IGIHE

Arjen Robben wari warasezeye yatunguranye atangaza ko agiye gukinira ikipe yakuriyemo

1 28-06-2020 - saa 14:20, Eric Tony Ukurikiyimfura

Nyuma y’umwaka umwe asezeye gukina umupira w’amaguru, uwahoze ari rutahizamu wa Chelsea, Real Madrid na Bayern Munich, Arjen Roben, yatangaje ko agiye kugaruka mu kibuga akinira FC Groningen yakinnyemo akiri muto.

Arjen Robben w’imyaka 36, yasezeye gukina umupira w’amaguru muri Nyakanga 2019 nyuma yo kwegukana ibikombe 30 mu makipe yose yakiniye.

Gusa yizeye kugaruka mu kibuga mu mwaka w’imikino wa 2020/21 kugira ngo afashe FC Groningen yagizweho ingaruka n’ihagarikwa ry’umupira w’amaguru kubera icyorezo cya Coronavirus.

Arjen Robben yagize ati “Ni inzozi zanjye kwambara umwambaro wa Groningen na none.”

“Ntabwo ndamenya neza niba ibi bizakunda. Icyo nemeza nzi ni uko bitazaterwa no kwiyemeza cyangwa ishyaka ryanjye.”

“Ikipe ishobora gukoresha ubufasha ubwo aribwo bwose muri iki gihe kugira ngo isohoke mu ihungabana ry’ubukungu ryatewe na Coronavirus.”

“Ibi byumweru bishize, nagize ibiganiro byinshi n’abayobozi b’ikipe birashoboka ko numvise ugusaba kw’abafana bacu: Arjen, kurikiza ibyo umutima wawe ushaka!”

Arjen Robben wakiniye u Buholandi imikino 96 nyuma yo gukina bwa mbere muri Groningen afite imyaka 16, tariki ya 3 Ukuboza 2000.

Groningen yari iya icyenda ubwo shampiyona y’icyiciro cya mbere mu Buholandi, Eredevsie ya 2019/20, yahagarikwaga ikanafatwa nk’itarakinwe kubera icyorezo cya Coronavirus cyibasiye Isi.

Imikino ya mbere y’umwaka utaha w’imikino byitezwe ko izakinwa muri Nzeri hafi nyuma y’amezi atandatu Groningen itsinzwe na PSV Eindhoven mu mukino iheruka gukina.

Arjen Robben agiye gusubira mu kibuga akinira FC Groningen yakurikiyemo akayikinira imyaka ibiri kugeza mu 2002
Arjen Robben w'imyaka 36, yari yasezeye gukina umupira w'amaguru muri Nyakanga 2019
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Isiyanone 2020-06-28 12:01:43

Urumwe mubakinnyi babahanga banciye mumaso ntazibagirwa.

Kwamamaza