IGIHE

Russell Westbrook yerekeje muri Houston Rockets abisikana na Chris Paul

1 12-07-2019 - saa 09:08, Eric Tony Ukurikiyimfura

Amakipe abiri yo muri shampiyona ya Basketball muri Amerika, NBA, Oklahoma City Thunder na Houston Rockets yemeranyijwe kugurana abakinnyi, aho Oklahoma yatanze Russell Westbrook abisibikana na Chris Paul wavuye muri Rockets.

Westbrook agiye kongera gukinana na James Harden babanye muri Oklahoma City Thunder hagati ya 2009 na 2012.

Oklahoma City Thunder kandi izabona n’abakinnyi ba mbere bazafatwa na Houston Rockets mu 2024 na 2026 (draft).

N’ubwo kugeza ubu amakipe yombi ataratangaza ko yamaze kumvikana, Umuyobozi wa Houston Rockets, Tilman Fertitta, yatangarije Fox26Houston ko bamaze kumvikana.

Ati "Dushimishijwe no kubona Russell Westbrook. Najyaga mureba akina muri Oklahoma City. Ni umukinnyi ukomeye. Ntabwo byari gushoboka atari Chris Paul urimo kandi na we ni umukinnyi tuzakumbura. Turakeka bizafasha ikipe yacu gukomera. Ntabwo bidushimishije gutakaza Chris Paul, ariko ibyo twakoze turacyeka bizadufasha kuba ikipe nziza.”

Chris Paul w’imyaka 34, agomba guhabwa miliyoni $125 ku masezerano y’imyaka itatu yari afite harimo miliyoni $44.2 z’umwaka wa 2021-22.

Westbrook uzuza imyaka 31 mu mwaka utaha we azahabwa miliyoni $171 mu masezerano y’imyaka ine yari asanganywe.

Chris Paul watanze imipira 9,181 kuri bagenzi be, amaze gukina All-Star inshuro icyenda mu gihe Westbrook ari umwe mu bakinnyi bakomeye ku rwego rwa Magic Johnson na Oscar Robertson, aho yakoze ‘Triple-double’ inshuro 138, ndetse akaba amaze gukina All-Star inshuro munani.

Westbrook yakinanye na James Harden muri Thunder mu gihe cy’imyaka itatu, aho mu wa nyuma wa 2011-12, bari kumwe na Kevin Durant, bagejeje Oklahoma City mu mikino ya nyuma ya NBA, ariko bagatsindwa na Miami Heat ya LeBron James na Dwyane Wade.

Muri uwo mwaka nibwo Harden yahise atangwa muri Rockets, ndetse atangira gukina All-Star guhera icyo gihe.

Paul George na we akaba yaratanzwe na Thunder muri Los Angeles Clippers, ahahurira na Kawhi Leonard wavuye muri Toronto Raptors.

Russell Westbrook yatanzwe muri Houston Rockets, aho agiye kongera gukinana na James Harden
Chris Paul arerekeza muri Oklahoma City Thunder
Kawhi Leonard yagiye muri Los Angeles Clippers nyuma yo guhesha NBA ikipe ya Toronto Raptors
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
T Guss 2019-07-13 05:20:54

Ni ubwa mbere mbonye umunyamakuru wo mu Rwand wandika inkuru isukuye ya NBA !! Big Up Tony

Kwamamaza