IGIHE

BK Basketball National League: Imikino ya Playoffs iratangira kuri uyu wa Gatanu

0 12-07-2019 - saa 08:47, Eric Tony Ukurikiyimfura

Shampiyona y’umukino wa Basketball mu Rwanda irongera gusubukurwa kuri uyu wa Gatanu, ahateganyijwe imikino ibiri ya mbere ya Playoffs hagati y’amakipe yaje mu myanya ine ya mbere mu bagabo.

Nyuma y’uko imikino isanzwe ya shampiyona ya Basketball iterwa inkunga na Banki ya Kigali irangiye tariki ya 19 Gicurasi, harakurikiraho iya Playoffs guhera kuri uyu wa Gatanu tariki ya 12 Nyakanga.

Muri Playoffs, amakipe ane yabaye aya mbere mu bagabo no mu bagore, azakina ½, atanguranwa gutsinda imikino itatu muri itanu ishoboka, aho ikipe ya mbere izahura n’iya kane mu gihe iyabaye iya kabiri izahura n’iya gatatu.

Ibi bivuze ko mu bagabo, Patriots BBC yabaye iya mbere iratangira yisobanura na APR BBC yabaye iya kane mu mukino uteganyijwe kuri uyu wa Gatanu saa 19:00 mu gihe saa 21:00 REG BBC yabaye iya kabiri iza gucakirana na Espoir BBC yabaye iya gatatu. Imikino yombi irabera muri Petit Stade i Remera.

Amakipe azabasha kurenga ½, azahurira ku mukino wa nyuma. Aha ho, azatanguranwa gutsinda imikino ine muri irindwi ishoboka kugira ngo hamenyekanye amakipe yegukana igikombe cya shampiyona mu bagabo n’abagore muri uyu mwaka w’imikino.

Mu kiganiro FERWABA iheruka kugirana n’itangazamakuru, Perezida w’Ishyirahamwe ry’Umukino wa Basketball mu Rwnada (FERWABA), Mugwiza Désiré, yavuze ko bashimishijwe n’uburyo imikino ya shampiyona ibanziriza Playoffs yagenze, aho yagaragayemo guhangana ku rwego rwo hejuru.

Ati” Twarishimye nka Federasiyo, imikino ibanza n’iyo kwishyura uko yagenze, ingengabihe yarakurikijwe. Twakunze kunengwa ko ingangabihe ihinduka kubera impamvu z’amakipe, ariko byarakosotse. Guhangana kw’amakipe byariyongereye, byageze mu mikino ya nyuma tutaramenya neza uko shampiyona izarangira amakipe akurikiranye ndetse n’abafana baritabiriye cyane.”

Patriots BBC, REG BBC, Espoir BBC na APR BBC ni yo makipe yabaye aya mbere muri Shampiyona y’abagabo mu gihe mu bagore, ane ya mbere yabaye: The Hoops, IPRC- Huye, APR WBBC n’Ubumwe.

REG BBC iracakirana na Espoir BBC
Imikino ya Playoffs 2019 muri Basketball iratangira kuri uyu wa Gatanu
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza