IGIHE

U Rwanda rwiteguye gute imikino ya Commonwealth 2022 izatangira mu kwezi gutaha?

0 23-06-2022 - saa 12:38, Cyprien Niyomwungeri

U Rwanda kimwe n’ibindi bihugu bigize umuryango w’ibikoresha ururimi rw’Icyongereza ‘Commonwealth’, rukomeje kwitegura imikino izabera mu Mujyi wa Birmingham mu Bwongereza guhera mu kwezi gutaha.

Imikino ya Commonwealth 2022 izatangira kuwa Kane tariki 28 Nyakanga kugeza kuwa Mbere tariki 8 Kanama 2022. Yagombaga kuba umwaka ushize ariko irasubikwa kubera icyorezo cya Covid-19.

Uwayo Théogène uyobora Komite Olempike y’u Rwanda, yabwiye itangazamakuru ko abanyarwanda biteguye ku buryo bwose bushoboka kugira ngo barebe ko baabona umwanya ushimishije.

Ati “Ntitwibwira ko tuzaba aba mbere cyangwa aba kabiri mu bihugu byose bya Commonwealth kuko ni ibihugu byinshi ariko twizera ko dushobora kubona umwanya ushimishije. Abakinnyi bariteguye neza bari ku murongo kandi biteguye guhatana n’abandi”.

U Rwanda ruzajyana i Birmingham abazaruserukira mu mikino itanu irimo gusiganwa ku magare, gusiganwa ku maguru, Beach Volleyball, Koga n’imikino y’abafite ubumuga.

Munezero Valentine ntazitabira iyi mikino ariko we na mugenzi we Penelope Musabyimana barayizi cyane kuko begukanye umudali wa Bronze mu 2017 mu yabereye Bahamas mu cyiciro cy’abato.

Yavuze ko iyi mikino hari byinshi yahinduye mu buzima bwabo kuko yabafashije kwiga, ubu bakina mu makipe akomeye hano mu Rwanda muri APR WVC, no mu buzima busanzwe hari ibyahindutse.

Ati “Kubona imidali muri iriya mikino biba bishoboka, icyo nababwira ni ugukora cyane ikindi bakumva ko bashoboye, kuko biriya bihugu uba wumva bavuga u Rwanda bakagenda basuzugura ibihugu bya Afurika, ariko kuri ubu ni ikintu gikomeye kandi n’umudali bishoboka ko bawuzana bashyizemo ingufu”.

Mugisha Moïse azahagararira u Rwanda mu mukino wo gusiganwa ku magare, yavuze ko yiteguye neza kandi ubungubu ahagaze neza, umubiri umeze neza dore ko aheruka no kwegukana Tour du Cameroun.

Ati “Intego ntayindi nk’umunyarwanda dukunda kumva Rwanda Nziza iririmbwa, ntayindi ntego ni ugutsinda twese tugashyira hamwe nk’abanyarwanda tuzaba turi kumwe”.

Tariq Ahmad wo muri Guverinoma y’u Bwongereza yavuze ko igihugu cye cyishimiye kuzakira ibihugu 54 bya Commonwealth kandi abantu bazaba bishimiye kuba hamwe mu kwizihiza siporo n’ubushobozi ifite bwo guhuza abantu.

Ati “Commonwealth isobanuye guhuriza abantu hamwe kandi na siporo ni yo ntego yayo nk’uko imikino ya Birmingham izabikora, icyo dushaka ni uko urubyiruko rw’umuryango rwishima, rukamwenyurira hamwe mu kibuga”.

Yakomeje avuga ko siporo ihuriza hamwe ibyiciro byose mu buryo budashobora gukorwa n’ikindi kintu.

Imikino ya Commonwealth guhuriza hamwe abantu bose ni kimwe mu bigize iyi mikino, izabera i Birmingham izaba irimo n’abafite ubumuga.

Uwayo Théogène uyobora Komite Olempike y’u Rwanda yavuze ko abakinnyi biteguye neza
Mugisha yavuze ko afite intego yo kwitwara neza uko bishoboka
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza