IGIHE

Abakinnyi barenga 100 barimo n’abanyamahanga bitabiriye Irushanwa rya Badminton i Kigali

0 19-05-2024 - saa 15:18, Eric Tony Ukurikiyimfura

Abakinnyi 112 barimo n’abanyamahanga ni bo bitabiriye “Tournoi de l’Amitié Franco-Rwandaise”, irushanwa ryateguwe hagamijwe gushimangira umubano Ishyirahamwe Nyarwanda ry’Umukino wa Badminton rifitanye na Ambasade y’u Bufaransa mu Rwanda.

Iri rushanwa ryabereye kuri Maison des Jeunes ku Kimisagara ku wa Gatandatu, tariki ya 18 Gicurasi 2024, mu byiciro birimo abakuru n’abato mu bakina ari babiri.

Perezida w’Ishyirahamwe rya Badminton mu Rwanda, Muhama Alphonse, yavuze ko bishimiye uko ryagenze, by’umwihariko ashimira Ambasade y’u Bufaransa mu Rwanda yabateye inkunga.

Ati “Twateguye iri rushanwa mu kugaragaza umubano dufitanye na Ambasade y’u Bufaransa mu Rwanda, dufite n’Ishyirahamwe ryAbakoresha Igifaransa ku Isi rifite icyicaro mu Bufaransa. Ambasade yadufashije kuba ryaba.”

Abakinnyi bagera ku 100 baturutse mu bice byose by’igihugu, ku isonga hakabamo abanyeshuri, ni bo baryitabiriye. Hari kandi n’abanyamahanga 16 baturutse mu bihugu birimo u Bufaransa, u Buhinde, Pakistan n’u Budage.

Muhama Alphonse yavuze ko mu cyiciro cy’abato, hahuye abanyeshuri, abanyamahanga bitabira mu cyiciro cy’abakuru, bahatana n’abakinnyi b’Abanyarwanda.

Yakomeje agira ati “Ni irushanwa dushaka ko rizakomeza kuba mu buryo bwo kugira ngo tuzamure uyu mukino, abakinnyi bacu bitabire amarushanwa bahagarariye igihugu. Turateganya kugira irindi rushanwa tariki ya 8 Kamena, rizaba ari iryo Kwibuka ku nshuro ya 30 Jenoside yakorewe Abatutsi.”

Ikipe ya mbere mu bakobwa bakiri bato ni iyari igizwe na Nikuze Emelyne ndetse na Uwayisenga Sandrine aho yatsinze iya Kangabe Jeannette na Ituze Adrienne ku mukino wa nyuma.

Mu bahungu, iyabaye iya mbere ni iya Innocent na Jackson yatsinze iya Bonheur na Kamanayo.

Mu bakuru, Uwihoreye Tufaha na Gashema Christa ni bo babaye aba mbere mu bagore naho mu bagabo, uyu mwanya watwawe n’Ikipe y’Abahinde yari igizwe na Dinesh na Rum mu gihe Abanyarwanda bageze kure ari Iradukunda Fabrice na Mungarurire Eden batsindiwe muri 1/2.

Mu batarengeje imyaka 20 hatsinze Mukunzi Biose na Ndayishimiye Fabrice mu bahungu.

Théotime Lamoureux ukora muri Ambasade y’u Bufaransa ndetse akaba yarakinnye iri rushanwa, yavuze ko bishimiye uko ryagenze ndetse n’urwego yabonyeho abakinnyi ‘Abanyarwanda.

Ati “Twateye inkunga iri rushanwa muri gahunda y’Imikino Olempike kugira ngo dushyigikire amarushanwa atandukanye arimo aya Badminton. Tugamije guteza imbere siporo mu Rwanda bijyanye na gahunda u Bufaransa bufite yo kwakira Imikino Olempike uyu mwaka.”

Yakomeje agira ati “Irushanwa ryari hejuru, abakinnyi bagaragaje urwego rwiza kandi bitabiriye ari benshi. Dushaka ko Badminton iba umukino uteye imbere mu Rwanda mu byiciro byose. Abakinnyi bafite urwego rwiza, hari abigaragaje, na bike babura byo ku rwego mpuzamahanga bashobora kubigeraho vuba, tukaba twababona mu Mikino Olempike itaha. Kuki bitakunda?”

Badminton ni umukino ukinwa hifashishijwe ’Racket’ mu gutera agapira kameze nk’akarabo (Volant).

Udupira turi mu bwoko bubiri aho hari agatwarwa n’umuyaga cyangwa akadatwarwa n’umuyaga gakinishwa muri Air Badminton.

Kubera akenshi hakoreshwa agatwarwa n’umuyaga, bituma uyu mukino ukinirwa mu nzu.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza