IGIHE

Igeragezwa ku ikoranabuhanga rishobora kugoboka abasibye ishuri n’abacitswe amasomo

0 27-05-2022 - saa 15:33, Ferdinand Maniraguha

Kuri ubu henshi mu babyeyi bishoboye bafite abana, hagezweho isubiramo ry’amasomo mu masaha y’umugoroba bavuye ku ishuri cyangwa mu biruhuko.

Si bose bashobora kubona amafaranga yo kwishyura umwarimu n’ibindi bikenerwa ngo umuntu yige neza atari ku ishuri.

Ibyo bibazo n’ibindi bishamikiye ku myigishirize yo mu Rwanda nk’aho umwana wasibye ishuri agorwa no kubona andi mahirwe yo gusubiramo isomo yacitswe, nibyo byatumye Mukongori Moses atangiza umushinga yise StudiesRw, urubuga rw’ikoranabuhanga yitezeho ko nirutangira gukora, ruzafasha abana b’Abanyarwanda.

Uru rubuga ruri mu igerageza, Mukongori avuga ko ari uburyo yifuza gufatanyamo n’inzego z’uburezi mu Rwanda, ku buryo nk’umwana wasibye ishuri, abakandida bigenga n’undi wese wagize impamvu zituma atajya kwiga uwo munsi, ashobora gukurikirana isomo yacitswe hifashishijwe ikoranabuhanga.

Kuri uru rubuga, Mukongori avuga ko batangiye kugerageza bifashishije amwe mu masomo yigishwa mu mashuri yisumbuye guhera mu mwaka wa mbere kugeza mu mwaka wa gatandatu.

Ayo ni Imibare, Ubugenge (Physique, Ibinyabuzima (Biologie) Ubutabire (Chimie) kwihangira imirimo (Entrepreneurship), Amateka n’Ubumenyi bw’isi.

Gukoresha urwo rubuga, bizajya bisaba umunyeshuri gufunguzaho konti, hanyuma abashe kwinjiramo. Mu gihe amaze kugeramo, azajya ahitamo isomo ashaka gukurikirana n’umwarimu yifuza ko arimwigisha bitewe n’abahari, hanyuma yinjire mu ishuri.

Mukongori avuga ko itandukaniro ry’uru rubuga n’izindi zifashisha akenshi mu masomo kuri ubu, ngo umunyeshuri azajya yigishwa mu buryo bw’ako kanya (live), mu gihe afite ikibazo abashe guhagarika umwarimu amubaze.

Ati “Mu gihe cya Covid-19 hari ukuntu Leta yagiye ifasha yigisha abanyeshuri ku masomo yacaga kuri za televiziyo ariko nkatwe dufite uyu mushinga ukabona harimo utuntu tw’icyuho, ukareba umwarimu ari kwigisha isomo rigatambuka ariko nta wabonye uburyo bwo kumubaza aho atumvise. Niba umwarimu ari kwigisha agatanga umukoro, nta suzuma rikurikira ku bo yawuhaye.”

Muri ubu buryo bushya, ngo bateganyije uburyo umwarimu atanga umukoro akanakurikirana uko wakozwe, akaba yatanga inama ku munyeshuri. Amasomo yose biteganyijwe ko yajya atangwa ku masaha yagenwe, bitabangamiye andi masomo abanyeshuri bigishwa.

Mukongori avuga ko biteganyijwe ko buri somo rizajya riba rifite abarimu batandukanye bitewe n’umwaka abanyeshuri bigamo, kugira ngo abiga mu mwaka umwe abe aribo bakurikirana isomo rimwe.

Ku ikubitiro urubuga ruzajya ruba rufite ubushobozi bwo kwakira abanyeshuri ibihumbi 20, icyakora yizera ko ku bufatanye na Minisiteri y’Uburezi, bizaguka bikagera ku banyeshuri benshi.

Ati “Icyo dusaba Leta ni ukuduha umwanya tukabaganiriza ku mushinga wacu uko uteye, noneho bakadufasha kubona ibyangombwa byo gukora mu buryo bwemewe. Hari amasomo tugomba kuzafatira amashusho tukayashyira ku rubuga, hari ukuntu batworohereza uburyo twagera kuri za laboratwari tukabifata amashusho ku buryo twabishyira ku rubuga.”

Yavuze ko ari inyungu ku banyeshuri n’igihugu muri rusange kuko bizafasha abajyaga batsindwa amasomo amwe n’amwe kuko yizwe badahari.

Kuba ari urubuga rwifashisha internet, birumvikana ko ari imbogamizi kuri bamwe. Mukongori avuga ko ari yo mpamvu bifuza ubufatanye na Leta kugira ngo hatagira umwana usigazwa inyuma.

Prof. Jean Marie Ntaganda wigisha muri Kaminuza y’u Rwanda, yavuze ko iyi gahunda yo kwigisha hakoreshejwe iyakure, ari nziza hakurikijwe aho isi igana.

Yavuze ko bizanafasha cyane kuko umunyeshuri azaba afite uburyo yasubira inyuma ibyo atumvise akabyiyibutsa anabireba.

Nshimiyimana John, umunyeshuri wiga akoresheje ikoranabuhanga avuga ko kwiga hifashijijwe ikoranabuhanga ari byiza, ariko agaragaza ko hakiri imbogamizi z’uko usanga hari ahantu hataragera umuriro w’amashanyarazi bityo abanyeshuri bahatuye bakaba batabona mahirwe ahagije yo kwiga.

Ati “Ni ukuri kwiga hifashishijwe ikoranabuhanga ni byiza cyane ariko hari imbogamizi z’umuriro w’amashanyarazi mu cyaro. Leta idufashe itwegereze ayo mahirwe hirya no hino mu Rwanda atugereho twese, bityo natwe twige twifashishije ikoranabuhanga.”

Kuri ubu hejuru ya 60% by’ingo zo mu Rwanda zifite umuriro w’amashanyarazi, Leta ifite gahunda yo kuwugeza kuri bose bitarenze 2024.

Mukongori yavuze ko hagikenewe abashoramari bashora mu burezi kuko uburyo bw’ikoranabuhanga butaratera imbere kandi ariho isi igana.

Mukongori avuga ko umushinga we ushyizwe mu bikorwa wateza imbere imyigishirize
Biteganyijwe ko umunyeshuri wacitswe isomo, azajya abasha kurikurikirana yifashishije ikoranabuhanga
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza