IGIHE

U Rwanda rwashimiwe kuba igihugu cya mbere cyatanze gahunda ivuguruye ijyanye n’amasezerano y’i Paris

2 21-05-2020 - saa 22:59, Twarabanye Venuste

Ikigega cy’Umuryango w’Abibumbye cyita ku Bidukikije (UNFCCC) cyashimiye u Rwanda rwabaye igihugu cya mbere muri Afurika cyatanze gahunda ivuguruye y’imyaka itanu ruzagenderaho mu kubahiriza amasezerano y’i Paris yerekeye ibyo guhangana n’imihindagurikire y’ikirere.

Amasezerano ya Paris, yemeranyijweho mu Ukuboza 2015, agena uburyo bwo gushyira mu bikorwa ingamba zitandukanye kugira ngo igipimo cy’ubushyuhe bw’Isi kigume munsi ya dogere celcius ebyiri, ariko intego ari ukugera munsi ya dogere 1.5.

Ingingo ya Kane n’iya 13 z’ayo masezerano zivuga ko buri gihugu mu byashyize umukono kuri ayo masezerano gitanga raporo ku ishyirwa mu bikorwa ryayo mbere y’imyaka itanu mu rwego rw’ikurikiranabikorwa.

Umuryango w’Abibumbye wasabye ibihugu gutanga gahunda zabyo ivuguruye muri uyu mwaka.

Umunyamabanga Nshingwabikorwa wa UNFCCC, Patricia Espinosa, yatangaje ko u Rwanda rwabaye igihugu cya mbere muri Afurika mu kubyubahiriza.

Mu butumwa yanyujije kuri Twitter yagize ati “Turashimira u Rwanda rwatanze gahunda ivuguruye muri UNFCC ku bijyanye no guhangana n’imihindagurikire y’ikirere. Twishimiye ubwitange bwanyu mu guharura inzira y’ahazaza heza.”

Espinosa yavuze ko Coronavirus itahagaritse ikibazo cy’imihindagurikire y’ikirere, bityo ko yizeye ko n’ibindi bihugu bizatanga gahunda bifite yo guhangana n’icyo kibazo mu myaka iri imbere.

Inyandiko igaragaza ingamba u Rwanda rufite mu myaka itanu iri imbere, yerekena ko ahanini izashyira imbaraga mu zari zisanzwe zishingiye ku kubaka ubukungu butangiza ibidukikije, butanahungabanywa n’imihindagurikire y’ibihe “Green Growth and Climate Resilience Strategy.”

Hakazanozwa ibijyanye n’ibarurishamibare no gushishikariza abafatanyabikorwa batandukanye kugira uruhare mu ishyirwa mu bikorwa ryazo.

Mu ngamba zisanzwe, hashyizwe imbaraga mu guhangana n’ibinyabutabire byangiza akayunguruzo k’imirasire y’izuba birimo Chlorofluorocarbons (CFCs), Hydrochlorofluorocarbons (HCFCs), Hydrobromofluorocarbons (HBFCs), Halons, Methyl bromide na Carbon tetrachloride, bikaba biboneka mu byuma bikonjesha nka za frigo n’ibyuma bizana ubuhehere mu nzu no mu modoka.

U Rwanda rwashyizeho gutera ibiti byinshi bitanga umwuka mwiza aho kuri ubu ari ku buso bungana na 30% bw’igihugu. Ibi bijyanye n’uko ubu ku isoko ry’u Rwanda hagejejwe imodoka na moto zikoresha amashanyarazi.

Kimwe n’ibindi bihugu ariko u Rwanda rwagize imihindagurikire y’ibihe. Imvura yariyongereye ku kigero kiri hagati ya 5% na 10% naho ubushyuhe bwazamutse ku gipimo cya dogere celcius 1.4 kuva mu 1971 kugeza 2016 kandi mu gihe nta gikozwe, cyazamuka kugera kuri dogere celcius 2.5 mbere ya 2050.

Ibyo byateje ihindagurika ry’ibihe byabaye intandaro y’ibiza by’inkangu, imyuzure, inkuba n’amapfa nabyo bifitanye isano n’iyangirika ry’ibikorwaremezo, iyangirika ry’umusaruro w’ubuhinzi, impfu z’abantu n’ibindi.

Mu isesengura u Rwanda rwerekanye ko ubushyuhe buziyongeraho dogere celcius ziri hagati ya 0.1 na 0.3 mu bihe by’izuba, uretse mu Majyaruguru y’igihugu hazagabanyukaho dogere celcius 0.06 kugeza mu 2050. Muri rusange ngo biteganyijwe ko izuba riziyongera imvura ntihinduke muri icyo gihe.

U Rwanda ruzakenera nibura miliyari 11 z’amadolari kugira ngo rugere kuri izi ntego zo kugabanya imyuka yangiza ikirere harimo miliyari 5.7 z’amadolari zo gushyira mu bikorwa ingamba zo kuyigabanya n’izindi miliyari 5.3 z’amadolari zo guhangana n’ingaruka z’izo ngamba. Iki kiguzi cyose harimo inkunga ingana na 60%.

Ubushakashatsi buherutse gushyirwa ahagaragara na Kaminuza eshanu zirimo izo muri Leta Zunze Ubumwe za Amerika, u Bushinwa no mu Burayi, bwamuritswe mu Kinyamakuru PNAS buvuga ko mu 2050, ubushyuhe bw’Isi buzaba bwariyongereyeho nibura dogere Celsius ziri hagati ya 2.5 na 2.7.

Mu bihugu byo muri Afurika yo Munsi y’Ubutayu bwa Sahara, amasaha abantu bamara mu kazi nayo azagabanuka ku kigero cya 10 na 20%.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Niyibirora 2020-05-22 21:11:22

Nkubo ibyaremwe byose bibereyeho gufashanya kugirango bibeho, umuntu nafate iyambere kugirango byose bikomeze kubaho neza

2
gogo 2020-05-22 15:00:36

ahubwo ababishobora bajya mukirere bagakuraho ikirere dufite bagashyiraho ikindi gishya kuko ikiri hejuru yacu cyarashaje murakoze

Kwamamaza