IGIHE

Chelsea yatandukanye n’Umutoza Mauricio Pochettino

0 21-05-2024 - saa 22:15, Eric Tony Ukurikiyimfura

Uwari Umutoza wa Chelsea FC yo mu Cyiciro cya Mbere mu Bwongereza, Mauricio Pochettino, yavuye mu nshingano nyuma y’umwaka umwe w’imikino yari amaze muri iyi kipe.

Pochettino w’imyaka 52, yagizwe Umutoza wa Chelsea ku wa 1 Nyakanga 2023, asinya amasezerano y’imyaka ibiri ishobora kongerwaho undi umwe.

Uyu Munya-Argentine yari ku gitutu nyuma yo kugira umusaruro mubi mu mikino ibanza ya Shampiyona, ariko intsinzi eshanu yabonye mu mikino isoza umwaka w’imikino yatumye ikipe iba iya gatandatu muri Premier League.

Chelsea yabaye kandi iya kabiri muri Carabao Cup, inasezererwa muri 1/2 cya FA Cup.

Mu butuma bwe nyuma yo gutandukana n’iyi kipe, Pochettino yagize ati "Ndashimira ba nyiri Chelsea n’abayobozi bakuru bayo ku mahirwe bampaye. Ubu ikipe iri mu mwanya mwiza wo kwitwara neza muri Premier League n’i Burayi mu myaka iri imbere."

Kuri ubu, Chelsea igiye gushaka umusimbura wa Pochettino ndetse abatangiye gutekerezwaho ni Kieran McKenna utoza Ipswich, Ruben Amorim wa Sporting na Vincent Kompany wa Burnley.

Pochettino yari umutoza wa gatandatu wa Chelsea mu myaka itanu, aho yakurikiye abarimo Thomas Tuchel na Graham Potter birukanywe, Frank Lampard agahabwa ikipe by’agateganyo mu mwaka w’imikino wa 2022/23.

Chelsea yatsinze imikino 27 muri 51 yatojwemo na Pochettino, itsindwa 14 mu gihe yanganyije 10.

Pochettino yavuye muri Chelsea nyuma y'umwaka umwe w'imikino yari ayimazemo
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza