IGIHE

Ni gute Ani Elijah yisanze mu mwiherero w’Amavubi atemerewe gukinira?

0 21-05-2024 - saa 15:57, Jah d'eau Dukuze

Ku wa Mbere, tariki ya 20 Gicurasi, ni bwo Ikipe y’Igihugu "Amavubi" yatangiye umwiherero wo kwitegura imikino ifitanye na Bénin na Lesotho mu rugendo rugana mu Gikombe cy’Isi cya 2026.

Abakinnyi biganjemo abakina imbere mu gihugu bahuriye ku biro by’Ishyirahamwe ry’Umupira w’Amaguru mu Rwanda (FERWAFA) mbere yo kugana mu Bugesera aho bazakorera umwiherero w’ibyumweru bibiri.

Mu bakinnyi bageze kuri FERWAFA hagaragayemo Rutahizamu wa Bugesera FC, Ani Elijah, nk’ugiye gukemura ikibazo cy’ubusatirizi cyabaye karande mu Ikipe y’Igihugu ari kumwe n’ureberera inyungu ze, Emmy Fire.

Ani Elijah yageze gute mu Ikipe y’Igihugu ’Amavubi’?

Amakuru avuga ko uyu rutahizamu yashimwe n’umutoza Torsten Frank Spittler maze asaba ko yakinira Amavubi kubera ko yamubonyemo impano idasanzwe.

Nyuma yo kubiganiriza bamwe mu bayobozi ba FERWAFA bakabimwemerera, hatangiye gahunda yo kumusabira ubwenegihugu ndetse no kumusabira ibyangombwa byo gukinira Ikipe y’Igihugu.

Aba babwiye umutoza ko bari mu nzira zo kubikora, ko nibikunda azasanga abandi mu Ikipe y’Igihugu. Byarangiye abaye akuwe ku rutonde rw’abo umutoza yari yatanze ngo bazitabire imikino yo muri Kamena.

Umutoza yakomeje kunenga FERWAFA ko itari kumuha abakinnyi ashaka, ni ko kongera kubwira umukinnyi ko yasanga abandi mu gihe bagitegereje umwanzuro.

Nyuma yo guhagurukana n’abandi i Remera, akagera mu mwiherero mu Bugesera, FERWAFA yatekereje kabiri isanga byaba byiza adatangiye imyitozo FIFA itaramwemerera gukinira u Rwanda.

Anu Elijah ntabwo yemerewe gukinira u Rwanda mbere ya 2029

Elijah yagarukiye ku muryango w'Ikipe y'Igihugu

Nkuko bigaragara mu nkuru IGIHE yanditse inkuru yibaza iby’uyu rutahizamu wa Bugesera FC, amategeko mashya ya FIFA atanga ibintu bine bisabwa kugira ngo umukinnyi abe yakwemererwa gukinira ikindi gihugu mu gihe nta kindi yakiniye.

Ani Elijah nta kipe y’igihugu yakiniye ndetse na Nigeria yabihamirije FERWAFA, gusa ntabwo bihagije.

Mu ngingo ya karindwi y’amategeko agenga abakinnyi ya FIFA, “Players Status” avuga ku bijyanye n’ibisabwa kugira ngo umukinnyi akinire igihugu runaka, avuga ko kugira ngo umukinnyi utarakinira ikindi gihugu yemererwe gukinira igihugu gishya agomba kuba yujuje ibintu bine.

Ibyo birimo kuba yaravukiye mu gihugu gishya ashaka gukinira; Kuba Nyina umubyara cyangwa Se baravukiye muri icyo gihugu ashaka gukinira (aha ku mwana warezwe agahabwa ababyeyi n’amategeko ntabwo yemerwa); Kuba Nyirakuru cyangwa Sekuru baravukiye muri icyo gihugu; Kuba yaramaze imyaka byibura itanu ikurikirana aba muri icyo gihugu gishya nyuma yo kuzuza imyaka 18.

Iyo urebye izi ngingo zose, usanga nta n’imwe Elijah yujuje kuri ubu, aho ishoboka ari iya kane, ikaba na yo yakunda muri 2029 mu gihe uyu mukinnyi yaguma gutura mu Rwanda.

Amavubi yatangiye imyitozo yitegura imikino yo muri Kamena
Rubanguka Steve ni umwe mu bari mu myitozo
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza