IGIHE

Sudani: Hatashywe ishuri ryubatswe ku bufatanye n’Ingabo z’u Rwanda

1 24-10-2019 - saa 12:51, IGIHE

Ingabo z’u Rwanda ziri mu butumwa bwo kubungabunga amahoro i Darfur muri Sudani zatashye amashuri zubakiye abanyeshuri basaga 800 mu gukomeza gufasha abatuye iki gihugu kubona ibikorwa remezo by’ibanze bakeneye mu burezi.

Mu gushyira mu bikorwa inshingano z’ubutumwa bw’amahoro Ingabo z’u Rwanda zatangije ibikorwa bitandukanye birimo kubakira abaturage rondereza, kubaka amashuri, amavuriro ndetse no gucunga umutekano baherekeje abadamu bajya gutashya inkwi ngo badahura n’ihohoterwa.

Ibi bikorwa ni ibiza byiyongera ku nshingano nyamukuru za Loni zijyanye no kubungabunga umutekano w’abaturage.

Muri uru rwego ku wa 23 Ukwakira mu Nkambi ya El Salaam mu gace ka El Fasher i Darfur muri Sudani habaye umuhango wo gutaha ishuri ryubatswe n’abasirikare b’u Rwanda bafatanyije n’Umuryango UNAMID Christian Fellowship w’abakirisitu basengana n’abakozi bakorera mu butumwa bw’amahoro bwa Loni i Darfur (UNAMID).

Ni nyuma yo kubona ko abakobwa bigiraga mu Ishuri ryisumbuye rizwi nka “NUSAIBAH Girls’ secondary school” bigiraga ahataboneye kuko ibyumba by’amashuri byari byubakishijwe ibiti bigasakazwa ibyatsi gusa.

Hubatswe ibyumba 14 bishobora kwakira abana 800 hamwe n’ibyumba bine by’ibiro.

Umuyobozi w’iri shuri, Adam Suleiman Muhamad, yashimiye cyane ingabo z’u Rwanda ku musanzu zatanze.

Yagize ati “Uyu munsi twishimiye gushyikirizwa ishuri ryujuje ibyangombwa ku banyeshuri bacu. Iri shuri ntirizakoreshwa gusa n’abatuye mu Nkambi ya El-Salaam ahubwo n’abayituriye bashobora kuryigamo.”

Umuyobozi ku rwego rw’Intara ya Darfur, Brig Gen Muhamad Ibrahim, na we yashimye uruhare rw’Ingabo z’u Rwanda zibungabunga amahoro muri Darfur mu gufasha mu iterambere cyane cyane mu gace ka El-Salaam.

Yakomeje ati “Ibi byerekana urukundo n’ubufatanye hagati y’u Rwanda Sudani.”

Ukuriye Batayo y’Ingabo z’u Rwanda muri aka gace, Lt Col Bosco Rugema na we ashimangira ko iri shuri ari ikimenyetso cy’umubano mwiza hagati y’u Rwanda na Sudani.

Ati “Mu Rwanda, umuco wo gufashanya si ikimenyetso cy’uko utunze cyane ahubwo ni ikimenyetso cy’urukundo, agaciro n’icyubahiro.”

Ingabo z’u Rwanda zibarizwa muri Sudani i Darfur zishimwa umurava uziranga mu kazi kazo ko kubungabunga amahoro.

Ingabo z’u Rwanda ziri mu butumwa bwo kubungabunga amahoro i Darfur muri Sudani zatashye amashuri zubakiye abanyeshuri basaga 800
Mu Nkambi ya El Salaam mu gace ka El Fasher i Darfur muri Sudani habaye umuhango wo gutaha ishuri ryubatswe n’abasirikare b’u Rwanda bafatanyije n’Umuryango UNAMID Christian Fellowship
abakobwa bigiraga mu Ishuri ryisumbuye rizwi nka “NUSAIBAH Girls’ secondary school” bigiraga ahataboneye kuko ibyumba by’amashuri byari byubakishijwe ibiti bigasakazwa ibyatsi gusa
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Murayire Safari Martin 2019-10-25 00:35:48

Ingabo z’urwanda zitanze ikitegererezo,iki gikorwa ni indashyikirwa,nibakomeze baduheshe ishema ndahamya ntashidikanya ko nta handi ku isi byari byaba ndabashimye mbikuye ku mutima.

Kwamamaza