IGIHE

Kigali Fashion Week yuguruye imiryango ku bahanga imideli n’abayimurika

0 11-06-2019 - saa 17:12, Uwiduhaye Theos

Igikorwa cya Kigali Fashion Week kigiye kuba guhera ku wa 4-6 Nyakanga ku nshuro ya 10 ndetse abagiteguye bafunguye imiryango ku bashaka kwigaragaza muri uru ruganda rwo guhanga no kumurika imideli.

Iki gikorwa kizabera muri Kigali Serena Hotel ku wa 4 kugeza ku wa 6, kwinjira bizaba ari 15, 000 Frw ku muntu umwe na 25, 000 Frw ku bantu babiri.

Kuri iyi nshuro bizaba bitandukanye n’ibyabanje cyane ko ubu byamaze kujya mu maboko ya Sosiyete yitwa ‘Iby’iwacu’ ikaba ariyo izabitegura ndetse ikanabikurikirana kuva bitangiye kugeza birangiye.

John Bunyeshuri wari umaze imyaka umunani ategura iki gikorwa cya Kigali Fashion Week kibera mu Rwanda, aherutse kubwira IGIHE ko bahisemo kugishyira mu maboko y’iyi kompanyi kubera ko bashaka guha umwanya n’abakiri bato bakigaragaza mu bijyanye no gutegura ibikorwa by’imideli.

Yakomeje avuga ko we icyo azakora ari ukuzaba ari mu bujyanama bw’abazategura Kigali Fashion Week ibindi byose bizakurikiranwa na ‘Iby’iwacu’ ya Umulisa Fiona Cécile.

Kuri ubu, ku rubuga rwa Kigali Fashion Week banditse bahamagararira abashaka gukomeza gukuza impano zabo no kwiyerekana mu gikorwa gikomeye nk’iki ko ku wa 13 Kamena 2019 hazaba gutoranya abazamurika imideli muri iki gikorwa bakomoka mu Rwanda naho ku wa 1 Nyakanga hazatoranywe abo hanze y’u Rwanda, bizabera kuri Sports View Hotel Kicukiro.

Bakomeje bavuga ko kandi biteguye no kwakira abahanga imideli bashaka kugaragaza ibikorwa byabo bikamenywa na benshi.

Iki gikorwa cya Kigali Fashion Week cyatangiye gutegurwa mu Rwanda kuva mu 2010, nicyo cyabimburiye ibindi mu bijyanye no kumurika imideli ndetse kiri imbere mu bifite izina rikomeye mu Rwanda no hanze.

Kuva mu 2017, iki gikorwa ngarukamwaka cya Kigali Fashion Week byagejejwe ku yindi ntera n’ababitegura mu bufatanye n’ikigo cya BerexInvest Corporation, bitangira kubera i Burayi, Amerika na Aziya nyuma y’imyaka irindwi byizihizwa mu Rwanda.

Nyuma y’iki gikorwa kizabera mu Rwanda uyu mwaka, hateganyijwe ikindi cya Kigali International Fashion Week kirimo ikizabera mu Mujyi wa Montreal muri Canada, i New York muri Amerika, Londres mu Bwongereza, Genève mu Busuwisi no mu Buyapani byo bikazakomeza gutegurwa na John Bunyeshuri.

Abahanga imideli barahamagarirwa kwitabira iki gikorwa
Abamurika imideli bahamagariwe kwitabira ijonjora ry'abazagaragara muri iki gikorwa
Kigali Fashion Week izaba ku nshuro ya 10
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza