IGIHE

Inzoga n’amasogisi, Mukansanga n’Abayovu n’irumbuka ry’ibitego: Ibyaranze Umunsi wa 16 wa Shampiyona

0 25-01-2023 - saa 11:34, Eric Tony Ukurikiyimfura

Umunsi wa 16 wa Shampiyona y’Icyiciro cya Mbere mu Rwanda wakinwemo imikino umunani kuva tariki ya 20 kugeza ku ya 24 Mutarama, waranzwe na byinshi bitandukanye birimo ibizakomeza kugarukwaho na nyuma yawo.

Iyi mikino ni yo ya mbere yakinwe mu gice cy’imikino yo kwishyura ya Shampiyona yongeye gusubukurwa nyuma y’iminsi 29 ihagaze kuva tariki ya 23 Ukuboza 2022 ubwo hasozwaga igice kibanza.

Mbere y’uko iki gice cyo kwishyura cya Shampiyona gitangira, amakipe yahawe ibyumweru bine byo kwiyubaka, aho agomba kongeramo abakinnyi kugeza ku wa 27 Mutarama.

Birumvikana ko ikiruhuko cy’ibyumweru bine nta Shampiyona iba, wabaye umwanya wo gukosora byinshi mu makipe atandukanye, andi ashaka uko yakomereza ku muvuduko yasorejeho imikino ibanza.

IGIHE yasubije amaso inyuma, ireba bimwe mu by’ingenzi byaranze imikino umunani yakinwe ku Munsi wa 16 wa Shampiyona.

Muhadjiri yinjiranye amaraso mashya muri Police FC

Nka rimwe mu mazina akomeye ari muri ruhago y’u Rwanda, Hakizimana Muhadjiri yari ahanzwe amaso nyuma yo kugaruka muri Shampiyona aho yasinye amezi atandatu muri Police FC avuye muri Arabie Saoudite.

Uyu mukinnyi wasubiye mu Ikipe y’Abashinzwe umutekano yaherukagamo muri Kamena 2022, ntiyatengushye abakunzi be n’abari bamwiteze kuko ari we watsinze igitego gifungura imikino 120 izakinwa mu gice cyo kwishyura cya Shampiyona.

Muhadjiri yabigezeho ubwo yatsindaga penaliti yo ku munota wa 16, yavuyemo igitego cya mbere ku mukino Police FC yatsinzemo Gorilla FC yari yayakiriye ibitego 3-2 mu Bugesera.

Undi mukinnyi watsinze ku mukino we wa mbere muri Shampiyona y’uyu mwaka ni Umunye-Congo Gedeo Bendeka Mololia ukinira Etincelles FC aho yifashije kwegukana amanota atatu y’umukino yahuyemo na Rutsiro FC ku Cyumweru.

Uyu rutahizamu yaguzwe muri Kabasha FC yo muri Repubulika Iharanira Demokarasi ya Congo.

Hakizimana Muhadjiri yongeye kwigaragaza mu mukino wa mbere yakiniyemo Police FC

Inshundura zanyeganyeze inshuro 16

Mu mikino umunani yakinwe guhera ku wa Gatanu, tariki ya 20 Mutarama, habonetsemo ibitego 16, ni ukuvuga ko impuzandengo ingana n’ibitego bibiri ku mukino.

Umukino Rayon Sports yatsinzemo Musanze FC 4-1 ku wa 24 Mutarama, ni wo wabonetsemo ibitego byinshi, kimwe n’uwo Police FC yatsinzemo Gorilla FC ibitego 3-2.

Uwo Kiyovu Sports yanganyijemo na Gasogi United ubusa ku busa, ni wo utarabonetsemo igitego mu gihe uwa Bugesera FC na Sunrise FC warangiye nta kipe itsinze, zombi zinganya igitego 1-1.

Nta mukinnyi watsinze ibitego birenze kimwe kuri uyu munsi.

Abakinnyi ba Police FC bishimira igitego cya kabiri batsinze Gorilla FC

Espoir FC irakataje mu guharura inzira igana mu Cyiciro cya Kabiri

Mu gihe bamwe bibwiraga ko ihagarikwa rya Bisengimana Justin rishobora kuba igisubizo kuri Espoir FC, si ko byagenze kuko iyi kipe ikomeje kugana mu manga.

Iyi kipe y’i Rusizi yahagaritse Bisengimana ku wa 19 Ukuboza, ibihano by’ukwezi birangira ku wa Kane w’icyumweru gishize. Hagati aho, hitabajwe umutoza w’Umurundi Niyonkuru Gustave, ariko ntiyatoje umukino wo ku wa Gatandatu kubera ko iby’umutoza yasimbuye bitararangira.

Bipfubusa Méthode wasigaranye ikipe ntiyabashije kuyicungura kuko yatsindiwe mu rugo na Rwamagana City FC igitego 1-0.

Gutsindwa uyu mukino byatumye Espoir FC ikomeza urugendo rwayo rushobora kuyigeze mu Cyiciro cya Kabiri kuko ifite amanota arindwi ku mwanya wa nyuma.

Ibi ibisangiye na mugenzi wayo, Marines FC, na yo yanyagiwe na AS Kigali ibitego 3-0 ku wa Gatandatu, ikomeza kugira amanota arindwi mu myanya ibiri ya nyuma.

Mukansanga Salima yatutswe n’abafana ba Kiyovu Sports

Kimwe mu byagarutsweho cyane mu mpera z’icyumweru twasoje ndetse bikomeje kugarukwaho no muri iki turimo, ni imyitwarire bamwe mu bafana ba Kiyovu Sports bagaragaje ku mukino bari bakiriwemo na Gasogi United ku wa 23 Mutarama.

Aba bafana ntibishimiye ibyemezo bitandukanye byafashwe n’umusifuzi wo hagati, Mukansanga Salima, byatumye bamuririmba bati “Warakecuye”, ahandi bati “Malaya, Malaya, Malaya!”

Bimwe mu byemezo byateje ibi birimo ikosa Mukansanga yasifuye ko ryakorewe kuri Bigirimana Abeddy kandi yari afite umupira neza ku buryo yashoboraga gutangiza ‘contre-attaque”.

Ibindi ni icyo bo babonaga nka penaliti ku mupira wakozwe na Maxwell Djoumekou mu rubuga rw’amahina, n’umupira bivugwa ko waba wararenze umurongo nubwo nta mashusho abigaragaza neza.

Ikipe ya Kiyovu Sports yitandukanyije n’iyi myitwarire, Ishyirahamwe Nyarwanda rya Ruhago (FERWAFA) ryamagana aba bafana, ariko haracyategerejwe n’ibihano bishobora kubikurikira.

Umusifuzi Mukansanga Salima yatutswe n'abafana ba Kiyovu Sports bamushinje kubiba

Amakipe makuru nta kosa yakoze

Uretse Kiyovu Sports na Gasogi United zahuye ziri mu makipe atanu ya mbere, bikarangira rubuze gica, andi makipe akomeye yitwaye neza.

AS Kigali ibifashijwemo na Koné Félix, Tuyisenge Jacques na Shabani Hussein ‘Tchabalala’, yakomeje kugundira umwanya wa mbere n’amanota 33 nyuma yo kunyagira Marines FC ibitego 3-0.

Rayon Sports yafashe umwanya wa kabiri itsinze Musanze FC ibitego 4-1 naho APR FC na yo igira amanota 31 ku mwanya wa gatatu [iyanganya na Murera] nyuma yo gutsinda Mukura VS igitego 1-0 cyinjijwe na Niyibizi Ramadhan.

Abatsindiye Rayon Sports ni Mitima Isaac, Ngendahimana Eric, Nsengiyumva Isaac witsinze na Musa Esenu mu gihe Musanze FC yatsindiwe na Peter Agblevor.

Kuva kuri AS Kigali ya mbere kugeza kuri Gasogi United ya gatanu, ikinyuranyo cy’amanota ni ane gusa.

AS Kigali yakomeje gushimangira umwanya wa mbere

APR FC, Bugesera FC, Musanze FC na Espoir FC zatangiye zidafite umutoza mukuru

Mu Rwanda ni ho uzumva ikipe ishobora kumara ukwezi nta mutoza mukuru, inshingano zifitwe n’uwari wungirije mbere y’uko undi agenda.

Ubwo Shampiyona yasubukurwaga, amakipe ya APR FC, Bugesera FC, Musanze FC na Espoir FC yatangiye nta batoza bakuru afite.

APR FC yatandukanye na Erradi Adil Mohammed mu Ugushyingo, itozwa na Ben Moussa nk’umutoza w’agateganyo.

Ni ko kandi bimeze kuri Bugesera FC iheruka gutandukana na Ndayiragije Étienne, kuri ubu itozwa na Mutarambirwa Djabil ndetse na Musanze FC iri gutozwa na Nyandwi Idrissa kuko yanze gufata umwanzuro wo kwirukana Frank Ouna wataye akazi.

Espoir FC yazanye umutoza Niyonkuru Gustave ariko ntaratangira akazi kubera ko iyi kipe itararangizanya na Bisengimana Justin yahagaritse.

Amategeko ya FERWAFA ateganya ko ikipe idashobora kurenza amezi atatu idafite umutoza ufite Licence A cyangwa B ya CAF.

Gusa, ibi ntibireba APR FC kuko abatoza bayo barimo Ben Moussa na Jamel Eddine Neffti babyujuje ndetse byitezwe ko ari bo bazasoza uyu mwaka w’imikino nk’ubuyobozi bwabo bubivuga.

Ben Moussa wari wungirije Adil Mohammed Erradi, ni we wasigaranye APR FC

Abafana babaye iyanga ku bibuga

Ubwitabire bw’abafana ku bibuga ntibwari bushamaje ku mikino y’Umunsi wa 16 wa Shampiyona.

Mbere y’uko Shampiyona isubukurwa, amakipe arindwi yari asanzwe yakirira imikino yayo kuri Stade ya Kigali, yasabwe gushaka ahandi ajya kuko iyi stade yatangiye kuvugururwa.

Rayon Sports, Kiyovu Sports na Police FC zahisemo kujya i Muhanga naho APR FC, Gorilla FC, AS Kigali na Gasogi United zihitamo kujya mu Bugesera.

Kuba imikino yaragiye mu ntara, abafana bakaba basabwa gukora urugendo rurerure bajya ku kibuga ndetse hakiyongeraho kugura itike ibinjiza ku mikino, biri mu byatumye ubwitabire buba hasi.

Ikindi ni ukuba imikino itandukanye yarabaye mu mibyizi, indi igahurirana n’iya za shampiyona zikomeye i Burayi.

Ubwitabire bw'abafana ntibwari bushamaje ku bibuga

Amakipe yatangiye adafite inkingi zayo za mwamba

Ikindi kiri mu byaranze Umunsi wa 16 wa Shampiyona ni ibura rya bamwe mu bakinnyi bari bitezwe mu makipe atandukanye.

Muri Rayon Sports, bamwe mu bafana bayo bari bategereranyije amatsiko kongera kubona Umunye-Congo Nzinga Héritier Luvumbu, ariko ntiyakinnye umukino wa Musanze FC kubera ibyangombwa.

Uyu rutahizamu w’imyaka 30, ntiyahise yandikishwa na Rayon Sports kubera ko iby’amafaranga iyi kipe yagombaga Abanya-Portugal bayitoje byari bitarakemuka kugeza ku wa Kabiri mu gitondo. Gusa, byitezwe ko azagaragara ku mukino wa Mukura VS uzaba ku wa Gatandatu, tariki ya 28 Mutarama.

APR FC na yo yasubukuye Shampiyona idafite abakinnyi bayo ngenderwaho, Manishimwe Djabel na Buregeya Prince, bafite imvune.

Musanze FC iri mu makipe yagowe no kubonera ku gihe ibyangombwa by’abakinnyi bashya, byatumye myugariro wayo Shafik Bakaki adakina umukino wa Rayon Sports.

Umunya-Nigeria Nicholas Ashade Ayomide na we ntiyakiniye ikipe ye kubera ko atarabona ibyangombwa.

Musanze FC na Rayon Sports zakinnye zidafite abakinnyi bazo bashya kubera ibyangombwa

Inzoga n’amasogi byararikoroje i Muhanga

Habuze gato ngo bibe mpaga i Muhanga! Umukino Rayon Sports yakiriyemo Musanze FC ku wa Kabiri, watangiye ukereweho hafi iminota 15.

Uku gutinda byatewe n’uko iyi kipe yari yakiriye umukino, yari yambaye amasogi y’ubururu aciye ku buryo hasi hagaragara umweru kandi muri FERWAFA haratanzwe ibara rimwe.

Icyateje impaka kurushaho ni uko Musanze FC yari yahisemo kwambara umweru, ku buryo amasogisi ya Rayon Sports yasaga n’aho ahuriye n’aya Musanze FC hasi hegereye inkweto.

Mu gihe ibyo byaberaga mu rwambariro, mu myanya y’icyubahiro hari intambara ishingiye ku nzoga n’ibindi binyobwa byazanywe n’uruganda rwa SKOL.

Amabwiriza ya FERWAFA avuga ko ibinyobwa n’ibindi bintu birimo ibiribwa bizanwa ku kibuga bigomba kuba bitari mu bikoresho bikomeretsa nk’amacupa, imishito n’ibindi.

SKOL ijya yakira abishyuye amafaranga menshi n’abashyitsi ku mikino ya Rayon Sports, yari yazanye ibinyobwa byayo mu macupa yari muri firigo, ariko byakuruye impaka.

Abakozi bayo basobanuriye abashinzwe umutekano ko nubwo inzoga ziri mu macupa ariko zitangwa mu ducupa twa pulasitike dukoreshwa rimwe, ku buryo bitateza ikibazo zitanzwe.

Umwe mu bari bashinzwe umutekano yabwiye aba bakozi ko amabwiriza yahawe atayarengaho, ariko na bo bamubera ibamba bavuga ko ibyo bakora babizi ku buryo bitagiye guhinduka kuri uyu mukino.

Byabaye ngombwa ko Umunyamabanga Mukuru wa FERWAFA, Muhire Henry wari ku kibuga, agirana ibiganiro n’abayobozi ba Rayon Sports barimo Visi Perezida wayo, Ngoga Roger n’Umunyamabanga, Namenye Patrick, hemezwa ko bikorwa uko byari bisanzwe, ibinyobwa bigatangwa mu macupa ya parasitike.

Amasogisi ya Rayon Sports yatumye umukino ukererwa hafi iminota 15
Musanze FC yari yambaye amasogisi y'umweru ku buryo hari aho yari guhurira n'aya Rayon Sports
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza