IGIHE

Ku mupira w’u Rwanda, Arsenal, Arteta na Ramsdale: Ikiganiro na David Seaman

0 25-06-2022 - saa 12:09, Cyprien Niyomwungeri

Niba utari nyamuzavuba mu ruhando rwa ruhago y’u Burayi by’umwihariko muri shampiyona y’u Bwongereza [Premier League], uribuka neza ubuhanga bwa David Andrew Seaman wamamaye cyane mu izamu rya Arsenal FC n’iry’intare eshatu z’u Bwongereza.

Niba utamuzi, reka nkubwire ko Seaman yavutse kuwa 19 Nzeri 1963. Mu rugendo rwe rw’umupira w’amaguru kuva mu 1981 kugeza mu 2004, yabaye umukinnyi udasanzwe by’umwihariko ubwo yari muri Arsenal. Mu ikipe y’igihugu afitemo ibigwi byo guhamagarwa inshuro 75 akaba ari umunyezamu wa kabiri wahamagawe kenshi nyuma ya Peter Shilton.

Ngarutse gato kuri Arsenal FC, Seaman ni umwe mu bagabo bizihiye abakunzi b’iyi kipe y’i Londres, ndetse banandikamo amateka, Wari uzi ko mu mwaka w’imikino wa 1990/91 yawurangije atsinzwe ibitego 18 gusa kandi yarakinnye imikino yose 38? Icyo gihe yatwaye igikombe cya shampiyona.

Muri iyi kipe yatwayemo ibikombe bitatu bya shampiyona (1991, 1998, 2002), ibikombe bine bya FA (1993, 1998, 2002, 2003), Leagu Cup imwe, na European Cup Winners Cup imwe mu 1994.

Ni umwe mu bagabo bubashywe mu Bwongereza kandi bafite ijambo mu mupira w’amaguru kuko mu 1997 yanahawe umudari w’ishimwe uzwi nka ‘Member of the British Empire (MBE)’ kubera ibikorwa by’indashyikirwa yagaragaje mu mupira w’amaguru.

Ku nshuro ya mbere uyu mugabo yakandagiye mu rw’imisozi igihumbi kubera ubufatanye rufitanye n’ikipe ya Arsenal. Ni umwe mu bagabo bitabiriye ibiganiro ku mikino ya Commonwealth izabera i Birmingham guhera mu kwezi gutaha byabaye mu murongo w’inama ya CHOGM irimo kubera i Kigali ndetse akazasura ikibuga cya Golf n’icya Cricket.

Mu kiganiro na IGIHE, David Seaman yagarutse ku rugendo rwe mu Rwanda, amasezerano iki gihugu gifitanye n’ikipe ya Arsenal FC, ku mutoza wayo Mikel Arteta ndetse n’umunyezamu Aaron Ramsdale, uri mu izamu rya Arsenal yigeze gufatira.

Ikiganiro na David Seaman

IGIHE: U Rwanda ni igihugu kirimo kwakira CHOGM bwa mbere, warubonye gute?

Seaman : Ni inshuro ya mbere ngeze mu Rwanda, ni rwiza cyane naje mu rwego rw’ubufatanye rufitanye n’ikipe ya Arsenal FC, ni yo mpamvu turi hano.

IGIHE: U Rwanda ni igihugu kirimo kwiyubaka mu nzego zose harimo n’umupira w’amaguru, ni iki cyakorwa ngo impano zarwo zigere ku rwego rwo hejuru ku buryo twazibona no muri Premier League?

Seaman: Igihe namaze nkina umupira w’amaguru nabonyemo ikintu kimwe. Umupira ni umutoza.

Icya mbere bakeneye kugira abatoza beza, murabizi ko Arsenal ijya yohereza abatoza hano mu Rwanda kwigisha abandi batoza kuko iyo ubonye abana bakina umupira w’amaguru, ni ikintu gishimishije cyane kandi uko utoje neza abantu ni ko baba beza.

Ubu ntoza abana muri Arsenal FC kandi mbona ubuhanga abana bato bafite, uko bakina rwose birashimishije.

IGIHE: Ubona ute ubufatanye bw’u Rwanda na Arsenal mu guteza imbere impano z’abakiri bato?

Seaman : Kuba hari abatoza baza hano, ni ah’abatoza ba hano kubigiraho nabo bakajya kubyigisha abana, binyuze muri ubwo bufatanye, ubu ndi hano kandi birimo kugenda neza kuko hari abo twakinanye na bo baje hano.

IGIHE: Ni iki wavuga ku ikipe ya Arsenal FC muri iyi minsi?

Seaman: Arsenal imeze neza nubwo mu mwaka w’imikino uheruka yantengushye, kuko yabuze amahirwe yo kujya muri Champions League, birangira igiye muri Europa League.

Gusa irimo gutera imbere nk’u Rwanda kandi izamera neza, kandi umutoza Mikel Arteta azaba umutoza mwiza turimo kugana aheza gake gake ariko tuzagira uruhare mu kugarura Arsenal.

IGIHE: Uratekereza ko umutoza Mikel Arteta azagarura Arsenal mu bihe nk’ibyanyu?

Seaman: Simbishidikanya. Azi icyo Arsenal ari cyo, urebye n’uburyo yakemuye ikibazo cya Aubameyang, jya mu kibuga niba ukora neza, jya hanze niba ukora nabi.

IGIHE: Ijambo rimwe ku munyezamu Aaron Ramsdale

Seaman:Arimo kwitwara neza, ni umwaka we wa mbere nk’umunyezamu wa mbere wa Arsenal, ariko arimo gukora ibidasanzwe kuko ndabizi haba hari igitutu cyinshi iyo uri umunyezamu wa Arsenal, ariko arimo kubyitwaramo neza, nakomerezaho ntawamenya vuba ashobora kuba umunyezamu wa mbere w’Abongereza.

David Seaman yakinnye imikino 344 muri shampiyona y’u Bwongereza [Premier League], arangiza 141 atinjijwe igitego, yegukana intsinzi 171 atsindwa 73.

Seaman yakiniye u Bwongereza mu bikombe by’Isi bya 1998 na 2002, muri Euro ya 1996 na 2000. Uretse Arsenal, yanakiniye Manchester City, Peterborough United, Birmingham City na Queens Park Rangers.

Seaman yagaragaje ko nyuma y'umupira w'amaguru agerageza na Cricket
Seaman akina Cricket ku kibuga cya Gahanga i Kigali
Byari ibyishimo ku bafana ba Arsenal basigaranye urwibutso
Seaman avuga ko Arsenal irimo kugaruka mu bihe byayo byiza
David Seaman yabaye umunyezamu ukomeye wa Arsenal ubu asigaye atoza mu ikipe y'abato
Seaman yigeze kurangiza umwaka w'imikino atsinzwe ibitego 18 gusa
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza