IGIHE

Iby’ingenzi wamenya kuri SLAC na FAP zitegerejwe muri BAL 2022

0 17-05-2022 - saa 19:39, Mihigo Saddam

Kuva tariki 21-28 Gicurasi 2022 muri Kigali Arena hazakinirwa imikino ya nyuma y’irushanwa rihuza amakipe ahagaze neza muri Basketball (BAL), rizaba rikinwa ku nshuro yaryo ya kabiri. SLAC na FAP ni andi makipe ategerejwe muri iri rushanwa.

Ubwo BAL yakinwaga ku nshuro ya mbere, US Monastir yageze ku mukino wa nyuma ihatsindirwa na Zamalek yo mu Misiri amanota 76-63.

Seydou Legacy Athlétique Club (SLAC) ni imwe mu makipe umunani azaba ari muri Kigali yishakamo ikipe izakora amateka yo kwegukana irushanwa mu mwaka waryo wa kabiri.

Uretse SLAC kandi, muri Kigali Arena hazaseruka Forces Armées et Police Basketball (FAP, FAP Yaoundé) nayo yabonye itike yo gukina BAL ya 2022.

Seydou Legacy Athlétique Club (SLAC)

SLAC ni ikipe itamaze igihe kinini ishinzwe kuko yabayeho kuva mu 2004 mu Mujyi wa Conakry ikaba inakinira ku kibuga cya Palais des Sports du Stade du 28 Septembre.

Mu myaka 18 imaze ishinzwe, SLAC imaze gutwara ibikombe bitandatu bya Shampiyona ya Guinée birimo icyo iheruka mu 2021. Icya mbere yagitwaye mu 2015.

Iyi kipe iyoborwa na Abass Issaoui, ibikombe bitandatu bya shampiyona yatwaye, bitatu muri byo yabitwaye yikurikiranya (2015, 2016, 2017).

Muri rusange, imyaka SLAC yatwayemo igikombe ni; 2015, 2016, 2017, 2019, 2020 na 2021. Nta gikombe cy’igihugu iratwara.

Mu mwaka w’imikino 2018-2019 yasohokeye igihugu mu Mikino Nyafurika ihuza amakipe yabaye aya mbere iwayo, isezererwa ikiri mu matsinda.

Muri iryo rushanwa, amateka kuri yo ni uko yakinnye umukino wa mbere mpuzamahanga ihura na Jeunesse Sportive Kairouanaise yo muri Tunisie.

Muri BAL ya 2020 yakinwe mu 2021 kubera icyorezo cya COVID-19, ntabwo SLAC yabonye itike ya nyuma kuko yasezerewe ikiri mu ijonjora rya mbere.

Mbere yo kwinjira mu majonjora ya BAL 2020, ubuyobozi bwa SLAC bwahaye akazi umutoza w’Umunya-Serbie Željko Zečević w’imyaka 58 unayitoza magingo aya.

Željko Zečević yahawe akazi muri SLAC kuko amaze kumenyera Basketball ya Afurika. Yatoje US Monastir na Salée, amakipe azakina BAL ya 2022.

Forces Armées et Police Basketball (FAP)

Forces Armées et Police Basketball ni ikipe yo mu gihugu cya Cameroun izakina BAL ya 2022, irushanwa izaba ikina ku nshuro ya kabiri. Mu irushanwa riheruka, FAP yagarukiye muri ¼ cy’irangiza.

Mu mikino ya BAL 2022, FAP izatangira ihura na REG BBC Basketball Club ihagarariye u Rwanda. Umukino uzakinwa kuwa Gatandatu tariki 21 Gicurasi 2022 guhera saa kumi n’ebyiri n’igice ku masaha y’i Kigali.

Iyi kipe yanamaze kugera mu Rwanda, yashinzwe mu 1972 ikaba ikinira ku kibuga cya Yaoundé Multipurpose Sports Complex cyakira abantu 5263, aho yubatswe mu 2009.

Iyi kipe y’Igisirikare cya Cameroun yatwaye ibikombe bibiri bya Shampiyona, inabitse ibikombe bitatu bya Shampiyona yo mu gice cyo Hagati.

Mu 2019, FAP yinjiye mu majonjora yo gushaka itike ya BAL 2020 kuko Condor Basketball Club yari yabuze amikoro.

Mbere yo kwinjira mu mikino ya nyuma ya BAL ya 2020, ubuyobozi bwa FAP bwahaye akazi Lazare Adingono ko kubabera Umutoza Mukuru wanabahaye Shampiyona ya 2021.

Lazare Adingono ni Umunya-Cameroun w’imyaka 44 y’amavuko unafite ubwenegihugu bwa Leta Zunze Ubumwe za Amerika.

Lazare si mushya muri Basketball ya Afurika kuko yatoje Petro de Luanda yo muri Angola imyaka umunani (2012-2020), n’ikipe y’igihugu ya Cameroun.

Seydou Legacy Athlétique Club ni imwe mu makipe azaba akina imikino ya nyuma ya BAL ku nshuro ya mbere
Serigne Salious Mbaye ni undi mukinnyi wa SLAC uzatanga akazi katoroshye muri BAL ya 2022
Forces Armées et Police Basketball (FAP) iheruka muri 1/4 hitezwe kubera aho izagera uyu mwaka
Cédric Kenfack wa FAP umwe mu bakinnyi baba bitzweho gutsinda amanota menshi mu mukino yitezwe muri Kigali Arena
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza