IGIHE

Igifenesi, urubuto rushobora kuba imari ishyushye ku isoko ry’u Rwanda

0 29-10-2019 - saa 15:20, Ndayikunda Josué

Kankwanzi Anastasie utuye mu Karere ka Kirehe mu Murenge wa Gahara amaze imyaka umunani yenga urwagwa rukoze mu bifenesi benshi bafata nk’igihingwa kidafite umumaro muri aka gace.

Uru rwagwa aho aruranguza barugurisha amafaranga 500 ariko ngo ntarashobora guhaza isoko afite bitewe n’uko ari rinini cyane.

Uyu mugore byamuteje imbere ku buryo yubatse uruganda rukora inzoga muri urwo rubuto, akaba afite gahunda yo guhinga ibifenesi byinshi no kubikangurira abandi.

Igifenesi ni rumwe mu mbuto zo bwoko bw’inkeri bitewe n’uburyo kiremye, kikaba gikomoka mu Buhinde ariko gikunze kugaragara cyane no muri Thailand, Malaysia na Indonesia.

Mu Rwanda urubuto rw’igifenesi ntirukunze kugaragara nk’izindi bitewe n’uko abanyarwanda bataratangira kwitabira kuruhinga, ariko ni urubuto rukize cyane ku ntungamubiri ndetse runafasha kugabanya umuvuduko w’amaraso, kugira uruhu rwiza n’isukari y’umwimerere.

Mugabo Jean Pierre uyobora ishami ry’amashyamba mu Kigo gishinzwe guteza imbere amazi n’Amashyamba, RWFA, yavuze ko ari urubuto abantu benshi bakwiriye guhinga.

Ati “Igifenesi ni urubuto rwifitemo isukari y’umwimerere, kigabanya umuvuduko w’amaraso, gifasha umuntu kugira uruhu rwiza, kikagira n’intungamubiri za magnesium zigira uruhare mu gukomeza amagufa.”

Mugabo yongeraho ko igifenesi gifasha umuntu kubona neza cyane cyane kubageze mu zabukuru, kikagira ubutare buvura indwara yo kubura amaraso bukanatera amaraso kudatembera neza.

Ikindi ni uko ibiti by’ibifenesi bishobora kwifashishwa mu kwirinda isuri, bikaba byakwifashishwa kandi mu gukora ibikoresho byo mu nzu, imirimo y’ubwubatsi, ibikoresho by’umuziki.

Igifenesi kandi cyifashishwa mu gukora verini basiga imbaho, guhoma ubwato n’imyenge y’indobo.

Mugabo yakanguriye abanyarwanda gutera igiti cy’igifenesi cyane ko ngo Ishami ry’amashyamba mu Kigo gishinzwe guteza imbere amazi n’Amashyamba, RWFA, rizabafasha kubona ingemwe, bakaba baniteguye gushyira igiti cy’igifenesi mu bizaterwa mu gikorwa ngarukamwaka cyo gutera ibiti.

Ati “Abanyarwanda turabasaba kugitera ku buryo buhagije kugira ngo n’abagikeneye babashe kukibona cyane ko bashobora kubibona mu buhumbikiro butandukanye. Twebwe tuzakomeza kubafasha kubona ingemwe kugira ngo cyinjizwe no muri gahunda ngarukamwaka yo gutera ibiti, dufashe n’abikorera kucyongerera umusaruro.”

Urubuto rw’igifenesi rweze rupima ibiro hagati ya 3-5, rukaba rumara amezi 16 mu buhumbikiro. Kugira ngo nyirarwo atangire kurusarura ni uko byibuze ruba rumaze imyaka itandatu rutewe.

Igifenesi gisarurwa kabiri mu mwaka, igiti kimwe gifite ubushobozi bwo kwera imbuto 200. Ni igiti gikunze guhingwa mu duce dushyuha nko mu Bugesera, Kayonza, Huye, Gisagara, Nyanza, Ngoma na Rusizi.

Mu 2018, Akarere ka Ngoma nka kamwe mu duce duhingwamo igifenesi cyasaruye toni 69. Ku isoko usanga uru rubuto ruri hagati ya 1000-1500 Frw.

Inkuru bijyanye: Uko Kankwanzi yahaye agaciro igifenesi muri Kirehe agikoramo inzoga

Igifenesi ni rumwe mu mbuto zo bwoko bw’inkeri bitewe n’uburyo kiremye, kikaba gikomoka mu gihugu cy’u Buhinde ariko gikunze kugaragara cyane no muri Thailand, Malaysia na Indonesia
Mugabo Jean Pierre uyobora ishami ry’amashyamba mu Kigo gishinzwe guteza imbere amazi n’Amashyamba, RWFA, yavuze ko ari urubuto abantu benshi bakwiriye guhinga
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza