IGIHE

U Rwanda rugiye kwakira inama mpuzamahanga yiga ku iterambere ry’ikoranabuhanga

0 14-10-2019 - saa 07:34, Evariste Nsengimana

Abashoramari bakomeye n’abayobora inzego zifatirwamo ibyemezo bo hirya no hino ku Isi bagiye guhurira i Kigali mu nama yiga ku kamaro k’ikoranabuhanga muri Afurika mu kuziba icyuho cy’ubumenyi buke ku isoko ry’umurimo no gushyiraho ingamba zo kuzamura ikoranabuhanga kuri uwo mugabane.

Iyi nama yiswe ICDL Africa Forum 2019 igiye kuba ku nshuro ya mbere, izabera muri Ubumwe Grande Hotel mu Mujyi wa Kigali ku wa 16 Ukwakira 2019.

Iyi nama ni urubuga rwiza rwo gusuzumira hamwe uko ikoranabuhanga muri Afurika ryarushaho kugira uruhare mu cyerekezo cy’iterambere ry’umugabane.

Izahuriza hamwe abasaga 200 basuzumira hamwe uruhare rw’ikoranabuhanga n’ibisabwa kugira ngo ryifashishwe mu kuziba icyuho mu bumenyi buke bugaragara ku isoko ry’umurimo.

Mu bayobozi bazitabira iyi nama harimo Umunyamabanga Uhoraho muri Minisiteri y’Ikoranabuhanga na Innovasiyo mu Rwanda, abayobozi ba gahunda yo guhindura Afurika binyuze mu ikoranabuhanga “Smart Africa”, ab’Umujyi wa Kigali n’abandi.

Hari kandi abayobozi b’ibigo bimaze kubaka izina mu ikoranabuhanga nka ANSUT, AIMS, GIZ – STEP, Computer Aid International, TETFUND, ABSU-CEP n’ibindi.

Izatangirwamo ibiganiro bitandukanye birimo ubuhamya bw’aho ikorabuhanga ryifashishijwe rigatanga umusaruro mu kuziba icyuho mu bumenyi bukenewe ku isoko ry’umurimo no gukemura ibindi bibazo byugarije Afurika.

Hazatangirwaho kandi ibiganiro mu matsinda hagati y’ibigo bya Leta n’ibyigenga bigamije kurebera hamwe ibibazo byugarije iterambere ry’ikoranabuhanga muri Afurika n’ingamba byafatirwa.

Mu zindi ngingo zizaganirwaho harimo gusesengura amahame rusange ku bumenyi bw’ikoranabuhanga binyuze mu kwemeza ikigo mpuzamahanga kigisha kikanatanga impamyabumenyi mu ikoranabuhanga, ICDL (International Computer Driving License).

Hari kandi kurebera hamwe ingamba zashyirwaho kugira ngo ibigo bya Leta bigire abakozi bafite ubumenyi buri ku rwego mpuzamahanga mu ikoranabuhanga, uburyo Afurika yahuriza hamwe imbaraga mu gushyira mu bikorwa ubumenyi ku ikoranabuhanga n’ibindi.

Umuyobozi ushinzwe imenyekanishabikorwa muri ICDL Africa, Umurerwa Alice yagize ati “ubumenyi mu ikoranabuhanga niyo nkingi y’ubukungu butajegajega aho abaturage bakura ubumenyi bw’ibanze ku ikoranabuhanga aho biga, aho bakorera no mu buzima busanzwe bwa buri munsi hibandwa cyane ku guhindura Afurika umugabane ujijukiye ikoranabuhanga.”

Umurerwa yavuze ko intego za ICDL Africa ari uguha abanyarwanda n’abanya-Afurika muri rusange ubumenyi bubafasha guhangana ku isoko ry’umurimo ku rwego mpuzamahanga no kubafasha mu rugendo rwabo rwo guhitamo icyo bifuza kuzaba cyo.

Muri iyi minsi ikoranabuhanga ni imwe mu miyoboro ifasha abantu guhindura ubuzima bwabo nk’uburyo bushya bwifashishwa mu guhana amakuru, gukorana no gucuruzanya hirya no hino ku Isi nta nzitizi na mba.

Iyi nama mpuzamahanga yiga ku iterambere ry’ikoranabuhanga irabera muri Ubumwe Grande Hotel

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza