gukina ihererekanya, itangira gukura imipira mu kibuga cyayo, iyohereza imbere.

Mu minota 60 y’umukino, Tunisie yakomeje kuyobora umukino gusa gutera mu izamu byo bikomeza kuba ikibazo. Yahise ikora impinduka ikuramo Mohamed Drager ishyira mu kibuga Ferjani Sassi.

Aissa Laidouni asimburwa na Wahbi Khazri, Issam Jebali wahushije uburyo bwinshi asimburwa na Taha Yassine Khenissi, Dylan Bronn asimburwa na Wajdi Kechrida. Izi mpinduka zose zatumye ikomeza gusatirana ingufu, Souttar na Rowles bakomeza kuba ibamba.

Uku gusatirwa gukomeye kwatumye umutoza Graham Arnold nawe akora impinduka mu mukino.

Yakuyemo Mathew Leckie asimburwa na Keanu Baccus, Craig Goodwin wari wananiwe asimburwa na Awer Mabil, Riley McGree asimburwa na Ajdin Hrustic ndetse Mitchell Duke watsinze igitego asimburwa na Jamie MacLaren.

Izi mpinduka yazikoze kugira ngo yongere imbaraga hagati mu kibuga ariko ntibyamukundiye kuko Tunisie yakomeje kumurusha cyane.

Umukunzi wese wari ushyigikiye Australie yasengaga Imana ngo umukino urangire. Umusifuzi w’ Umudage, Daniel Siebert, yongeye iminota itandatu ku mukino ariko Tunisie inanirwa kubona igitego. Umukino urangira Australie itsinze igitego 1-0.

Tunisie yatsinzwe yateye imipira 13 mu izamu mu gice cya kabiri gusa. Australie yateye imipira icyenda, imyinshi yatewe mu gice cya mbere. Tunisie kandi yabonye koruneri eshanu kuri ebyiri.

Umukino wa nyuma mu itsinda, Tunisie izawukina n’u Bufaransa bwatsinze Australie ibitego 4-1, tariki ya 30 Ugushyingo, bigoranye ko yazawutsinda. Australie yo izakina umukino wa nyuma mu itsinda na Denmark.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza