Abasaga ibihumbi 600 bahitanywe n’ibiza mu myaka 20 ishize

0 24-11-2015 - saa 10:53, Bayingana Bonfils

Raporo y’agashami k’Umuryango w’Abibumbye gashinzwe kugabanya ingaruka zituruka ku biza, yagaragaje ko ibiza bituruka ku mihindagurikire y’ibihe byikubye kabiri mu myaka 20 ishize, kandi hatagize igikorwa byakomeza kwiyongera bikagira ingaruka nyinshi ku bana by’umwihariko.

Ibi byatangajwe kuri uyu wa mbere, mu gihe mu cyumweru gitaha i Paris mu Bufaransa hateganyijwe inama izahuza abayobozi 140 baturutse ku Isi yose, biga ku kurwanya ingaruka zituruka ku mihindagurikire y’ibihe.

Iyi raporo igaragaza ko kuva mu 1995, abantu basaga ibihumbi 606 bishwe n’imyuzure, gutenguka kw’ubutaka n’ibindi biza bifite aho bihuriye n’imihindagurikire y’ibihe, naho abasaga miliyari enye bibagiraho ingaruka.

Uyu mubare wikubye kabiri ugereranyije nuko byari bimeze mu myaka ya 1985-1994. Iyi raporo yerekana ko 90 % by’ibiza 6,457 byabayeho mu myaka 20 ishize, byaturutse ku mihindagurikire y’ibihe.

Ingaruka z’imihindagurikire y’ibihe kandi zigarukwaho n’ishami ry’umuryango w’abibumbye ryita ku bana (UNICEF), ritangaza ko hafi miliyoni 690 muri miliyari 2.3 z’abana batuye mu bihugu byibasirwa n’ibiza, bazapfa, bagakena ndetse bakanarwara indwara zirimo Malariya, umusonga, impiswi n’izindi zituruka ku mirire mibi.

Muri bo, abagera kuri miliyoni 530 ni abo mu bihugu bikunda kwibasirwa n’imyuzure nk’ibyo muri Aziya. Abandi bagera kuri miliyoni 160 ni abo mu bihugu bitagira amazi menshi, ibyinshi bikaba aribyo muri Afurika.

UNICEF ikavuga ko hatagize igikorwa guhera ubu, abana bazibasirwa cyane n’ingaruka z’imihindagurikire y’ibihe.

Umuyobozi w’agashami k’umuryango w’abibumbye gashinzwe kugabanya ingaruka zituruka ku biza, Margareta Wahlstrom, yavuze ko ubu bwiyongere bw’ingaruka ziterwa n’imihindagurikire y’ibihe ari impamvu nyamukuru yo kuganirwaho mu nama iteganyijwe mu cyumweru gitaha.

Iyo nama izafatirwamo ingamba zo kurwanya ingaruka zituruka ku mihindagurikire y’ibihe mu myaka 20. Izafungurwa kuwa 30 Ugushyingo igasozwa kuwa 11 Ukuboza 2015. Biteganyijwe ko izitabirwa na Perezida wa Amerika Barack Obama na Perezida Xi Jinping w’Ubushinwa.

Impuguke zivuga ko za Guverinoma zikwiye gushyiraho ingamba zo guhangana n’ibyuka bihumanya ikirere, zitibagiwe ingaruka imihindagurikire y’ibihe yateje.

Ibihugu 10 byibasiwe cyane n’ingaruka z’imihindagurikire y’ibihe ni Ubushinwa, Ubuhinde, Bangladesh, Philippines, Thailand, Pakistan, Brazil, Vietnam, Kenya na Ethiopia.

Imyotsi ituruka mu nganda iri mu byangiza ikirere

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza