IGIHE

Premier League 2022/23: Ibyo wamenya mbere y’uko umwaka w’imikino utangira

0 5-08-2022 - saa 15:19, Iradukunda Olivier

Mu gihe habura amasaha make ngo shampiyona y’u Bwongereza [Premier League] itangire, hari impinduka nyinshi zabaye haba mu batoza, mu bizakorwa mu mukino hagati ndetse no muri shampiyona muri rusange.

Amakipe 20 azakina iyi shampiyona yariteguye ndetse itangiye hari akiri kurambagiza abakinnyi kugira ngo azabashe kwitwara neza. Ni ku nshuro ya 31 iyi shampiyona igiye gukinwa yitwa ‘Premier League’, ikaba iri butangizwe kuri uyu wa Gatanu n’umukino uri buhuze Crystal Palace na Arsenal.

Muri iyi nkuru, turagaruka ku bintu ukwiye kumenya mbere y’uko iyi shampiyona ikundwa na benshi ku Isi itangira birimo n’ikiruhuko cy’igikombe cy’Isi giteganyijwe mu mezi ane ari imbere.

Amakipe mashya

Nottingham Forest yagarutse mu cyiciro cya mbere Premier League ku nshuro ya mbere mu myaka 23 ishize, kuva yamanuka mu mwaka w’imikino wa 1998/99.

Byabatwaye iminsi 8,414 n’imikino 1,069 kugira ngo iyi kipe igaruke mu cyiciro cya mbere. Yabigezeho itsinze Huddersfield igitego 1-0 i Wembley muri Gicurasi 2022.

Andi makipe abiri yazamutse ni Bournemouth na Fulham yari yamanutse muri 2020/21.

Iyi shampiyona y’uyu mwaka izaba ariyo ya mbere ibayeho itarimo ikipe ya Burnley kuva 2015/16 yamanukanye na Watford na Norwich.

AFC Bournemouth yazamutse mu cyiciro cya mbere uyu mwaka
Fulham yariyubatse igura n'umunyezamu muri Arsenal Bernd Leno
Nottingham Forest yari imaze imyaka 23 itazi uko icyiciro cya mbere gisa

Abatoza bashya

Mu batoza bashya bitezwe harimo Erik Ten Hag ubaye umutoza wa munani utoje Manchester United kuva yatandukana na Alex Ferguson muri 2013.

Uyu mugabo w’imyaka 52 yavuye muri Ajax Amsterdam, yitezweho guha Manchester United FC gusubira muri Champions League no guhatanira igikombe cya shampiyona.

Undi mutoza mushya ni Steve Cooper wa Nottingham Forest. Uyu mugabo w’imyaka 42 ntiyigeze akina mu Bwongereza ariko yatoje amakipe yabwo y’abatarengeje imyaka 16 na 17 mbere y’uko atoza Swansea imyaka ibiri.

Yatangiye gutoza Nottingham Forest muri Nzeri ubwo yari ku mwanya wa nyuma wa shampiyona y’icyiciro cya kabiri ayifasha kuzamuka mu cyiciro cya mbere binyuze mu mikino ya ‘Play-Off’.

Abandi batoza bayoboye amakipe batahozemo ni Scott Parker na Marco Silva. Parker azaba atoza Bournemouth naho Silva ayoboye Fulham.

Umutoza mushya wa Manchester United, Eric Ten Hag yitezweho byinshi

Amategeko mashya

Impinduka ya mbere ikomeye ni uko buri kipe yemerewe gusimbuza inshuro eshanu mu mukino zivuye kuri eshatu.

Iri tegeko ryatangiye gukoreshwa mu mwaka w’imikino wa 2019-20, ubwo umupira w’amaguru wasubukurwaga nyuma y’icyorezo cya Covid-19, cyari cyarawuhagaritse mu 2020.

Mu zindi shampiyona byarakorwaga ndetse no mu yandi marushanwa ariko u Bwongereza bwo bwari bwarasubiye ku basimbura batatu. Kuri ubu noneho abasimbura ni batanu mu icyenda bazaba bari ku ntebe y’abasimbura.

Indi mpinduka ni uko abakinnyi bazajya batera ivi ku mikino yatoranyijwe, ubusanzwe iki kimenyetso cyo kurwanya irondaruhu cyakorwaga mbere ya buri mukino wose.

Amakipe yo muri shampiyona y’u Bwongereza kandi yagiriwe inama yo kudahagarika umukino mu gihe hagiye gutangwa ubuvuzi bwihutirwa mu bafana keretse igihe bibaye ngombwa.

Abasifuzi bo ku ruhande bategetswe gutinda kuzamura igitambaro igihe umukinnyi bigaragara neza ko yaraririye, keretse igihe hari amahirwe akomeye yo gutsinda umupira ugiye gutangwa ku buryo wahita ubyara igitego.

Ibikorwa byo gusaka hanze ya stade byarongerewe aho hazajya hanakoreshwa imbwa zisaka mu kwirinda ko hari ibintu bibi byakinjizwa n’abafana.

Mu zindi mpinduka, Premier League, yemeje ko ku kibuga hazajya haba imipira myinshi yo gukina mu rwego rwo kugabanya umukino wakerezwa no kurenga k’umupira.

Ku kibuga hazajya haba hari imipira 10 irimo umwe wo mu kibuga, uw’umusifuzi wa kane n’indi umunani izajya iba iri mu mfuruka z’ikibuga.

Imikino kandi izaba yemerewe gusubikwa kubera abakinnyi ikipe ibura. Gusa Premier League izajya isuzuma ubusabe bwa buri kipe yasabye ko umukino wayo usubikwa.

Hari kandi n’ubwoko bushya bw’imipira izakinwa. Amakipe kandi azaba yemerewe gukina imikino ya gicuti mu gihe cy’igikombe cy’Isi kizaba mu Ugushyingo na Ukuboza 2022.

Umupira mushya uzakinwa muri Premier League uyu mwaka

Abakinnyi bashya

Muri iyi mpeshyi haguzwe abakinnyi benshi bakomeye mu makipe yo muri Premier League, ariko amaso yose azareba rutahizamu wa Manchester City Erling Haaland na Darwin Núñez wa Liverpool.

Erling Haaland yavuye muri Borussia Dortmund atsinze ibitego birenga 130 mu gihe yahamaze n’ibitego 20 mu ikipe ya Norvege ku myaka 22, byatumye abengukwa n’ikipe ya Manchester City ngo ayifashe mu busatirizi bwayo.

Liverpool nayo yasimbuye Sadio Mané, werekeje muri Bayern Munich izana rutahizamu wa Benfica, Darwin Núñez kuri miliyoni 64 z’ama- pound. Abakunzi ba Premier League bose bamuhanze amaso nk’umusimbura wa Sadio Mané.

Abandi bakinnyi bo kwitega ni bari mu ikipe ya Tottenham yasinyishije rutahizamu wa Everton Richarlison kuri miliyoni 60 z’ama-pound.

Manchester City yagurishije rutahizamu Gabriel Jesus na myugariro Oleksandr Zinchenko bombi kuri miliyoni 75 z’ama-pound muri Arsenal, na Raheem Sterling muri Chelsea kuri miliyoni 50 z’ama-pound.

Manchester City kandi yasinyishije umukinnyi wo hagati wa Leeds Kalvin Phillips kuri miliyoni 45 z’ama-pound.

Manchester United yaguze myugariro wa Ajax, Lisandro Martinez naho Chelsea isinyisha myugariro wa Napoli, Kalidou Koulibaly.

West Ham yakoresheje miliyoni zirenga 60 z’ama-pound kuri myugariro wa Rennes, Nayef Aguerd na rutahizamu wa Sassuolo Gianluca Scamacca.

Darwin na Halland bahanzwe amaso muri uyu mwaka w'imikino

Ikiruhuko gishya kubera igikombe cy’isi

Ni ubwa mbere mu mupira w’amaguru mu Bwongereza bazamara ibyumweru bitandatu nta mukino wa Premier League uhari kubera igikombe cy’isi kizabera muri Qatar kizaba mu Ugushyingo n’Ukuboza 2022.

Nta mupira n’umwe w’amaguru muri Premier League uzaba hagati ya tariki 13 Ugushyingo na 26 Ukuboza. Mu bihe bya Noheri n’Ubunani hagati ya 26 Ukuboza na 5 Mutarama, hazaba iminsi ibiri gusa idafite imikino.

Mu mazina akomeye yavuye muri Premier League harimo Alexandre Lacazette, Paul Pogba, Mané, Romelu Lukaku, Antonio Rudiger, Andreas Christensen na Raphinha.

Premier League iratangira kuri uyu wa Gatanu Crystal Palace ikina na Arsenal FC
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza