IGIHE

Ibihangange Teklehaimanot na Debesay Mekseb mu ikipe ya Érythrée yitegura Tour du Rwanda

0 11-02-2019 - saa 21:27, Ngabo Roben

Mu gihe habura iminsi 13 gusa ngo Tour du Rwanda 2019 itangire, ikipe y’igihugu ya Érythrée yamaze gutangaza abakinnyi 10 bazatoranywamo batandatu bazayitabira, barimo abakinnyi b’ibihangange nka Teklehaimanot Daniel na Debesay Mekseb.

Tour du Rwanda izatangira tariki 24 Gashyantare isozwe tariki 3 Werurwe 2019, ikinwe n’amakipe 16 arimo atandatu y’ibihugu nka Team Rwanda, Kenya, Cameroun, Ikipe y’u Bufaransa y’Abatarengeje imyaka 23, ikipe y’Igihugu ya Algérie n’iya Érythrée.

Muri izi kipe, ihabwa amahirwe yo kwegukana iri siganwa mpuzamahanga rimaze imyaka 11 rizenguruka u Rwanda ni ikipe y’igihugu ya Érythrée nk’uko byahamijwe na nimero ya mbere muri Afurika mu mukino wo gusiganwa ku magare, Areruya Joseph.

Mu kiganiro yagiranye na IGIHE mu Ukuboza 2018, Areruya yavuze ko abona umwenda w’umuhondo wa Tour du Rwanda 2019 uzataha mu murwa mukuru Asmara kubera ubuhangange bw’abo iyi kipe izaserukana.

Uyu mukinnyi bita Kimasa icyo gihe yagize ati “Njye ndebye mbona (Tour du Rwanda) izatwarwa n’umunya-Eritrea kuko tuzi ko Kudus [Merhawi] ari umukinnyi ukomeye kandi azaba ari kumwe na Astana [ikipe yo muri Kazakhstan], n’abandi bazazana n’ikipe y’igihugu yabo. Ntabwo byoroshye.”

Ikipe y’igihugu ya Érythrée yatangaje urutonde rw’abakinnyi 10 bazakurwamo batandatu ku wa Gatanu w’iki Cyumweru, hakamenyekana ikipe ntakuka izakina Tour du Rwanda 2019.

Mu ikipe yatangiye umwiherero harimo Daniel Teklehaimanot Girmazion w’imyaka 30 wabaye igihangange muri Afurika yegukana Tour du Rwanda na shampiyona ya Afurika yabereye mu Rwanda mu 2010, anarenga imbizi z’uyu mugabane yegukana umwenda w’uwahize abandi mu misozi (meilleur grimpeur) muri Tour de France ya 2015.

Undi ushobora kuza mu Rwanda ufite amateka akomeye muri Tour du Rwanda ni Debesay Mekseb w’imyaka 27 ufite amateka yo kuba umukinnyi wa gatatu umaze kwegukana uduce twinshi muri Tour du Rwanda. Amaze kwegukana uduce tune akurikiye Valens Ndayisenga na Eyob Metkel bamaze kwegukana uduce dutanu.

Debesay Mekseb kandi ari mu bayoboye umukino wo gusiganwa ku magare muri Afurika kuko amaze kwegukana umudari wa zahabu mu gusiganwa n’igihe (course contre la montre individuel) muri shampiyona ya Afurika inshuro eshatu mu myaka ine ishize, 2015, 2016, na 2018.

Aba bakinnyi b’ibihangange bashobora kuzahurira i Kigali na bene wabo bazaba bari mu yandi makipe nka Merhawi Kudus Ghebremedhin uzaba uri kumwe na Astana Pro Team yo muri Kazakhstan, na Amanuel Gebrezgabihier Egerzeigzaarhka ushobora kuzazana na Team Dimension Data for Qhubeka yo mu Butaliyani.

Abakinnyi 10 bahamagawe mu ikipe y’igihugu ya Érythrée

1. Daniel Teklehaimanot

2. Mekseb Debesay

3. Yakob Debesay

4. Aron Debretsion

5. Sirak Tesfom

6. Michael Habtom

7. Henok Muluberhan

8. Filimon Mebrahtu

9. Biniam Girmay

10. Daniel Habtemichael

Daniel Teklehaimanot wegukanye umwenda w'urusha abandi guterera imisozi muri Tour de France ya 2015, azaba ari muri Tour du Rwanda 2019
Ikipe y'igihugu ya 'Érythrée yatoranyije abakinnyi bagomba gutangira kwitegura Tour du Rwanda barimo ibihangange Teklehaimanot na Debesay Mekseb
Mekseb Debesay ni umukinnyi wa gatatu wegukanye uduce twinshi mu mateka ya Tour du Rwanda
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza