Benshi mu bakunzi b’umupira w’amaguru bamaze igihe bategerazanyije amatsiko ikizava mu kuvugura Stade ya Huye n’uko izaba isa iyo mirimo nirangira kugira ngo bajye bayicaranamo umunezero bareba imikino itandukanye irimo n’iyo ku rwego mpuzamahanga.

Imirimo yo kuyivugurura yatangiye ku wa 22 Mata 2022, kuri ubu ibice bitandukanye biyigize byamaze kuzura ndetse n’ibikoresho biyigezwamo ariko abakora isuku n’indi mirimo ya nyuma baracyari mu kazi kugira ngo irusheho gusa neza.

Umwanzuro wo kuyivugurura ahanini waturutse ku kuba isuzuma ryakozwe ryaragaragaje ko u Rwanda nta Stade n’imwe rufite yemerewe kwakira irushanwa ry’Impuzamashyirahamwe y’Umupira w’Amaguru muri Afurika (CAF) n’Ishyirahamwe ry’Umupira w’Amaguru ku Isi (FIFA).

Nyuma y’ukwezi kurenga tubagejejeho inkuru igaragaza uko iri kuvuguruwa, twongeye kuyisura kugira ngo turebe intambwe imaze guterwa. Kuri ubu imirimo myinshi yararangiye.

Ikibuga

Ugeze imbere muri Stade ya Huye ubona ikibuga kimeze neza ndetse na ya migina yatumaga harekamo amazi yavuyemo kuko hashyizwemo ubwatsi (tapis synthétique) bwiza bworoshye bitandukanye n’ubwo yahoranye itaravugururwa.

Mu nkengero z’ikibuga hashyizweho imiyoboro y’amazi ku buryo adashobora kwinjira aho abakinnyi bakinira nk’uko mbere byagendaga bigatuma rimwe na rimwe umukino uhagarara.

Hashyizwemo amazamu meza ndetse n’inyuma yaho hasaswa ubwatsi bwiza bubereye ijisho [mbere hahoze itaka] ndetse ni naho abakinnyi b’abasimbura bazajya bishyuhiriza mbere yo kwinjira mu kibuga.

Amatara acanira ikibuga nijoro na yo yamaze kuvugururwa atanga urumuri rwiza ku rugero rwa Lux 1800 ku buryo ikibuga cyose kigaragara neza.

Abahanga bavuga ko amatara yaka neza muri Stade agomba kuba atanga urumuri rwa Lux ziri hagati ya 1200 na 1800.

Intebe zicarwaho n’abakinnyi b’abasimbura na zo zamaze kugezwamo ndetse zifite umwanya ushobora gushyirwamo icupa ry’amazi.

Imyanya y’abanyacyubahiro

Aho abanyacyubahiro bicara hashyizwe intebe nziza zabugenewe ku buryo bicara neza bafite ahantu ho gutereka icupa ry’amazi n’aho gushyira amaboko.

Mu myanya y’icyubahiro cy’abo ku rwego rwo hejuru n’ababakurikira hazajya hicara abantu bageze kuri 500.

Inyuma y’aho abanyacyubahiro bicara hateganyijwe n’aho bafatira ikawa hameze neza kandi naho harimo aho kuyitangira, aho kwicara ndetse n’intebe zagenewe kwicaraho unywa unareba umukino.

Imyanya y’abanyamakuru

Aho abanyamakuru bicara hamaze gutunganywa hashyirwa intebe n’ameza mu byumba bicaramo, aho gucomeka mudasobwa n’imigozi ya murandasi n’ibindi.

Mu byumba bine bito byagenewe abanyamakuru basesengura umukino uri kuba, hashyizwemo ikoranabuhanga riborohereza akazi.

Hari n’icyumba cyagenewe abanyamakuru aho bazajya bakorera inama bakahatangira n’ibiganiro kandi hari ahagenewe gutereka ibyuma byabo bifata amajwi n’amashusho.

Gusa igice cyo hanze cyo kiracyatunganywa kuko nta meza n’intebe birahashyirwa. Aho kandi hazajya hashyirwa lisiti z’amakipe agiye gukina kugira ngo bibafashe mu kazi kabo.

Ikindi kitarashyirwaho ni televiziyo ishobora korohereza umunyamakuru kureba mu mashusho agenjwe buhoro (Slow Motions) icyabaye mu kibuga.

Abashinzwe kuvugurura Stade ya Huye babwiye IGIHE ko mu gihe gito na byo bizaba byamaze gushyirwamo kuko bihari.

Aho abafana bicara

Mu gice kidatwikiriye aho abafana bicara hashyizwe intebe nziza zegamirwa ku buryo babasha kureba umukino nta nkomyi.

Ni intebe zifite ubushobozi bwo kunyagirwa cyangwa zigakubitwa n’izuba ntizigire icyo ziba ariko zizajya zinatwikirwa nyuma yo gukora isuku kugira ngo zikomeze gusa neza. Zamaze kugezwamo zose hasigaye kuzishyiraho nimero ku buryo umufana azajya agura itike agahita amenya n’intebe azicaraho.

Mu bice bitandukanye abafana bicaramo hashyizwemo uburyo bwo gusakaza amajwi ku buryo amatangazo n’ibindi bivugirwa muri Stade babasha kubyumva neza.

Ku gice cyo hirya y’ikibuga aho abafana bicara bareba, hashyizwe uruzitiro rwiza ruzajya rwamamarizwaho ibikorwa bitandukanye by’abafatanyabikorwa n’abandi bifuza kumenyekanisha ibyo bakora.

Imbere mu byumba hateye amabengeza

Imbere mu byumba bya Stade ya Huye haravuguruwe, uhereye aho abakinnyi basohokera haratwikiriye kandi hashyizwe amakaro atanyerera.

Mu gice cyo hasi hari ibyumba bibiri by’urwambariro rw’abakinnyi, kimwe kirimo utubati 25 dufite aho buri wese yicara n’aho abika ibikoresho bye n’ahagomba kwandikwa amazina na nimero.

Ku nkuta hashyizwe televiziyo zifasha umukinnyi uri mu rwambariro kureba no kumva ibiri kubera mu kibuga. Aho abakinnyi b’ikipe imwe bambarira hari ubwiherero butanu n’ubwogero butanu.

Harimo ibyumba by’ibiro bitatu [icya CAF, FERWAFA n’ikindi cy’agateganyo] byashyizwemo ikoranabuhanga ryifashisha amashusho (Video assistant referee, VAR) rigenzura ibyabaye mu kibuga igihe umusifuzi atahise abibona neza.

Hari ibyumba bibiri by’inama, icyumba cy’abasifuzi, ibyumba bibiri by’abashinzwe kugarura imipira hanze y’ikibuga n’ibyumba bibiri by’abatoza.

Muri buri cyumba harimo ibiro, ubwogero n’ubwiherero n’ahabikwa ibikoresho ndetse n’ikoranabuhanga ryoroshya akazi no gukurikira ibiri kubera mu kibuga n’aho abafana bicaye.

Ibitanda bitwara abakinnyi bagize ikibazo byamaze kugezwamo ndetse n’ibikorerwaho masaje (Massage Table), urubaho rw’amayeri rukoreshwa n’abatoza basobanurira abakinnyi imikinire n’amakaramu akoreshwa.

Muri buri cyumba hashyizwemo uburyo butuma hazamo umuyaga mwiza uvuye mu byuma byabugenewe (air-conditioners).

Hari icyumba cyihariye gipimirwamo ibiyobyabwenge, kirimo ibisabwa byose birimo TV, ibitanga umuyaga mwiza ndetse n’ubwiherero buri aho hafi.

Hari n’icyumba cyagenewe ubutabazi bw’ibanze ku buryo umukinnyi ugize ikibazo ajyanwa kuhavurirwa na muganga. Hari n’aho imbangukiragutabara yagenewe guparika igihe bibaye ngombwa ko ijyana umukinnyi kwa muganga.

Parking

Stade ya Huye ifite imyanya 500 yo guparikamo imodoka harimo 95 y’iz’abanyacyubahiro n’indi 405 yagenewe imodoka z’abafana basanzwe.

Mbere itaravugururwa habaga akavuyo n’umuvundo bitewe n’uko imodoka zaparikwaga ahabonetse hose.

Hari ibyumba 12 byagenewe cantine zicururizwamo ibintu bitandukanye bikenerwa ku kibuga nk’amazi, imitobe n’ibindi.

Amarembo

Kuri buri muryango winjira n’usohoka muri Stade ya Huye hari gushyirwa amagambo asobanurira abafana mu rurimi bumva n’aho bagomba kwekerekeza.

Hari n’igice cyagenewe OB VAN (Studio ya radio na televiziyo igendanwa) ku buryo abanyamakuru bashobora gutambutsa umukino uri kuba ako kanya.

Hamaze kugezwa ikoranabuhanga rifasha kugenzura amatike y’abafana ndetse no kumenya umubare w’abinjiye muri Stade bitabaye ngombwa ko umuntu afata umwanya wo kubabara.

Aho abantu binjira no mu bice bitandukanye hashyizwe camera zifata ibintu byose biyiberamo ku buryo nta kibazo cy’umutekano muke gishobora kuhaba kitatahuwe kare.

Moteri zitanga umuriro na zo zamaze gushyirwamo ku buryo nta kibazo cy’ibura ryawo kizongera kubaho.

Abaturage bishimira ko bahawe akazi

Imirimo yo kuvugurura Stade ya Huye yatanze akazi ku baturage biganjemo abo mu Karere ka Huye kuko hari abagera kuri 480 bahawe akazi kadahoraho naho abagera kuri 70 bagahawe ku buryo buhoraho.

Bamwe mu bamaze igihe bahakora bavuga ko bahakuye amafaranga bafasha kwibeshaho no gukora ibindi bifuza.

Nyandwi Valentin ati “Maze amezi abiri nkora muri Stade Huye, byangiriye akamaro kubera ko nabonye ibitunga umuryango kandi mbona n’uburyo bwo kwishyura mituweli n’abana bariga.”

Musabyemariya Sofia na we yavuze ko amaze amezi hafi abiri ahakora kandi yahakuye amafaranga amufasha kugura ibyo akeneye.

Ati “Amfasha kwishyura inzu, mu miririre no mu myambarire no kwishyura mituweli kandi nkagura n’ibindi nkeneye.”

Umuyobozi w’Akarere ka Huye Wungirije Ushinzwe Iterambere ry’Ubukungu, Kamana André, yavuze ko Stade Huye izagira akamaro kanini mu iterambere ry’abaturage, akarere n’igihugu.

Ati “Mbere na mbere ni ibyishimo ku Banye-Huye kuba bafite stade iri ku rwego mpuzamahanga. Ikindi ni mu rwego rwo gushimisha abantu bareba imikino no kwinjiza amafaranga.”

Yavuze kandi ko ari inyungu ku bikorera bafite amahoteli n’abakora ubundi bucuruzi kuko igihe habaye imikino bazajya bunguka amafaranga menshi.

Ibikoresho byinshi byakoreshejwe mu kuba Stade ya Huye birimo amakaro, amarangi, ibyuma n’ibindi biboneka mu Rwanda ariko ibijyanye n’ikoranabuhanga byinshi byaguzwe mu mahanga.

Imaze gutwara asaga miliyari 10 Frw

Umuhanga mu by’ubwubatsi, Dusingizimana Marc, ukorera sosiyete yahawe isoko ryo kuvugurura Stade ya Huye, yavuze ko bitarenze tariki 15 Kanama 2022 imirimo yose izaba yarangiye.

Yavuze ko kugeza ubu Stade Huye ifite ubushobozi bwo kwakira abantu 7900 ariko nibamara kuvugurura mu cyiciro cya kabiri kizakurikiraho izajya yakira abagera ku bihumbi 10.

Ati “Imirimo yo kuvugurura ubu ngubu imaze gutwara hafi miliyari 10 z’amafaranga y’u Rwanda.”

Mu cyiciro cya kabiri hazakemurwa ikibazo cy’amahuhwezi y’imvura anyagira abicaye mu myanya y’icyubahiro bitewe n’uko igisenge cyashyizweho nabi ubwo yubakwaga bwa mbere.

Ahantu hagenewe gufatira ikawa mu cyumba kiri inyuma y'aho abanyacyubahiro barebera umukino

Aha ni muri kimwe mu byumba bya cantine, ahazajya hacururizwa amazi n'ibindi bikenewe

Umwanya wahariwe guparikamo bus zitwaye abakinnyi

Ahagenewe gutangirwa ikawa n'icyayi muri Stade ya Huye

Abashyitsi binjira muri Stade ya Huye bashyiriweho ahantu bazajya bakirirwa

Aho abakinnyi basohokera berekeza mu kibuga haratwikiriwe ndetse hubakwa mu buryo bugezweho

Urwambariro rwaravuguruwe bijyanye n'igihe. Buri mukinnyi afite aho yicara n'akabati abikamo ibikoresho bye

Abanyamakuru na bo bubakiwe ahantu hitaruye bashobora kurebera umukino ndetse bakanawusesengura nta wubateye icyugazi

Imbere mu byumba bya Stade ya Huye hashyizwemo amatara meza. Urabona ko abereye n'ijisho

Imikino ya nijoro ishobora kuba nta nkomyi! Amatara ya Stade ya Huye yaravuguruwe ajyanishwa n'akenerwa kandi ashobora kwifashishwa ku mikino mpuzamahanga

Amazamu yari muri Stade ya Huye mbere yarasimbujwe. Hashyizwemo andi ashobora kwimurwa kandi yujuje ubuziranenge mpuzamahanga

Yubatse nka stade zimenyerewe hanze aho abafana baba begereye ikibuga gikinirwaho

Buri gice cyagiye cyandikwaho mu korohereza abinjira muri Stade ya Huye kumenya aho bari bwinjirire

Aho umukinnyi abika ibikoresho bye haba hari na nimero ye kugira ngo hatabaho kubyitiranya n'abandi

Ikipe yasuye na yo yagenewe ahantu imodoka yayo izajya iparika nyuma yo kwinjira muri stade

Intebe zamaze kugezwa muri stade. Ubu hagiye gukurikiraho icyiciro cyo kuzandikaho nimero ku buryo umuntu azajya yicara ku mwanya uri kuri tike yaguze

Hari n'igice cyihariye cyagenewe gushyirwamo imodoka yifashishwa mu gutunganya no kwerekana amashusho kuri Televiziyo [OB Van]

Ibyuma bifasha mu gusakaza amajwi muri Stade ya Huye byamaze gushyirwamo

Ibyuma bigenzura abinjira muri stade byarahinduwe mu gusuzuma ko nta wakwinjirana ibikoresho bitemewe cyangwa ibindi bishobora guhunganya umutekano w'abantu

Abasifuzi b'umukino na bo baba bafite icyumba cyabo cyihariye

Igice cya Stade Huye cyicaramo abanyacyubahiro kiratwikiriye

Igitanda cyabugenewe kizajya cyifashishwa mu gutwara umukinnyi ugize ikibazo nk'icy'imvune

Iki ni kimwe mu byumba by'abayobozi b'umukino. Aba barimo ba komiseri cyangwa abayobozi baturutse mu Mpuzamashyirahamwe y'Umupira w'Amaguru muri Afurika

Iki cyumba kizajya kiberamo inama

Ng'icyo ikibuga gishya cya Stade ya Huye

Imiterere y'amatara yashyizwe imbere mu byumba

Hafi y'aho abashyitsi bakirirwa hashyizwe intebe nziza baba bicayemo bategereje guhabwa serivisi

Intebe abafana bicaramo zitakishijwe amabara yerekana ibendera ry'u Rwanda

Uri mu cyumba anyweramo ikawa cyangwa ka cyayi ashobora no gutera akajisho mu kibuga, akareba ibiri kuberamo

Intebe z'abafana bicara ahadatwikiriye ni uku zimeze

Intebe zagenewe abakinnyi b'abasimbura zifite n'aho buri wese atereka amazi yo kunywa

Imbere mu cyumba abanyacyubahiro bashobora kuruhukiramo no kuganiriramo ni uku hateye

Aho abakinnyi b'abasimbura n'abatoza bicara na ho haravuguruwe cyane

Mu myanya y'icyubahiro hashyizwemo intebe nziza ziteye amabengeza

Hari televiziyo ya rutura yerekana umukino uri kuba ako kanya

Iyi foto igaragaza intebe abakinnyi b'abasimbura b'icaramo ndetse n'izo abareba umukino bicaraho mu myanya y'icyubahiro. Nta kongera guhengeza ukundi nk'uko bimeze ku zindi stade aho wasangaga hari inkuta zituma abari mu myanya yiyubashya batareba neza umukino

Mu biro biri muri Stade ya Huye hamaze gushyirwamo intebe n'ameza

Stade ya Huye kuri ubu ni imwe mu zifite ubushobozi bwo kwakira imikino mpuzamahanga

Mu kibuga ndetse n'inyuma y'amazamu hashyizwe ubwatsi bwiza

Iyo wicaye ahatwikiriye ni uku uba ureba stade yose imbere yawe

Ishusho ya Stade ya Huye uyirebye uyitegeye uhagaze mu kindi gice cyayo

Parking yagenewe imodoka z'abafana yakira izigera kuri 405

Ku marembo ya Stade ya Huye. Hatakishijwe imigongo ndetse n'ikirango cya Repubulika y'u Rwanda

Stade ya Huye yaravuguruwe irushaho kuba nziza. Ifite amateka ko iri mu zakiriye imikino ya CHAN yabereye mu Rwanda mu 2016

Tapis yabugenewe ni yo yashyizwe aho abakinnyi banyura basohoka mu kibuga

Abakinnyi bashyiriweho ubwogero n'ubwiherero bigezweho

Umuryango werekeza mu cyumba cy'urwambariro rw'ikipe imwe mu zakinnye

Amafoto: Munezero Emmanuel