IGIHE

Tour du Rwanda 2022: Amakipe 19 azitabira n’inzira zizakoreshwa byamenyekanye

4 30-11-2021 - saa 17:00, Eric Tony Ukurikiyimfura

Tour du Rwanda 2022 iteganyijwe hagati ya tariki 20-27 Gashyantare, izitabirwa n’amakipe 19 arimo abiri yo mu Rwanda mu gihe iri siganwa ry’amagare rigiye kuba ku nshuro ya 14 ritazajya i Huye nk’uko byari bisanzwe.

Ni isiganwa rya kane rya Tour du Rwanda rigiye kuba riri ku rwego rwa 2.1, rizatangira nyuma y’iminsi 288 hasojwe irya 2021 ryatwawe n’Umunya-Espagne Cristián Rodríguez Martin ukinira Direct Energie.

Ryari ryabaye hagati ya tariki ya 2 n’iya 9 Gicurasi nyuma yo kwigizwa inyuma rikuwe mu mpera za Gashyantare kubera gukaza umurego kw’icyorezo cya COVID-19 cyatumye riba mu muhezo, abafana babujijwe kugera aho isiganwa risorezwa n’aho ritangirira.

N’uyu mwaka, hari andi masiganwa menshi akomeje gusubikwa kubera iki cyorezo, ariko Ishyirahamwe ry’Umukino w’Amagare mu Rwanda (FERWACY) n’abategura Tour du Rwanda bongeye gushyira imbaraga mu gushaka uburyo iri rushanwa rikunzwe n’abatari bake ryakongera kuba.

U Rwanda ruheruka guhabwa kuzakira Shampiyona y’Isi y’Amagare mu 2025, byumvikana ko rwitezweho byinshi mu mitegurire n’imigendekere neza y’amarushanwa nk’aya cyane Tour du Rwanda imaze kubaka izina muri iyi siporo.

Mu mwaka utaha iri siganwa rizaterwa inkunga n’abarimo Cogebanque, Prime Insurance, SP, Minisiteri ya Siporo, Rwanda Tea, Visit Rwanda, Canal +, Polisi y’Igihugu n’abandi.

Visit Rwanda yatanze umwambaro w’umuhondo ku nshuro ya mbere mu 2021, ni iyo izakomeza kuwutanga, Cogebanque yambike uhiga abandi mu guterera imisozi naho Prime Insurance yambike umukinnyi ukiri muto uhiga abandi.

Tour du Rwanda igiye kuba ku nshuro ya 14, yabaye mpuzamahanga kuva mu 2009, aho yari ku rwego rwa 2.2 kugeza mu 2019 ubwo yegukanwaga na Mugisha Samuel akaba ari we mukinnyi Munyarwanda uheruka kwegukana iri rushanwa.

Mu bitabiriye umuhango wo gutangaza amakipe n’inzira za Tour du Rwanda 2022 kuri uyu wa Kabiri, tariki ya 30 Ugushyingo 2021, harimo Ambasaderi w’u Bufaransa mu Rwanda, Anfré Antoine.

Umuyobozi wa Tour du Rwanda, Kamuzinzi Freddy, yongeye gushimangira ko bahisemo gutegura irushanwa ry’umwaka utaha mu rwego rwo kwerekana ko u Rwanda rushobora gutegura isiganwa ryiza no mu bihe bikomeye.

Isiganwa rya 2022 rizitabirwa n’amakipe 19 , aho u Rwanda ruzaba rufitemo Ikipe y’Igihugu (Team Rwanda) na Benediction Ignite y’i Rubavu.

Bitandukanye no mu myaka yabanje, mu mwaka utaha Tour du Rwanda ntizajya i Huye, ariko izasubira i Rubavu aho itageze mu 2021.

Amakipe 19 azitabira Tour du Rwanda 2022:

Amakipe y’Ibihugu (5): Rwanda, Algérie, Eritrea, Maroc na Grande Bretagne.

Amakipe yo ku migabane (8): Benediction Ignite (Rwanda), Tarteletto Isorex (u Bubiligi), Wildlife (USA), Pro Touch (Afurika y’Epfo), Bike Aid (u Budage), SKS Sauerland (u Budage), Team Coop (Norvege) na TSG Terengganu (Malaysia).

Amakipe yabigize umwuga (6): Team Novo Nordisk (USA), B&B Hotel (France), Drone Hopper Androni (Italie), Team Total Energies (France), Team Burgos BH (Espagne) na Israël Start Up Nation (Israël).

Inzira za Tour du Rwanda 2022

  • Agace ka mbere: Tariki ya 20 Gashyantare 2022: Kigali Arena- Kigali Arena (Ibilometero 4,0)
  • Agace ka kabiri: Tariki ya 21 Gashyantare 2022: Kigali- Rwamagana (Ibilometero 148,3)
  • Agace ka gatatu: Tariki ya 22 Gashyantare 2022: Kigali- Rubavu (Ibilometero 155,9)
  • Agace ka kane: Tariki ya 23 Gashyantare 2022: Kigali- Gicumbi (Ibilometero 124,3)
  • Agace ka gatanu: Tariki ya 24 Gashyantare 2022: Muhanga- Musanze (Ibilometero 124,7 )
  • Agace ka gatandatu: Tariki ya 25 Gashyantare 2022: Musanze- Kigali (Ibilometero 152,0)
  • Agace ka karindwi: Tariki ya 26 Gashyantare 2022: Kigali-Gicumbi-Kigali (Ibilometero 152,6)
  • Agace ka munani: Tariki ya 27 Gashyantare 2022: Kigali- Kigali (Ibilometero 75,3)
Tour du Rwanda 2022 iteganyijwe hagati ya tariki 20-27 Gashyantare izitabirwa n’amakipe 19 arimo abiri yo mu Rwanda
Cristian Rodriguez ukinira Total Direct Energie ni we wegukanye Tour du Rwanda 2021
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza