IGIHE

Icyuho mu guca ibikoresho byonona amashanyarazi bikanasohora imyuka yangiza ibidukikije muri EAC

0 30-11-2018 - saa 20:18, Ishimwe Israel

Ibihugu byo muri Afurika y’Uburasirazuba ntibirahuriza ku ngamba zigenga ikoreshwa ry’ibyuma bikonjesha nka frigo, ibyohereza umwuka mu nyubako n’amatara akoresha amashanyarazi bisohora imyuka yangiza ibidukikije n’ingufu z’amashanyarazi.

Ibihugu biri muri EAC bifite ingamba zo gukumira ibi bikoresho ariko ntiziranozwa ngo zishyirwe mu bikorwa.

Kenya yashyizeho amabwiriza mu 2012 ariko ntacyo yahinduye mu iyinjizwa ry’ibi bikoresho. Uganda nayo yayashyizeho ariko ntiyashyizwe mu bikorwa.

U Rwanda ruri mu nzira yo gushyiraho amabwiriza mu gihe u Burundi, Tanzania na Sudani y’Epfo, intambwe yabyo ikiri hasi.

Umuyobozi w’Ikigo gishinzwe Kubungabunga Ibidukikije (REMA), Eng. Coletha Ruhamya, yasabye ko EAC na Afurika yose ikwiye guhuza ingamba mu gukumira ibi bikoresho.

Yabigarutseho ku wa 29 Ugushyingo 2018 mu kiganiro cyahuje abayobozi baturuka muri Afurika cyabereye mu Ihuriro rya mbere Nyafurika ku Bukungu butangiza Ibidukikije riteraniye i Kigali.

Insanganyamatsiko yacyo yibanze ku “Kwihutisha ingamba zo gukumira ibikoresho bikonjesha byangiza ingufu z’amashanyarazi bikanangiza ibidukikije muri Afurika.’’

Bigamije gushyira mu bikorwa amavugurura ya Kigali ku masezerano ya Montréal yerekeye ibintu byangiza akayunguruzo k’imirasire y’izuba. Yemejwe burundu muri Mata 2017.

Umuyobozi wa Gahunda ya Rwanda Cooling Initiative, Kayitare Morris, yasobanuye ko hazashyirwaho ibipimo ntarengwa bizagenderwaho ku bikoresho nka frigo n’ibyuma bitanga ubukonje mu nzu (air conditioners), harebwa umuriro bitarenza ku mwaka n’imyuka bikoresha (Refrigerant) igomba kuba itangiza ibidukikije ari byo byitwa Minimum Energy Performance Standards (MEPS).

Yagize ati “Muri uyu mushinga turareba ingufu z’amashanyarazi n’imyuka ibyo bikoresho bikoresha. Hari frigo zigomba gukurwaho zifite imyuka ya Hydrochlorofluorocarbons (HCFCs) kuko ihumanya ikirere, naho izikoresha hydrofluorocarbons (HFCs) zikagabanywa nkuko amavugurura ya Kigali abiteganya.”

Amasezerano ya Montréal yemeje ikurwaho ry’ibikoresho bifite imyuka ya HCFCs, bisimbuzwa ibisohora iya HFCs ariko na byo ubushyuhe bwabyo buguma ku Isi bikangiza ibidukikije.

Amavugurura y’i Kigali yemeje ko bihagarikwa. Agena ko ibihugu bikize bizagabanya ikoreshwa rya HFCs ku gipimo cya 85% hagati ya 2019 na 2036; ibiri mu nzira y’amajyambere bikayigabanya kuri 80% hagati ya 2024 na 2045.

Kayitare yavuze ko “Mu Rwanda hari ibikoresho bifite ubushyuhe bukenewe, hari n’ibirengeje urugero. Frigo zizanwa mu gihugu zizajya zisuzumwa, izitujuje ibisabwa ngo zinjire zikumirwe.”

Frigo nyinshi ziza mu Rwanda zituruka mu Bushinwa. Ubu izigezweho ku isoko ni izikoresha imyuka ya HFO (hydrofluoro-olefin) itangiza Ozone.

Biteganyijwe ko aya mabwiriza azemezwa mu 2019, agatangira kubahirizwa mu myaka ibiri.

Impuguke mu Kigo cya Afurika y’Uburasirazuba cyita ku Ngufu zisubira (EACREEE), Michael Kiza, yavuze ko hakenewe kongera ubukangurambaga mu bihugu bya EAC bitarashyiraho amabwiriza.

Yagize ati “Ikigo cyacu cyita ku gushyiraho ingamba zihuriweho mu Karere kuko turi ku isoko rimwe aho ibicuruzwa bihererekanywa byoroshye mu bihugu bitandatu.”

Yavuze ko hakiri imbogamizi mu bushobozi kuko ibi bikoresho bihenda ndetse ibyiganje ku isoko biba byarakoreshejwe.

Amahirwe ari mu guhuza amabwiriza arimo kubaka isoko rimwe ritumizwaho ibikoresho byifuzwa, kugabanya ibiciro, kurwanya magendu no gushyiraho laboratwari igenzurirwamo ubuziranenge bw’ibikoresho.

Amavuvurura ya Kigali azashyirwa mu bikorwa muri Mutarama 2019. Ni nyuma y’Inama mpuzamahanga yiga ku mihindagurikire y’Ikirere (COP 24) izabera Katowice muri Pologne.

Eng. Ruhamya yavuze ko iyi nama Afurika ikwiye kuyijyamo ifite intego imwe ku guhangana n’iyangirika ry’ibidukikije.

Yanasabye ko habaho inyandiko ihuriweho na Afurika igaragaza ko yiyemeje gukumira ibikoresho byangiza ibidukikije n’ingufu z’amashanyarazi, ikazaganirwaho muri iyo nama.

Ibyuma bitanga ubukonje na frigo bizikuba hafi inshuro ebyiri bigere kuri miliyari ebyiri mu 2030, mu bihugu biri gutera imbere. Ingufu zikoreshwa na zo ziziyongera kuko mu 2050, 2/3 by’inyubako zose zizaba zirimo ibyuma bitanga amahumbezi.

Muri Werurwe 2018, Ishami ry’Umuryango w’Abibumbye ryita ku Bidukikije (UN Environment) ritera inkunga umushinga wa Rwanda Cooling Initiative, ryaganiriye na EAC ku ishyirwaho ry’ingamba zihuriweho.

Ibi biganiro byitabiriwe n'abantu baturutse mu bihugu bitandukanye
Umuyobozi wa Gahunda ya Rwanda Cooling Initiative, Kayitare Morris, yasobanuye ko mu gihugu hazashyirwaho ibipimo ntarengwa bizagenderwaho ku bikoresho
Umuyobozi w’Ikigo gishinzwe Kubungabunga Ibidukikije (REMA), Eng. Coletha Ruhamya, yasabye ishyirwaho ry'amabwiriza ahuriweho muri EAC na Afurika yose
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza