IGIHE

Afrobasket: U Rwanda rwatsinzwe imikino itatu ruzisobanura na Misiri muri ¼

0 11-07-2019 - saa 09:05, Eric Tony Ukurikiyimfura

Ikipe y’igihugu y’ingimbi mu batarengeje imyaka 16 yatomboye guhura na Misiri muri ¼ cy’Igikombe cya Afurika cya Basketball kiri kubera mu Cap-Vert, ni nyuma y’uko isoreje ku mwanya wa kane mu itsinda B, aho yatsinzwe imikino itatu ya nyuma.

Ingimbi z’u Rwanda zari zatangiye neza muri iri rushanwa riri kuba ku nshuro ya gatandatu mu Mujyi wa Praia muri Cap-Vert, zitsinda Côte d’Ivoire amanota 62-60 mu mukino wa mbere wabaye ku Cyumweru.

Ku wa Mbere, u Rwanda rwatsinzwe na Guinée amanota 63-47, bukeye bwaho rutsindwa na Mali 70-40 mu gihe kuri uyu wa Gatatu rwatsinzwe umukino wa gatatu wikurikiranya, imbere ya Tunisia ku manota 88-75.

Ibi byatumye ikipe y’igihugu iba iya kane mu itsinda B, iza imbere ya Côte d’Ivoire yasezerewe nyuma yo gutsindwa imikino yose.

Mali yatsinze imikino ine yakinnye, Guinée yatsinze itatu na Tunisie yatsinze ibiri ni yo makipe yaje imbere y’u Rwanda ruri gukina iri rushanwa ku nshuro ya gatatu nyuma yo kuryitabira mu 2015 na 2017.

Nyuma y’imikino y’amatsinda yasojwe kuri uyu wa Gatatu, u Rwanda rwabaye urwa kane mu itsinda B ruzahura na Misiri yabaye iya mbere muri A nyuma yo gutsinda imikino yose yahuyemo na Nigeria, Angola, Cap-Vert na Algérie.

Uyu mukino wa ¼ uzaba ku wa Gatanu tariki ya 12 Nyakanga, aho ikipe izakomeza hagati y’u Rwanda na Misiri, izahura n’izakomeza hagati ya Angola na Guinée muri ½.

Misiri yegukanye iri rushanwa inshuro eshatu muri eshanu rimaze kubamo ndetse aho itaritwaye yatsindiwe ku mukino wa nyuma.

Mali ni yo ifite irushanwa riheruka yegukanye itsinze Misiri amanota 76-65 ubwo ryari ryabereye i Vacoas-Phoenix mu Birwa bya Mauritius mu 2017.

Misiri yatsinze u Rwanda amanota 101-45 ubwo bari kumwe mu itsinda B ry’irushanwa riheruka.

Uko amakipe azahura muri ¼ (imikino izaba ku wa Gatanu)

  • Rwanda vs Misiri
  • Angola vs Guinée
  • Cap-Vert vs Mali
  • Tunisie vs Nigeria
Umukino wa Mali ni umwe mu yagoye ingimbi z'u Rwanda muri Cap-Vert
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza