Ikipe y’Igihugu ya Nigeria iri kwitegura Amavubi, yatsinze iya Bénin ibitego 3-0 mu mukino w’Umunsi wa Mbere w’Itsinda D ryo gushaka itike y’Igikombe cya Afurika cya 2025.

Ni umukino Nigeria yakiriye iwayo kuri uyu wa Gatandatu, tariki ya 7 Nzeri 2024, ndetse yitwara neza imbere y’abakunzi bayo ikomeza gushimangira ko ari ikipe y’igihangange.

Mbere y’uko igice cya mbere cy’uyu mukino kirangira, rutahizamu wa Atalanta yo mu Butaliyani, Ademola Lookman Olajade yafunguye amazamu atuma ikipe ye ijya mu karuhuko iyoboye.

Igice cya kabiri cyagaragayemo impinduka ndetse na Nigeria ikomeza gukora izayifasha kubona ibindi bitego, ku munota wa 72 umutoza wayo Augustine Eguavoen akuramo Victor Boniface aha umwanya Victor Osimhen.

Nyuma y’iminota itandatu agiye mu kibuga, Osimhen yahise aherezwa umupira na Wilfred Ndidi atsinda igitego cya kabiri muri uyu mukino mbere y’uko Ademola Lookman ashyiramo ikindi cy’agashinguracumu.

Umukino warangiye Nigeria iyoboye Itsinda D kuko yagize amanota atatu n’ibitego bitatu izigamye, Libya n’u Rwanda biheruka kunganya bikayikurikira mu gihe Bénin ari iya nyuma.

Super Eagles igomba guhita itangira gutegura urugendo ruyiganisha i Kigali aho igomba gukina umukino wa kabiri mu itsinda uzayihuza n’Amavubi, ku wa Kabiri, tariki ya 10 Nzeri 2024.

Bénin yananiwe kubona igitego mu izamu rya Nigeria

Bénin kugeza ubu ni iya nyuma mu Itsinda D

Nigeria yakinnye neza umukino wa mbere mu yo gushaka itike yo kujya mu Gikombe cya Afurika

Nyuma yo gukina na Bénin, Nigeria izahura n'Amavubi

Ademola Lookman niwe wafunguriye amazamu Nigeria

Victor Osimhen yatsinze igitego nubwo yinjiye mu kibuga asimbuye